രണ്ടാമത്തെ ഡബിൾ ഡെക്കർ ബസും ഹിറ്റ്; ഒരാഴ്ച കൊണ്ട് വരുമാനം രണ്ടര ലക്ഷം കവിഞ്ഞു

മൂന്നാർ∙ പുതുതായി സർവീസ് ആരംഭിച്ച കെഎസ്ആർടിസി ഡബിൾ ഡെക്കർ ബസും ഹിറ്റായി. ഒരാഴ്ച കൊണ്ട് വരുമാനം രണ്ടര ലക്ഷം കവിഞ്ഞു.

കഴിഞ്ഞ നാലിനാണ് കെഎസ്ആർടിസിയുടെ രണ്ടാമത്തെ ഡബിൾ ഡെക്കർ ബസ് ഓടിത്തുടങ്ങിയത്. കഴിഞ്ഞ ഞായറാഴ്ച വരെ 2.57 ലക്ഷം രൂപയാണു വരുമാനം ലഭിച്ചത്.

എട്ടു ദിവസത്തിനിടയിൽ 720 പേർ പുതിയ ബസിൽ യാത്ര ചെയ്തു. പുതിയ ബസ് എത്തിയിട്ടും പഴയ ഡബിൾ ഡെക്കർ ബസും മികച്ച വരുമാനമാണ് എട്ടു ദിവസത്തിനിടയിൽ നേടിയത്.
 756 യാത്രക്കാർ സഞ്ചരിച്ച ബസിന് പുതിയ ബസിനൊപ്പം തന്നെ എട്ടു ദിവസത്തിനിടയിൽ 2.78 ലക്ഷം രൂപ വരുമാനം ലഭിച്ചു.

രണ്ട് ബസുകൾ ഉള്ളതിനാൽ ഡബിൾ ഡെക്കറിൽ യാത്ര ചെയ്യാനെത്തുന്നവരുടെ എണ്ണവും വർധിച്ചെന്ന് കെഎസ്ആർടിസി അധികൃതർ പറഞ്ഞു. പഴയ മൂന്നാർ ഡിപ്പോയിൽ നിന്നാരംഭിച്ച് ദേശീയപാത വഴി സിഗ്നൽ പോയിന്റ്, ദേവികുളം, ലാക്കാട് വ്യൂ പോയിന്റ്, ഗ്യാപ് റോഡ്, പവർഹൗസ് വെള്ളച്ചാട്ടം വഴി ആനയിറങ്കൽ ഡാമിനു സമീപത്തെത്തി മടങ്ങുന്നതാണ് സർവീസ്. 
കഴിഞ്ഞ ഫെബ്രുവരി 8നാണ് കെഎസ്ആർടിസിയുടെ ആദ്യ ഡബിൾ ഡെക്കർ ബസ് സർവീസ് ആരംഭിച്ചത്.

ഡിസംബർ 31 വരെ ഈ ബസ് 1.22 കോടി രൂപ വരുമാനം നേടിയിരുന്നു. … FacebookTwitterWhatsAppTelegram