രൺവീർ സിംഗിന്റെ ‘ധുരന്ദറി’ന് കട്ടുകളോടെ എ സർട്ടിഫിക്കറ്റ്.

രണ്‍വീര്‍ സിംഗ് നായകനായി എത്തുന്ന പുതിയ ചിത്രമാണ് ‘ധുരന്ദര്‍’. ആദിത്യ ധർ സംവിധാനം ചെയ്യുന്ന ഈ മാസ് ആക്ഷൻ ത്രില്ലർ ചിത്രത്തിൻ്റെ ഒടിടി റൈറ്റ്സ് നെറ്റ്ഫ്ലിക്സ് സ്വന്തമാക്കി.

ചിത്രം 2025 ഡിസംബർ 5-ന് തിയേറ്ററുകളിൽ ആഗോളതലത്തിൽ റിലീസ് ചെയ്യും. ജിയോ സ്റ്റുഡിയോസും B62 സ്റ്റുഡിയോസും ചേർന്ന് നിർമ്മിക്കുന്ന ചിത്രത്തിൽ സഞ്ജയ് ദത്ത്, അക്ഷയ് ഖന്ന, ആർ മാധവൻ, അർജുൻ രാംപാൽ എന്നിവരും പ്രധാന വേഷങ്ങളിൽ എത്തുന്നു.

ചിത്രത്തിന് ‘എ’ സർട്ടിഫിക്കറ്റാണ് ലഭിച്ചിരിക്കുന്നത്. അമിതമായ വയലൻസിൻ്റെ പേരിൽ ചില കട്ടുകളും നിർദ്ദേശിച്ചിട്ടുണ്ട്.

മൂന്ന് മണിക്കൂർ 34 മിനിറ്റാണ് ചിത്രത്തിൻ്റെ ദൈർഘ്യം. ചിത്രത്തിൻ്റെ ടൈറ്റിൽ ട്രാക്ക് നേരത്തെ പുറത്തിറങ്ങി സാമൂഹ്യ മാധ്യമങ്ങളിൽ തരംഗമായിരുന്നു.

ടൈറ്റിൽ ട്രാക്കിൻ്റെ ലിറിക്കൽ വീഡിയോ സാരേഗാമ മ്യൂസിക്കിൻ്റെ യൂട്യൂബ് ചാനലിൽ ലഭ്യമാണ്. ശാശ്വത് സച്ച്ദേവും ചരൺജിത് അഹൂജയും ചേർന്നാണ് ഗാനത്തിന് സംഗീതം നൽകിയിരിക്കുന്നത്.

ആധുനിക ഹിപ്-ഹോപ്പ്, പഞ്ചാബി ശൈലി, സിനിമാറ്റിക് ഗ്രിറ്റ് എന്നിവയുടെ മനോഹരമായ സംയോജനമാണ് ഈ ഗാനം. ഹനുമാൻകൈൻഡ്, ജാസ്മിൻ സാൻഡ്ലാസ്, സുധീർ യദുവൻഷി, ശാശ്വത് സച്ച്ദേവ്, മുഹമ്മദ് സാദിഖ്, രഞ്ജിത് കൗർ എന്നിവർ ചേർന്നാണ് ഗാനം ആലപിച്ചിരിക്കുന്നത്.

ധുരന്ദറിൻ്റെ തീവ്രതയും ഊർജ്ജസ്വലതയും പ്രതിഫലിപ്പിക്കുന്ന ഈ ഗാനം ഹനുമാൻകൈൻഡ്, ജാസ്മിൻ സാൻഡ്ലാസ്, ബാബു സിംഗ് മാൻ എന്നിവർ ചേർന്നാണ് രചിച്ചത്. ഹനുമാൻകൈൻഡിൻ്റെ ആദ്യ ബോളിവുഡ് പ്രോജക്റ്റ് കൂടിയാണിത്.

അദ്ദേഹത്തിൻ്റെ തനത് ശൈലിയിൽ ആധുനിക റാപ്പിനെ ഓൾഡ് സ്കൂൾ ദേശി സ്വാഗറുമായി സമന്വയിപ്പിച്ചാണ് ഈ ഗാനം ഒരുക്കിയിരിക്കുന്നത്. രൺവീർ സിംഗിൻ്റെ സ്ക്രീൻ പ്രെസൻസിനെ ഗാനം മികച്ച രീതിയിൽ പിന്തുണയ്ക്കുന്നു.

‘നാ ദേ ദിൽ പർദേശി നു’ എന്ന നാടോടി ക്ലാസിക് ഗാനം ആഴത്തിലുള്ള വികാരങ്ങൾ ഉൾക്കൊള്ളുന്ന ഒന്നാണെന്നും ഇത് ചിത്രത്തിനായി പുനരാവിഷ്കരിക്കാൻ കഴിഞ്ഞത് ഒരു ബഹുമതിയും ഉത്തരവാദിത്തവുമാണെന്നും സംഗീതസംവിധായകൻ ശാശ്വത് സച്ച്ദേവ് പറഞ്ഞു. സിനിമയുടെ ആത്മാവിൻ്റെ ഭാഗമായ ഈ ഗാനം തുടക്കം മുതൽ തന്നെ തിരക്കഥയിൽ ഉണ്ടായിരുന്നുവെന്നും അദ്ദേഹം കൂട്ടിച്ചേർത്തു.

നേരത്തെ രൺവീർ സിംഗിൻ്റെ ജന്മദിനത്തോടനുബന്ധിച്ച് പുറത്തിറക്കിയ ചിത്രത്തിൻ്റെ ഫസ്റ്റ് ലുക്കും വലിയ ശ്രദ്ധ നേടിയിരുന്നു. ഇതുവരെ കാണാത്ത രൂപത്തിൽ രൺവീറിനെ അവതരിപ്പിച്ച “ധുരന്ദർ” ഫസ്റ്റ് ലുക്ക് വീഡിയോ, വമ്പൻ ആക്ഷൻ രംഗങ്ങൾ കൊണ്ടും ശ്രദ്ധേയമായിരുന്നു.

‘ഉറി: ദ സർജിക്കൽ സ്ട്രൈക്ക്’ എന്ന ചിത്രത്തിലൂടെ ശ്രദ്ധേയനായ സംവിധായകനാണ് ആദിത്യ ധർ. ആദിത്യ ധർ തന്നെ രചനയും സംവിധാനവും നിർവഹിച്ച “ധുരന്ദർ”, ജ്യോതി ദേശ്പാണ്ഡെ, ലോകേഷ് ധർ എന്നിവർക്കൊപ്പം അദ്ദേഹം സഹനിർമ്മാതാവുമാണ്.

ബി62 സ്റ്റുഡിയോ നിർമ്മിച്ച് ജിയോ സ്റ്റുഡിയോസ് അവതരിപ്പിക്കുന്ന ‘ധുരന്ദർ’, അജ്ഞാതരായ വ്യക്തികളുടെ ഉത്ഭവത്തെക്കുറിച്ചുള്ള പറയാത്ത കഥയാണ് പറയുന്നത്. ഈ വർഷത്തെ ഏറ്റവും വലിയ ഹിന്ദി ചിത്രങ്ങളിൽ ഒന്നായാണ് “ധുരന്ദർ” തിയേറ്ററുകളിൽ എത്തുക.

ഛായാഗ്രഹണം – വികാഷ് നൗലാഖ, എഡിറ്റർ – ശിവകുമാർ വി പണിക്കർ, സംഗീതം – ശാശ്വത് സച്ച്ദേവ്, പ്രൊഡക്ഷൻ ഡിസൈനർ – സെയ്നി എസ് ജോഹറായ്, വസ്ത്രാലങ്കാരം – സ്മൃതി ചൗഹാൻ, ആക്ഷൻ – എജെസ് ഗുലാബ്, സീ യങ് ഓ, യാനിക്ക് ബെൻ, റംസാൻ ബുലുത്, നൃത്തസംവിധാനം – വിജയ് ഗാംഗുലി, പിആർഒ – ശബരി. വാർത്തകൾ newskerala.net-ൽ വായിക്കാം