തലയോലപ്പറമ്പ് കൊലപാതക കേസ്: പ്രതി വി.അനീഷിനെ വെറുതെവിട്ടു

കോട്ടയം ജില്ലയിലെ തലയോലപ്പറമ്പിൽ ഏറെ കോളിളക്കം സൃഷ്ടിച്ച കൊലപാതക കേസിൽ പ്രതിയെ കോടതി വെറുതെവിട്ടു. വി.അനീഷ് (48) എന്നയാളെയാണ് കോട്ടയം പ്രിൻസിപ്പൽ സെഷൻസ് ജഡ്ജി എം.മനോജ് വിട്ടയക്കാൻ ഉത്തരവിട്ടത്.

കാലായിൽ മാത്യു (മാത്തൻ– 44) എന്നയാളെ കൊലപ്പെടുത്തി മൃതദേഹം കുഴിച്ചുമൂടിയെന്നതായിരുന്നു കേസ്. കേസിൻ്റെ പശ്ചാത്തലം
2008 നവംബർ 25-ന് രാത്രി പത്ത് മണിക്ക് ശേഷമാണ് സംഭവം നടന്നതെന്നാണ് പ്രോസിക്യൂഷൻ കേസ്.

മാത്യുവിനെ കൊലപ്പെടുത്തിയ ശേഷം പ്രതി നടത്തിയിരുന്ന കടമുറിയുടെ പിൻഭാഗത്ത് മൃതദേഹം കുഴിച്ചുമൂടുകയും, പിന്നീട് ആ സ്ഥലത്ത് കെട്ടിടം നിർമിച്ച് തെളിവുകൾ നശിപ്പിക്കാൻ ശ്രമിച്ചു എന്നുമാണ് ആരോപിക്കപ്പെട്ടത്. തുമ്പുണ്ടാക്കിയ വെളിപ്പെടുത്തൽ
സംഭവത്തിന് എട്ട് വർഷത്തിന് ശേഷമാണ് കേസിൽ നിർണായക വഴിത്തിരിവുണ്ടായത്.

വ്യാജനോട്ട് കേസുമായി ബന്ധപ്പെട്ട് ഗുജറാത്തിലെ ജയിലിൽ റിമാൻഡിൽ കഴിഞ്ഞിരുന്ന വി.അനീഷ് സഹതടവുകാരനോട് ഇക്കാര്യം വെളിപ്പെടുത്തുകയായിരുന്നു. ഇതിനെത്തുടർന്ന് 2016 ഡിസംബർ 12-ന് ഇയാൾ അറസ്റ്റിലായി.

പ്രതിയുടെ കുറ്റസമ്മത മൊഴിയുടെ അടിസ്ഥാനത്തിൽ കടയുടെ പിൻവശത്ത് നടത്തിയ പരിശോധനയിൽ അസ്ഥികൂടം കണ്ടെത്തുകയും, ഡിഎൻഎ പരിശോധനയിലൂടെ അത് കൊല്ലപ്പെട്ട മാത്യുവിന്റേതാണെന്ന് സ്ഥിരീകരിക്കുകയും ചെയ്തിരുന്നു.

കോടതി വിധി
എന്നാൽ, വിചാരണ വേളയിൽ കുറ്റം സംശയാതീതമായി തെളിയിക്കുന്നതിൽ പ്രോസിക്യൂഷൻ പരാജയപ്പെട്ടുവെന്ന് വിലയിരുത്തിയാണ് കോടതി പ്രതിയെ വെറുതെവിട്ടത്. പ്രതിഭാഗത്തിന് വേണ്ടി അഭിഭാഷകരായ സിബി ചേനപ്പാടി, അനു ജോർജ്, എയ്ബെൽ മാത്യു സിബി, എലാന റോസ് സിബി എന്നിവർ ഹാജരായി.

ചലച്ചിത്രമായ ‘ദൃശ്യ’ത്തിന് അഞ്ചു വർഷം മുൻപ് നടന്ന സംഭവം എന്ന നിലയിൽ പിൽക്കാലത്ത് ഈ കേസ് ശ്രദ്ധിക്കപ്പെട്ടിരുന്നു.