ചപ്പാരപ്പടവ് പഞ്ചായത്തിൽ മഞ്ഞപ്പിത്തം: പ്രതിരോധ നടപടികൾ തുടങ്ങി

ചപ്പാരപ്പടവ്∙ പഞ്ചായത്തിൽ ചില സ്കൂളുകളിലും വിവിധ വാർഡുകളിലും മഞ്ഞപ്പിത്തം റിപ്പോർട്ട് ചെയ്ത സാഹചര്യത്തിൽ പ്രതിരോധ പ്രവർത്തനങ്ങൾക്ക് ചപ്പാരപ്പടവിൽ ചേർന്ന ജനകീയ കൂട്ടായ്മ സമഗ്രമായ മാർഗരേഖ തയാറാക്കി. ഭക്ഷണ, പാനീയ വിതരണത്തിന്  കർശന നിയന്ത്രണം ഏർപ്പെടുത്താൻ യോഗം തീരുമാനിച്ചു.

ആഘോഷങ്ങളുമായി ബന്ധപ്പെട്ടു വിതരണം ചെയ്യുന്ന പാനീയങ്ങൾ ചൂടുള്ളതാകണം. വിവാഹങ്ങൾക്കും മറ്റു ചടങ്ങുകൾക്കും  ചൂടുള്ളതൊഴികെയുള്ള വെൽകം ഡ്രിങ്ക്സ്  ഇനി ഒരറിയിപ്പുണ്ടാകുന്നതു വരെ വിതരണം ചെയ്യാൻ പാടില്ല. സദ്യകളിൽ വെള്ളത്തിന്റെ സ്രോതസ്സ് മുൻകൂട്ടി ആരോഗ്യ വകുപ്പിനെ അറിയിക്കണം.

ഹെൽത്ത് കാർഡില്ലാത്ത മുഴുവൻ ജീവനക്കാരും രണ്ടാഴ്ചക്കുളളിൽ മെഡിക്കൽ ഫിറ്റ്നസ് ഹാജരാക്കണം.
സ്ഥാപനങ്ങൾക്ക് ആരോഗ്യ പ്രവർത്തകർ മുഖേന ശേഖരിക്കുന്ന വാട്ടർ സാംപിൾ റിസൽറ്റ് മാത്രമേ സ്വീകരിക്കുകയുള്ളൂ. ഭക്ഷണ വിതരണം നടക്കുന്ന ചടങ്ങുകൾ 20 ദിവസം മുൻപ് അധികൃതരെ അറിയിക്കണം. രോഗാണു ശരീരത്തിൽ പ്രവേശിച്ചാൽ രോഗലക്ഷണങ്ങൾ പുറത്ത് വരാൻ ഒന്നര മാസം വരെ എടുക്കാം.

ഈ കാലയളവിൽ രോഗലക്ഷണങ്ങൾ പ്രകടമാകാത്ത വ്യക്തിക്ക് മറ്റുള്ളവരിലേക്ക് രോഗം പരത്താൻ കഴിയുമെന്നതിനാൽ രോഗിയും രോഗിയുമായി അടുത്ത് ഇടപഴകിയവരും  ആഘോഷ പരിപാടികളിൽ ഭക്ഷണം കൈകാര്യം ചെയ്യുന്നതും ആളുകൾ ഒത്തുചേരുന്ന ചടങ്ങുകളിൽ പങ്കെടുക്കുന്നതും ഒഴിവാക്കി രോഗപ്പകർച്ച തടയാൻ തയാറാകണം. 
സ്കൂളുകളിൽ കുട്ടികൾ ഭക്ഷണവും വെള്ളവും പങ്കുവയ്ക്കാൻ പാടില്ല. കേവലം ചൂടുള്ള വെള്ളമല്ല, തിളപ്പിച്ചാറിയ വെള്ളമാണ് കുടിക്കേണ്ടത്.

സ്കൂൾ കുട്ടികളിലെ രോഗ വിവരങ്ങൾ നിശ്ചയിക്കപ്പെട്ട അധ്യാപകർ ആരോഗ്യ പ്രവർത്തകരെ അപ്പപ്പോൾ അറിയിക്കണം.  വാർഡ് സാനിറ്റേഷൻ കമ്മിറ്റികളുടെ നേതൃത്വത്തിൽ എല്ലാ വാർഡുകളിലും വിപുലമായ യോഗങ്ങൾ അടിയന്തരമായി ചേരണം.

മുഴുവൻ സ്കൂളുകളിലും പിടിഎയുടെ വിപുലമായ  സ്പെഷൽ മീറ്റിങ്ങുകൾ ചേരും. 
മുഴുവൻ അങ്കണവാടികളും വായനശാലകളും ആരോഗ്യ ബോധവൽക്കരണ സംഗമങ്ങൾ വിളിച്ചു ചേർക്കും.  എല്ലാ തിങ്കളാഴ്ചകളിലും ചപ്പാരപ്പടവ് കുടുംബാരോഗ്യ കേന്ദ്രത്തിൽ ആരോഗ്യ വകുപ്പ് അവലോകന യോഗങ്ങൾ നടത്തും. വാർഡുകളിൽ ക്ലോറിനേഷൻ ക്യാംപെയ്ൻ ആരംഭിച്ചു.

കുടുംബശ്രീ–ആരോഗ്യ വൊളന്റിയർമാരുടെ കൂട്ടായ്മ ‘ആരോഗ്യ ശ്രീ’ ഉടൻ പ്രവർത്തനമാരംഭിക്കും. ഒക്ടോബർ 5  സന്ദേശ ദിനമായി ആചരിക്കും.

സ്കൂളുകളിൽ മഞ്ഞപ്പിത്തം സംബന്ധിച്ച ക്വിസ് മത്സരങ്ങൾ സംഘടിപ്പിക്കും. മൈക്ക് അനൗൺസ്‌മെന്റും കോർണർ യോഗങ്ങളും സംഘടിപ്പിക്കും.

ഫിൽറ്റർ ഉപയോഗം ഫലപ്രദമാക്കണം. 
മുഴുവൻ വ്യാപാര സ്ഥാപനങ്ങളിലും നിർദേശങ്ങൾ പാലിക്കപ്പെടുന്നുണ്ടെന്ന് വ്യാപാരി വ്യവസായി സംഘടനകൾ ഉറപ്പുവരുത്തണം. ജനകീയ കൂട്ടായ്മ പഞ്ചായത്ത് പ്രസിഡന്റ് സുനിജ ബാലകൃഷ്ണൻ ഉദ്ഘാടനം ചെയ്തു.

പഞ്ചായത്ത് വൈസ് പ്രസിഡന്റ് പി.കെ.അബ്ദുറഹ്മാൻ അധ്യക്ഷത വഹിച്ചു.  ജില്ലാ ഡപ്യൂട്ടി  മെഡിക്കൽ ഓഫിസർ ഡോ.കെ.സി.സച്ചിൻ, ടെക്നിക്കൽ അസിസ്റ്റന്റുമാരായ എം.ബി മുരളി, സി.പി.സലീം, ആരോഗ്യ–വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ തങ്കമ്മ സണ്ണി, പി.ഫസീല ഷംസീർ, എം.മൈമൂനത്ത്, പി.കെ.ഉനൈസ്, മെഡിക്കൽ ഓഫിസർ ഡോ.കെ.സജീർ, എം.പി. അഹമ്മദ് എന്നിവർ പ്രസംഗിച്ചു.

… FacebookTwitterWhatsAppTelegram