ഓഹരി നിക്ഷേപകർ പ്രതീക്ഷയോടെ കാത്തിരിക്കുന്ന ഈ വർഷത്തെ മുഹൂർത്ത വ്യാപാരം ഉത്തരേന്ത്യയിലെ ദീപാവലി ആഘോഷദിനമായ ചൊവ്വാഴ്ച (ഒക്ടോബർ 21). പുതുതായി ഓഹരികൾ വാങ്ങാനും നിലവിലെ ഓഹരിനിക്ഷേപം ഉയർത്താനും ഏറ്റവും ഐശ്വര്യപൂർണമെന്ന് നിക്ഷേപകർ വിശ്വസിക്കുന്ന സമയമാണിത്.
ചൊവ്വാഴ്ച ഉച്ചയ്ക്ക് 1.45 മുതൽ 2.45 വരെയാണ് ഇക്കുറി മുഹൂർത്ത വ്യാപാരം. ദീപാവലി പ്രമാണിച്ച് ചൊവ്വാഴ്ചയും ‘ദിവാലി ബലിപ്രതിപദ’ പ്രമാണിച്ച് ബുധനാഴ്ചയും (ഒക്ടോബർ 22) ഓഹരി വിപണികൾക്ക് അവധിയാണ്.
ഓഹരികൾ വിപണി തുടർച്ചയായി രണ്ടുദിവസം പൊതു അവധിയിലാകുന്നത് അപൂർവം.
ചൊവ്വാഴ്ച അവധിയാണെങ്കിലും ഒരുമണിക്കൂർ നേരത്തേക്ക് വ്യാപാരം സംഘടിപ്പിക്കും. ഇതാണ് മുഹൂർത്ത വ്യാപാരം.
ഉത്തരേന്ത്യൻ ഹൈന്ദവ വിശ്വാസപ്രകാരമുള്ള ‘സംവത്’ വർഷത്തിന് തുടക്കംകുറിച്ചാണ് ഓരോ വർഷവും ദീപാവലിനാളിൽ മുഹൂർത്ത വ്യാപാരം സംഘടിപ്പിക്കാറുള്ളത്. ലക്ഷ്മീദേവിക്ക് പൂജകൾ അർപ്പിച്ചശേഷമാണ് പ്രത്യേക വ്യാപാരം ആരംഭിക്കുക.
മുഹൂർത്തം ഇങ്ങനെ
ഇക്കുറി മുഹൂർത്ത വ്യാപാരത്തിൽ പ്രീ-ഓപ്പൺ സെഷൻ ഉച്ചയ്ക്ക് 1.30 മുതൽ 1.45 വരെയാണ്.
തുടർന്നാണ് ഒരു മണിക്കൂർ നേരത്തേക്ക് സാധാരണ വ്യാപാരം. ഓഹരി വാങ്ങൽ/വിൽക്കൽ ഇടപാടുകളിൽ അന്തിമമായി മാറ്റംവരുത്താൻ (ട്രേഡ് മോഡിഫിക്കേഷൻ) 2.55 വരെയും സമയം അനുവദിച്ചിട്ടുണ്ട്.
പുതിയ ബിസിനസ് പ്രവർത്തനങ്ങൾ ആരംഭിക്കുക, നിക്ഷേപങ്ങൾ തുടങ്ങുക, വീടോ വാഹനങ്ങളോ വസ്ത്രങ്ങളോ ആഭരണങ്ങളോ മറ്റോ വാങ്ങുക എന്നിവയ്ക്കെല്ലാം ഐശ്വര്യപൂർണമായ ‘മുഹൂർത്തമായാണ്’ ഈ ഒരു മണിക്കൂറിനെ ഉത്തരേന്ത്യക്കാർ കാണുന്നത്.
കഴിഞ്ഞ വർഷങ്ങളിൽ വൈകിട്ട് 6 മുതൽ 7 വരെയായിരുന്നു മുഹൂർത്ത വ്യാപാരം. ഇക്കുറി ഇത് ഉച്ചയ്ക്കാണെന്നതും അപൂർവതയാണ്.
ഓഹരി വിപണിക്ക് നേട്ടപ്രതീക്ഷ
പൊതുവേ സെൻസെക്സും നിഫ്റ്റിയും മുഹൂർത്ത വ്യാപാരത്തിൽ നേട്ടത്തിലേറാറുണ്ട്.
2012 മുതൽ 2024 വരെയുള്ള 13 മുഹൂർത്ത വ്യാപാരങ്ങളിൽ 10ലും നേട്ടത്തിന്റെ മധുരം നുണഞ്ഞു. 2024ലെ മുഹൂർത്ത വ്യാപാരത്തിൽ സെൻസെക്സ് 335.06 പോയിന്റ് (+0.42%) ഉയർന്ന് 79,724.12ലും നിഫ്റ്റി 99 പോയിന്റ് (+0.41%) നേട്ടവുമായി 24,304ലും എത്തിയിരുന്നു.
നിലവിൽ സെൻസെക്സുള്ളത് 83,952ൽ ആണ്; നിഫ്റ്റി 25,709ലും.
സംവതിൽ നിന്ന് സംവതിലേക്ക്
സംവത്-2082 വർഷത്തിനാണ് ഇക്കുറി ദീപാവലിക്ക് തുടക്കമാകുന്നത്. കഴിഞ്ഞ ഒരുവർഷത്തെ പ്രകടനം വിലയിരുത്തിയാൽ നിക്ഷേപകർക്ക് ഇതിനകം ഏറ്റവുമധികം നേട്ടം (റിട്ടേൺ) സമ്മാനിച്ചത് വെള്ളിയാണ്; 72%.
സ്വർണം 63% മുന്നേറി തൊട്ടടുത്തുണ്ട്.
സ്വർണവും വെള്ളിയും റെക്കോർഡുകൾ തകർത്ത് ഉയരുന്നത് നിക്ഷേപകർക്ക് നേട്ടമാകുന്നു. കഴിഞ്ഞ 10 വർഷം പരിഗണിച്ചാൽ ഓരോ ദീപാവലിയിൽ നിന്നും അടുത്ത ദീപാവലിവരെ പരിഗണിച്ചാൽ സ്വർണവും വെള്ളിയും പൊതുവേ പോസിറ്റീവ് നേട്ടം മാത്രമാണ് നിക്ഷേപകർക്ക് നൽകിയതും.
എന്നാൽ, ഇക്കഴിഞ്ഞ ഒരുവർഷത്തെ നേട്ടം അമ്പരിപ്പിക്കുന്നതുമാണ്.
കഴിഞ്ഞ ഒരുവർഷത്തിനിടെ സ്വർണം 63% മുന്നേറി. അതിനുമുൻപത്തെ ഏറ്റവും ഉയർന്ന നേട്ടം 2020ലെ 33 ശതമാനം.
വെള്ളിയുടെ ഇതിനുമുൻപത്തെ മികച്ച നേട്ടം 2020ലെ തന്നെ 37 ശതമാനവും. സെൻസെക്സ് കഴിഞ്ഞ ഒരുവർഷത്തിനിടെ 6.3% മാത്രമേ ഉയർന്നിട്ടുള്ളൂ.
നിഫ്റ്റി 5.8%.
നെഗറ്റീവ് നേട്ടവും!
ബിഎസ്ഇ സ്മോൾ-ക്യാപ് സൂചിക കഴിഞ്ഞ ഒരുവർഷത്തിനിടെ 3.1% നഷ്ടം നേരിട്ടു. ബിഎസ്ഇ മിഡ്-ക്യാപ് സൂചിക ഒരു ശതമാനം മാത്രം ഉയർന്നു.
ഇതിനുമുൻപത്തെ രണ്ടു സംവത് വർഷങ്ങളിൽ ഈ സൂചിക യഥാക്രമം 41%, 31% എന്നിങ്ങനെ കുതിച്ചിരുന്നു. മറ്റ് വികസ്വര രാജ്യങ്ങളിലെ വിപണികൾ ശരാശരി 19.8% വളർച്ച കഴിഞ്ഞ ഒരുവർഷത്തിനിടെ നേടിയപ്പോഴാണ് സെൻസെക്സും നിഫ്റ്റിയും ഒറ്റയക്കത്തിലേക്ക് ചുരുങ്ങിയത്.
എസ് ആൻഡ് പി500 സൂചിക 18 ശതമാനവും ഉയർന്നിട്ടുണ്ട്.
നിക്ഷേപക സമ്പത്ത്
2023ലെ മുഹൂർത്ത വ്യാപാരത്തിൽ നിന്ന് 2024ലെ മുഹൂർത്ത വ്യാപാരത്തിലേക്ക് എത്തിയപ്പോൾ നിക്ഷേപകരുടെ സമ്പത്ത് അഥവാ ബിഎസ്ഇയിലെ കമ്പനികളുടെ സംയോജിത വിപണിമൂല്യം 144.44 ലക്ഷം കോടി രൂപ വർധിച്ച് 466.92 ലക്ഷം കോടി രൂപയായിരുന്നു. എന്നാൽ, കഴിഞ്ഞ ഒരുവർഷത്തിനിടെ വർധന 18.82 ലക്ഷം കോടി രൂപ മാത്രമാണ്.
കഴിഞ്ഞ വ്യാപാരാന്ത്യ പ്രകാരം മൂല്യം 448.10 ലക്ഷം കോടി രൂപ.
ജിഎസ്ടി ഇളവ്, ഉത്സവകാലം, ഇന്ത്യ-യുഎസ് വ്യാപാരക്കരാർ ചർച്ച, ഇന്ത്യ-യൂറോപ്യൻ യൂണിയൻ വ്യാപാരക്കരാർ ചർച്ച, കുറയുന്ന ക്രൂഡ് ഓയിൽ വില, മധ്യേഷ്യ വീണ്ടും സമാധാനത്തിലേക്ക് മടങ്ങിയത്, യുക്രെയ്ൻ-റഷ്യ യുദ്ധം അവസാനിപ്പിക്കാനുള്ള ശ്രമങ്ങൾ എന്നിങ്ങനെ പോസിറ്റീവ് ഘടകങ്ങൾ മുന്നിലുണ്ടെന്നത് ഇന്ത്യൻ ഓഹരി വിപണികൾക്ക് സംവത്-2082 വർഷത്തിൽ മികച്ച പ്രതീക്ഷകളാണ് നൽകുന്നത്.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്:
(Disclaimer: ഈ ലേഖനം ഓഹരി/കടപ്പത്രം/മ്യൂച്വൽഫണ്ട്/ക്രിപ്റ്റോകറൻസി മുതലായവ വാങ്ങാനോ വില്‍ക്കാനോ ഉള്ള നിര്‍ദേശമോ ഉപദേശമോ അല്ല. ഓഹരി/കടപ്പത്രം/മ്യൂച്വൽഫണ്ട് മുതലായ നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്.
നിക്ഷേപം നടത്തുന്നതിന് മുമ്പ് നിങ്ങള്‍ സ്വയം പഠനങ്ങൾ നടത്തുകയോ ഒരു വിദഗ്ധന്റെ ഉപദേശം തേടുകയോ ചെയ്യുക) … FacebookTwitterWhatsAppTelegram
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
