കെഎസ്ആർടിസി ബസിന്റെ ചവിട്ടുപടിയിൽനിന്ന് ഓർമ പുതുക്കി മോഹൻലാൽ; ഗണേഷ് കുമാറിനും അഭിനന്ദനം

തിരുവനന്തപുരം ∙ മന്ത്രിയെന്ന നിലയിൽ കെഎസ്ആർടിസിയെ നവീകരിക്കാൻ കെ.ബി. ഗണേഷ് കുമാർ ഒരുപാട് നല്ല കാര്യങ്ങൾ ചെയ്യുന്നുണ്ടെന്ന് നടൻ മോഹൻലാൽ.

തിരുവനന്തപുരത്ത് കെഎസ്ആർടിസി ഓർമയാത്രയിൽ പങ്കെടുക്കുകയായിരുന്നു അദ്ദേഹം. കോളജ് പഠന കാലത്ത് ബസിന്റെ ചവിട്ടുപടിയിൽനിന്നാണ് മിക്കവാറും യാത്ര ചെയ്തിരുന്നത്.

അതിന്റെ ഓർമയെന്നോണം തിരുവനന്തപുരത്ത് പ്രത്യേകം സജ്ജമാക്കിയിരുന്ന ബസിന്റെ ചവിട്ടുപടിയിൽ ഗണേഷ് കുമാറും മോഹൻലാലും ഒരുമിച്ചുനിന്ന് അതിന്റെ ഓർമ പുതുക്കി.  കനകക്കുന്നിൽ വെള്ളിയാഴ്ച മുതൽ ഞായർവരെ നടക്കുന്ന കെഎസ്ആർടിസി ഓട്ടോ എക്സ്പോയുടെ വിളംബര യാത്രയായാണ് ഓർമയാത്ര സംഘടിപ്പിച്ചത്. വരും ദിവസ ങ്ങളിലും ഓർമയാത്ര തുടരും.
ആദ്യയാത്രയിൽ പ്രിയദർശനും മണിയൻ പിള്ള രാജുവും നന്ദുവും ഉൾപ്പെടെയുള്ളവർ ഗതാഗത മന്ത്രി ഗണേഷ് കുമാറിനൊപ്പം സഞ്ചരിച്ചു.

കെഎസ്ആർടിസിയുടെ നല്ലനാളെ ലക്ഷ്യമിടുന്ന റീബ്രാൻഡിങ്ങിന്റെ ഭാഗമായാണ് ഓർമയാത്ര. ‘ചെങ്ങളൂർ ജംക്‌ഷനിൽനിന്നു ഞാൻ കയറുന്ന അതേ കെഎസ്ആർടിസി ബസിൽ ഇന്നത്തെ സൂപ്പർസ്റ്റാർ മോഹൻലാൽ അന്ന് കയറുമായിരുന്നു.

ഞങ്ങളെല്ലാം ചവിട്ടുപടിയിൽ നിന്നായിരുന്നു യാത്ര’- കോളജിലേക്കുള്ള ബസ് യാത്ര സംവിധായകൻ പ്രിയദർശൻ ഓർമിച്ചെടുത്തത് ഇങ്ങനെയായിരുന്നു. …