എഐ ബബിൾ പൊട്ടും, കമ്പനികൾക്ക് വൻ തിരിച്ചടിയാകും; മുന്നറിയിപ്പുമായി സുന്ദർ പിച്ചൈ.

ന്യൂയോർക്ക്: നിർമ്മിത ബുദ്ധി (എഐ) കമ്പനികളുടെ ഓഹരി വിപണിയിൽ നിലവിലുള്ള അസാധാരണ കുതിപ്പിന് ശേഷം ഒരു തകർച്ചയുണ്ടായാൽ, അത് എല്ലാ കമ്പനികളെയും ബാധിക്കുമെന്ന് ഗൂഗിളിന്റെ മാതൃകമ്പനിയായ ആൽഫബെറ്റിന്റെ സിഇഒ സുന്ദർ പിച്ചൈയുടെ മുന്നറിയിപ്പ്. എഐ രംഗത്ത് ഒരു സാമ്പത്തിക കുമിള (ബബിൾ) രൂപപ്പെട്ടിട്ടുണ്ടെന്നും അത് വൈകാതെ തകരുമെന്നുമുള്ള ആശങ്കകൾക്കിടെയാണ് അദ്ദേഹത്തിന്റെ പ്രതികരണം.

അത്തരമൊരു സാഹചര്യം ഗൂഗിളിനെയും ബാധിക്കാമെങ്കിലും അതിനെ മറികടക്കാൻ കമ്പനിക്ക് സാധിക്കുമെന്ന് അദ്ദേഹം പ്രത്യാശ പ്രകടിപ്പിച്ചു. കാലിഫോർണിയയിലെ ഗൂഗിൾ ആസ്ഥാനത്ത് വെച്ച് ബിബിസിക്ക് നൽകിയ അഭിമുഖത്തിലാണ് സുന്ദർ പിച്ചൈ നിലപാട് വ്യക്തമാക്കിയത്.

അസാധാരണ കുതിപ്പ് എഐ മോഡലുകൾ വ്യാപകമായതോടെ എൻവിഡിയ, ഗൂഗിൾ, മൈക്രോസോഫ്റ്റ് തുടങ്ങിയ കമ്പനികളുടെ ഓഹരികളിൽ റെക്കോർഡ് കുതിപ്പാണ് സമീപകാലത്ത് ദൃശ്യമായത്. വൻകിട

നിക്ഷേപകർ വലിയ തോതിൽ പണം മുടക്കിയതോടെ കമ്പനികൾ കൂറ്റൻ ഡാറ്റാ സെന്ററുകൾ ഉൾപ്പെടെയുള്ള പദ്ധതികൾ പ്രഖ്യാപിച്ചു. ഇത് ഓഹരി മൂല്യം വീണ്ടും ഉയർത്തി.

നിലവിലെ സാഹചര്യം ‘ഡോട്ട് കോം ബബിളിന്’ സമാനമാണെന്നും വിപണി വൈകാതെ ഒരു വലിയ തകർച്ചയെ അഭിമുഖീകരിക്കുമെന്നും സാമ്പത്തിക വിദഗ്ദ്ധർക്കിടയിൽ ആശങ്ക ശക്തമാണ്. ഈ പശ്ചാത്തലത്തിലാണ് സുന്ദർ പിച്ചൈയുടെ പ്രതികരണം.

ഒരു കമ്പനിയും രക്ഷപ്പെടില്ല എഐ ഓഹരി വിപണിയിലെ തകർച്ച സംഭവിച്ചാൽ ഒരു കമ്പനിക്കും അതിൽ നിന്ന് മാറിനിൽക്കാനാവില്ലെന്ന് സുന്ദർ പിച്ചൈ വ്യക്തമാക്കി. പ്രതിസന്ധി ഗൂഗിളിനെയും ബാധിക്കുമെങ്കിലും അതിനെ മറികടക്കാനുള്ള ശേഷി കമ്പനിക്കുണ്ടെന്നും അദ്ദേഹം ആത്മവിശ്വാസം പ്രകടിപ്പിച്ചു.

എഐ കമ്പനികളുടെ ഓഹരി മൂല്യത്തിൽ ഇടിവുണ്ടായേക്കാമെന്ന ചർച്ചകൾക്കിടെയാണ് ആൽഫബെറ്റ് മേധാവിയുടെ പ്രസ്താവനയെന്നത് ഏറെ പ്രാധാന്യമർഹിക്കുന്നു. എഐ ഉപയോഗിച്ചുള്ള തെരഞ്ഞെടുപ്പ് പ്രചാരണങ്ങൾക്ക് കർശന നിരീക്ഷണം അതിനിടെ, കേരളത്തിലെ തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിൽ നിർമ്മിത ബുദ്ധി (എഐ) അടിസ്ഥാനമാക്കിയുള്ള പ്രചാരണ പ്രവർത്തനങ്ങൾക്ക് കർശനമായ നിരീക്ഷണം ഏർപ്പെടുത്തുമെന്ന് സംസ്ഥാന തിരഞ്ഞെടുപ്പ് കമ്മീഷണർ എ.

ഷാജഹാൻ അറിയിച്ചു. എഐ സാങ്കേതികവിദ്യ ഉപയോഗിച്ച് വ്യാജ ചിത്രങ്ങൾ, ശബ്ദരേഖകൾ, തെറ്റിദ്ധാരണാജനകമായ വിവരങ്ങൾ എന്നിവ തയ്യാറാക്കി പ്രചരിപ്പിക്കുന്നവർക്കെതിരെ ശക്തമായ നിയമനടപടികൾ സ്വീകരിക്കും.

തിരഞ്ഞെടുപ്പ് പ്രചാരണത്തിന്റെ സുതാര്യതയും തുല്യ അവസരവും ഉറപ്പാക്കാൻ സ്ഥാനാർത്ഥികളും രാഷ്ട്രീയ പാർട്ടികളും ഈ നിർദ്ദേശം കർശനമായി പാലിക്കണമെന്നും അദ്ദേഹം കൂട്ടിച്ചേർത്തു.