ബെൽജിയത്തിൽ ട്രെയിനും സ്കൂൾ ബസ്സും കൂട്ടിയിടിച്ചു: രണ്ട് കുട്ടികൾ ഉൾപ്പെടെ നാല് പേർ മരിച്ചു

ബെൽജിയത്തിലെ വടക്കൻ മേഖലയായ ഫ്ലാൻഡേഴ്സിലെ ബുഗൻഹൗട്ട് എന്ന സ്ഥലത്ത് നടന്ന ദാരുണമായ വാഹനാപകടത്തിൽ രണ്ട് കുട്ടികളടക്കം നാല് പേർക്ക് ദാരുണാന്ത്യം. ഇന്ന് രാവിലെ എട്ടരയോടെയാണ് നാടിനെ നടുക്കിയ അപകടം സംഭവിച്ചത്.

അപകടത്തിന്റെ വിശദാംശങ്ങൾ
സംഭവസമയത്ത് സ്കൂൾ മിനിബസ്സിൽ ഡ്രൈവറും ഒരു സൂപ്പർവൈസറും ഏഴ് കുട്ടികളുമടക്കം ഒൻപത് പേരായിരുന്നു ഉണ്ടായിരുന്നത്. ലെവൽ ക്രോസിങ്ങിൽ വെച്ച് ട്രെയിൻ ബസ്സിലേക്ക് ഇടിച്ചുകയറുകയായിരുന്നു.

സ്റ്റേഷനിൽ നിർത്തേണ്ടിയിരുന്ന ട്രെയിൻ, സ്റ്റേഷന് ഒരു കിലോമീറ്റർ അകലെയുള്ള ലെവൽ ക്രോസിങ്ങിൽ വെച്ചാണ് അപകടത്തിൽപ്പെട്ടത്. ഇതിന്റെ ആഘാതത്തിൽ മിനിബസ് പൂർണമായും തകർന്ന് ട്രാക്കിന് സമീപമുള്ള റോഡിൽ തലകീഴായി മറിയുകയായിരുന്നു.

മരിച്ചവരിൽ രണ്ട് കുട്ടികളും ബസ് ഡ്രൈവറും കുട്ടികൾക്കൊപ്പമുണ്ടായിരുന്ന ഒരു മുതിർന്ന ആളും ഉൾപ്പെടുന്നു. കൂടാതെ രണ്ടുപേർക്ക് ഗുരുതരമായി പരിക്കേറ്റിട്ടുണ്ട്.

അന്വേഷണവും പ്രതികരണങ്ങളും
സിസിടിവി ദൃശ്യങ്ങൾ പ്രാഥമികമായി പരിശോധിച്ചതിൽ നിന്നും അപകടസമയത്ത് ലെവൽ ക്രോസിങ്ങിലെ സുരക്ഷാ ബാരിയറുകൾ താഴ്ന്ന നിലയിലായിരുന്നുവെന്ന് വ്യക്തമായിട്ടുണ്ട്. സംഭവസ്ഥലത്ത് പ്രൊസിക്യൂട്ടർമാരും ഫോറൻസിക്-ഗതാഗത വിദഗ്ധരും അടങ്ങുന്ന സംഘം പരിശോധന നടത്തിവരികയാണ്.

ദുരന്തത്തിൽ ബെൽജിയം ആഭ്യന്തര മന്ത്രി ബെർണാഡ് ക്വിന്റിൻ അനുശോചനം രേഖപ്പെടുത്തി. “ബുഗൻഹൗട്ടിൽ സംഭവിച്ച ദാരുണമായ അപകടത്തെക്കുറിച്ച് വലിയ ഞെട്ടലോടെയാണ് അറിഞ്ഞതെന്നും മരണപ്പെട്ടവരുടെ കുടുംബങ്ങളുടെ ദുഖത്തിൽ പങ്കുചേരുന്നതായും പരിക്കേറ്റവർ എത്രയും വേഗം സുഖം പ്രാപിക്കട്ടെ എന്നും” അദ്ദേഹം സാമൂഹ്യ മാധ്യമത്തിലൂടെ വ്യക്തമാക്കി.