‘ഭരണക്കട’ തുറക്കാനാവാതെ ട്രംപ്; സ്വർണവില പുത്തൻ റെക്കോർഡിൽ, കേരളത്തിൽ സ്വർണവും വെള്ളിയും ആവേശക്കുതിപ്പിൽ

കേരളത്തിൽ സ്വർണവില ചരിത്രത്തിലെ ഏറ്റവും ഉയരത്തിൽ. ഇന്ന് ഗ്രാമിന് 80 രൂപ വർധിച്ച് വില 10,945 രൂപയായി.

640 രൂപ മുന്നേറി 87,560 രൂപയിലാണ് പവൻ. ഈ മാസം ഒന്നിന് രേഖപ്പെടുത്തിയ ഗ്രാമിന് 10,930 രൂപയും പവന് 87,440 രൂപയുമെന്ന റെക്കോർഡ് കടപുഴകി.  ഇന്നലെ രാവിലെ ഗ്രാമിന് 60 രൂപയും പവന് 480 രൂപയും കുറഞ്ഞിരുന്നെങ്കിലും ഉച്ചയ്ക്ക് വീണ്ടും കൂടിയിരുന്നു.ഗ്രാമിന് 45 രൂപയും പവന് 360 രൂപയുമാണ് ഉച്ചയ്ക്ക് ഉയർന്നത്. 
ആവേശമായി ‘ഷട്ട്ഡൗൺ’
യുഎസിൽ അടിസ്ഥാന പലിശനിരക്ക് കുറയാനുള്ള സാധ്യതകൾ സ്വർണവിലയുടെ മുന്നേറ്റത്തിന് വഴിവച്ചിരുന്നു.

കഴിഞ്ഞദിവസം വില  രാജ്യാന്തര വിപണിയിൽ ഔൺസിന് 3,897 ഡോളർ എന്ന റെക്കോർഡിലുമെത്തി. വൈകാതെ ലാഭമെടുപ്പിനെ തുടർന്ന് വില താഴ്ന്നെങ്കിലും പിന്നാലെ, യുഎസിൽ ട്രംപ് ഗവൺമെന്റ് ‘ഷട്ട്ഡൗണിലേക്ക്’ നീങ്ങിയത് സ്വർണത്തിന് കൂടുതൽ ആവേശമായി.
∙ പ്രവർത്തനഫണ്ട് സംബന്ധിച്ച ബിൽ പാസാക്കാനാവാത്തതിനാൽ യുഎസിൽ ട്രംപ് നയിക്കുന്ന ഗവൺമെന്റ് അടച്ചുപൂട്ടലിലായി.

അവശ്യസേവനങ്ങളൊഴികെ മറ്റ് സർക്കാർ ഓഫിസുകളെല്ലാം പൂട്ടി.
∙ ഷട്ട്ഡൗൺ അടുത്തയാഴ്ചയിലേക്കും നീങ്ങുമെന്നത് യുഎസിൽ കടുത്ത പ്രതിസന്ധിയാണ് സൃഷ്ടിക്കുന്നത്. ഇതു ഡോളറിനും ബോണ്ടിനും തിരിച്ചടിയാകുന്നത് സ്വർണത്തിന് നേട്ടവുമാകുന്നു.
രാജ്യാന്തര വില നിലവിൽ ഔൺസിന് 42 ഡോളർ തിരിച്ചുകയറി 3,886 ഡോളറിലെത്തി.

ഒരുഘട്ടത്തില്‌ വില 3,890 ഡോളറിലും എത്തിയിരുന്നു. ഇന്ത്യൻ രൂപ ഇന്നലെ ഡോളറിനെതിരെ 7 പൈസ താഴ്ന്ന് 88.78ൽ എത്തിയതും ആഭ്യന്തര സ്വർണവില വർധനയുടെ ആക്കംകൂട്ടി.

സെപ്റ്റംബർ 30ന് കുറിച്ച 88.80 ആണ് രൂപയുടെ എക്കാലത്തെയും താഴ്ന്ന മൂല്യം.
18 കാരറ്റും വെള്ളിയും
സംസ്ഥാനത്ത് ഇന്ന് 18 കാരറ്റ് സ്വർണവില ഗ്രാമിന് 65 രൂപ വർധിച്ച് റെക്കോർഡ് 9,065 രൂപയിലെത്തി. വെള്ളിവിലയും കത്തിക്കയറുകയാണ്.

ഗ്രാമിന് 2 രൂപ ഉയർന്ന് സർവകാല ഉയരമായ 160 രൂപയിലാണ് ഇന്നു വ്യാപാരം. 
∙ കേരളത്തിൽ മറ്റൊരുവിഭാഗം ജ്വല്ലറികൾ 18 കാരറ്റ് സ്വർണത്തിന് നൽകിയ വില ഗ്രാമിന് 60 രൂപ ഉയർത്തി 9,000 രൂപയാണ്. 
∙ വെള്ളിവില ഇവർ 156 രൂപയിൽ നിലനിർത്തുകയും ചെയ്തു. 
∙ 14 കാരറ്റ് സ്വർണവില ഗ്രാമിന് 7,000 രൂപയും 9 കാരറ്റിനുവില വില 4,520 രൂപയുമാണ്.
ബിസിനസ്, ഇക്കണോമി, സ്റ്റോക്ക് മാർക്കറ്റ്, പഴ്സനൽ ഫിനാൻസ്, കമ്മോഡിറ്റി, സമ്പാദ്യം വാർത്തകൾക്ക്:
… FacebookTwitterWhatsAppTelegram