ഫരീദാബാദ്: അൽ-ഫലാഹ് സർവകലാശാലയിലെ അധ്യാപകനായ ഡോ. ഷഹീൻ ഷാഹിദിന്റെ ഹോസ്റ്റൽ മുറിയിൽ നിന്ന് 18 ലക്ഷം രൂപ കണ്ടെടുത്തതായി ദേശീയ അന്വേഷണ ഏജൻസി (എൻഐഎ).
മുപ്പത്തിരണ്ടാം നമ്പർ മുറിയിലെ അലമാരയിൽ ഒളിപ്പിച്ച നിലയിലായിരുന്നു പണം. സർവകലാശാല കേന്ദ്രീകരിച്ച് പ്രവർത്തിക്കുന്ന ‘വൈറ്റ് കോളർ ഭീകരവാദ സംഘത്തിന്റെ’ പ്രവർത്തനങ്ങൾക്കായി ശേഖരിച്ച പണമാണിതെന്നാണ് എൻഐഎയുടെ സംശയം.
ദില്ലി സ്ഫോടനക്കേസുമായി ബന്ധപ്പെട്ട് അറസ്റ്റിലായ ഷഹീനെ തെളിവെടുപ്പിന്റെ ഭാഗമായാണ് സർവകലാശാലാ ക്യാമ്പസിലെത്തിച്ചത്. സ്ഫോടകവസ്തുക്കൾ നിർമ്മിക്കാനാവശ്യമായ രാസവസ്തുക്കൾ വാങ്ങിയെന്ന് കരുതുന്ന എൻഐടി ഏരിയയിലെ ഒരു കടയിൽ എത്തിച്ച് തിരിച്ചറിയൽ പരേഡ് നടത്തിയ ശേഷമായിരുന്നു ഇത്.
ക്യാമ്പസിലെത്തിയ എൻഐഎ സംഘം ആദ്യം ഷഹീനെ അഡ്മിനിസ്ട്രേറ്റീവ് ബ്ലോക്കിലേക്കാണ് കൊണ്ടുപോയത്. അവിടെ ഇയാൾ ഉപയോഗിച്ചിരുന്ന ലോക്കർ അന്വേഷണ ഉദ്യോഗസ്ഥർക്ക് കാണിച്ചുകൊടുത്തു.
തുടർന്ന് വിശദമായ പരിശോധനയ്ക്കായി ഹോസ്റ്റൽ മുറിയിലെത്തിച്ചപ്പോഴാണ് 18 ലക്ഷം രൂപ കണ്ടെത്തിയത്. എൻഐഎ ഉദ്യോഗസ്ഥർ പണം എണ്ണിത്തിട്ടപ്പെടുത്തി പിടിച്ചെടുത്തു.
ഈ പണത്തിന്റെ ഉറവിടം കണ്ടെത്താനുള്ള ശ്രമം തുടരുകയാണെന്ന് ഉദ്യോഗസ്ഥർ newskerala.net-നോട് പറഞ്ഞു. ഭീകരസംഘടനയുടെ ശൃംഖല വഴിയാണോ പണം എത്തിയതെന്നും പരിശോധിക്കുന്നുണ്ട്.
പണം കൈമാറാൻ സഹായിച്ചവരെ കണ്ടെത്താനായി തിരച്ചിൽ ഊർജ്ജിതമാക്കി. ഷഹീനെ മെഡിക്കൽ വാർഡ്, ക്ലാസ് മുറി, ഡോക്ടറുടെ ക്യാബിൻ എന്നിവിടങ്ങളിൽ കൊണ്ടുപോയി ദൈനംദിന പ്രവർത്തനങ്ങൾ പുനരാവിഷ്കരിക്കാനും അതുവഴി കൂട്ടാളികളെ തിരിച്ചറിയാനും അന്വേഷണസംഘം ശ്രമിച്ചു.
അൽ-ഫലാഹിൽ അധ്യാപകനായിരിക്കുമ്പോഴും ഷഹീൻ ഭീകരസംഘടനയുമായി സജീവമായി ബന്ധം പുലർത്തിയിരുന്നതായാണ് അന്വേഷണ സംഘത്തിന്റെ നിഗമനം. സർവകലാശാലയ്ക്കകത്തും പുറത്തും തന്റെ സ്വാധീനവലയം വികസിപ്പിക്കാനും ഇയാൾ ശ്രമിച്ചിരുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
