തളിപ്പറമ്പ് മാർക്കറ്റ് റോഡിൽ സ്ഥിതി ചെയ്യുന്ന ബിഇഎംഎൽപി സ്കൂളിൽ പുതിയ അധ്യയന വർഷത്തിൽ ഒന്നാം ക്ലാസിലേക്ക് പ്രവേശനം ലഭിച്ചത് എം.ധനുഷ് എന്ന ഒരു വിദ്യാർഥിക്ക് മാത്രമാണ്. സ്കൂൾ തുറന്ന ആദ്യ ദിനത്തിൽ തന്നെ മറ്റ് സഹപാഠികൾ ആരും തന്നെ ഇല്ലാത്ത അവസ്ഥയിലാണ് ഈ കുട്ടി ക്ലാസിലെത്തിയത്.
1893-ൽ സ്ഥാപിതമായ ഈ വിദ്യാലയത്തിന് മികച്ച കെട്ടിട സൗകര്യങ്ങളും ഒന്നു മുതൽ അഞ്ചു വരെയുള്ള ക്ലാസുകളുമുണ്ട്.
എന്നാൽ നിലവിൽ ആകെ 16 വിദ്യാർഥികൾ മാത്രമാണ് ഇവിടെ പഠിക്കുന്നത്. രണ്ടാം ക്ലാസിൽ രണ്ട് പേരും, മൂന്ന്, നാല് ക്ലാസുകളിലായി നാല് പേരും, അഞ്ചാം ക്ലാസിൽ ആറ് വിദ്യാർഥികളുമാണ് നിലവിലുള്ളത്.
വിദ്യാലയത്തിന്റെ ചരിത്രത്തിൽ ഒട്ടേറെ പ്രഗത്ഭരായ വ്യക്തികളെ സംഭാവന നൽകാൻ കഴിഞ്ഞിട്ടുണ്ടെങ്കിലും, കഴിഞ്ഞ കുറച്ചു വർഷങ്ങളായി സ്കൂൾ കടുത്ത പ്രതിസന്ധിയിലൂടെയാണ് കടന്നുപോകുന്നത്. മികച്ച അധ്യയന നിലവാരവും സൗകര്യങ്ങളും ലഭ്യമാക്കിയിട്ടും നഗരമധ്യത്തിലുള്ള ഈ വിദ്യാലയത്തിലേക്ക് കുട്ടികളെ അയക്കാൻ രക്ഷിതാക്കൾ മടിക്കുന്നതായി പ്രധാനാധ്യാപിക കൊച്ചുറാണി ചൂണ്ടിക്കാട്ടുന്നു.
എം.ധനുഷിന്റെ പിതാവ് മണികണ്ഠനും അമ്മ രാജേശ്വരിയും ഇതേ വിദ്യാലയത്തിലെ പൂർവ വിദ്യാർഥികളാണെന്ന പ്രത്യേകതയുമുണ്ട്. സ്ഥിരം അധ്യാപികയായി കൊച്ചുറാണി മാത്രമാണുള്ളത്.
ബാക്കി നാല് അധ്യാപകർ താൽക്കാലികാടിസ്ഥാനത്തിൽ ജോലി ചെയ്യുന്നവരാണ്. തിരഞ്ഞെടുപ്പ് കാലങ്ങളിൽ പോളിങ് ബൂത്തായും വാർഡ് സഭകൾ ചേരാനുമുള്ള ഒരു കേന്ദ്രമായി മാത്രമാണ് അധികൃതർ ഈ സ്കൂളിനെ കാണുന്നതെന്ന പരാതിയും രക്ഷിതാക്കൾ ഉന്നയിക്കുന്നു.
ഇതിനിടെ, പാനൂർ തൃപ്പങ്ങേട്ടൂർ പഞ്ചായത്തിലെ നരിക്കോട്ടുമല ഗവ. എൽപി സ്കൂളിലെ ഒന്നാം ക്ലാസിലേക്ക് എത്തിയത് രണ്ട് വിദ്യാർഥികൾ മാത്രമാണ്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
