ഇടുക്കി തൊടുപുഴയിൽ പ്രായപൂർത്തിയാകാത്ത പെൺകുട്ടിയെ കൂട്ടബലാത്സംഗത്തിന് ഇരയാക്കിയ കേസിൽ പ്രതിക്ക് 12 വർഷം കഠിനതടവ് ശിക്ഷ വിധിച്ചു. തൊടുപുഴ ബംഗ്ലാകുന്ന് സ്വദേശി വിനീഷ് വിജയനെയാണ് ഇടുക്കി അഡീഷണൽ ആൻഡ് സെഷൻസ് കോടതി ശിക്ഷിച്ചത്.
ശിക്ഷാവിധിയോടൊപ്പം ഇരയായ പെൺകുട്ടിയുടെ പുനരധിവാസത്തിനായി നാല് ലക്ഷം രൂപ നൽകാനും കോടതി ഉത്തരവിട്ടു. തൊടുപുഴ കുമാരമംഗലത്ത് നടന്ന പീഡന പരമ്പരയുമായി ബന്ധപ്പെട്ട് കോടതിയിൽ എത്തിയ രണ്ടാമത്തെ കേസിലാണ് ഇപ്പോൾ വിധി വന്നിരിക്കുന്നത്.
സ്വകാര്യ സ്ഥാപനത്തിൽ ജോലി ചെയ്തിരുന്ന കാലയളവിൽ, സഹപ്രവർത്തകനായിരുന്ന വിനീഷ് വിജയൻ 17 വയസ്സുകാരിയെ പലതവണ പീഡിപ്പിച്ചുവെന്നാണ് കേസ്. ഈ സ്ഥാപനത്തിലെ മറ്റ് ജീവനക്കാരും പെൺകുട്ടിയെ പീഡനത്തിനിരയാക്കിയിരുന്നു.
തുടർന്ന് ഗർഭിണിയായ പെൺകുട്ടിക്ക് വയറുവേദന അനുഭവപ്പെട്ടതിനെത്തുടർന്ന് ആശുപത്രിയിൽ പ്രവേശിപ്പിച്ചപ്പോഴാണ് പീഡനവിവരം പുറത്തറിഞ്ഞത്. തൊടുപുഴ പോലീസ് നടത്തിയ വിപുലമായ അന്വേഷണത്തിൽ, 2017 മുതൽ 2022 വരെയുള്ള കാലയളവിൽ വിവിധ സ്ഥലങ്ങളിലെത്തിച്ച് പലരും ചേർന്ന് പെൺകുട്ടിയെ പീഡിപ്പിച്ചതായി തെളിഞ്ഞു.
പെൺകുട്ടിയുടെ മൊഴിയുടെ അടിസ്ഥാനത്തിൽ മൊത്തം 28 കേസുകളാണ് പോലീസ് രജിസ്റ്റർ ചെയ്തത്. ഇതിൽ വിചാരണ പൂർത്തിയായ രണ്ടാമത്തെ കേസിലാണ് ഇപ്പോൾ വിധി വന്നിരിക്കുന്നത്.
ബലാത്സംഗം, ലൈംഗിക അതിക്രമം എന്നീ വകുപ്പുകൾ പ്രകാരമാണ് പ്രതിക്കെതിരെ കുറ്റങ്ങൾ ചുമത്തിയിരിക്കുന്നത്. ശൈശവ വിവാഹത്തിന് ഇരയായ പെൺകുട്ടി മുത്തശ്ശിയുടെ സംരക്ഷണത്തിൽ കഴിയുമ്പോഴാണ് ക്രൂരമായ പീഡനങ്ങൾക്ക് വിധേയയായത്.
പെൺകുട്ടിയുടെ അമ്മയുടെയും മുത്തശ്ശിയുടെയും അറിവോടെയാണ് ഈ സംഭവങ്ങൾ നടന്നതെന്ന് അന്വേഷണത്തിൽ വ്യക്തമായിട്ടുണ്ട്. കേസിലെ പ്രധാന സാക്ഷികളിലൊരാളായ മുത്തശ്ശി വിചാരണയ്ക്കിടെ കൂറുമാറിയിരുന്നു.
ശൈശവ വിവാഹം ഉൾപ്പെടെയുള്ള ബാക്കി 26 കേസുകളുടെ വിചാരണ നടപടികൾ അന്തിമ ഘട്ടത്തിലാണെന്ന് അധികൃതർ അറിയിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
