ഒരുവർഷത്തിന് ശേഷമെത്തുന്ന ദുൽഖർ ചിത്രം, സംവിധായകൻ ജോഷിയുടെ മകൻ അഭിലാഷ് ജോഷി സംവിധാനം ചെയ്യുന്ന ആദ്യചിത്രം, നീണ്ട താരനിര, റിലീസിന് മുന്നേ തരംഗമായ പശ്ചാത്തലസംഗീതം തുടങ്ങി പ്രേക്ഷകരെ കാത്തിരിപ്പിക്കാൻ പോന്ന ഒരുപാട് ഘടകങ്ങളുണ്ടായിരുന്നു കിംഗ് ഓഫ് കൊത്തയ്ക്ക്. ആ കാത്തിരിപ്പിന് ഇപ്പോൾ അറുതിയായിരിക്കുന്നു. കൊത്തയുടെ രാജാവ് തന്റെ വരവ് രാജകീയമാക്കുകതന്നെ ചെയ്തിട്ടുണ്ട്.
ബ്രിട്ടീഷ് ഭരണകാലത്ത് മാലിന്യപ്പറമ്പായിരുന്ന ഒരിടം കൊത്ത എന്ന രക്തം പുരണ്ട നാടായി മാറുന്നതും ആ നാട്ടിലെ പിൻതലമുറകളും രക്തഗന്ധമുള്ള പാതയിലൂടെ ജീവിതം തള്ളിനീക്കാൻ നിർബന്ധിതരാവുന്നതുമാണ് അടിസ്ഥാനപരമായി കിംഗ് ഓഫ് കൊത്തയുടെ പ്രമേയം. തൊണ്ണൂറുകളുടെ മധ്യമാണ് കഥാപശ്ചാത്തലം. ഈ കാലഘട്ടത്തിന്റെ പശ്ചാത്തലത്തിൽ കുറേനാളുകൾക്ക് ശേഷം മലയാളത്തിൽ വന്ന ഗ്യാങ്സ്റ്റർ ഡ്രാമാ ചിത്രംകൂടിയാണ് കിംഗ് ഓഫ് കൊത്ത.
പോലീസ് വേഷത്തിലൂടെ കയ്യടക്കം നിറഞ്ഞ പ്രകടനവുമായി പ്രസന്നയും ഗോകുൽ സുരേഷ് മികച്ച പ്രകടനമാണ് കാഴ്ചവെച്ചത്. ഗോകുലിന്റെ ചില രംഗങ്ങൾ പലപ്പോഴും അച്ഛൻ സുരേഷ് ഗോപിയെ ഓർമിപ്പിക്കുന്നുണ്ട്. പ്രത്യേകിച്ച് ശബ്ദം, രൂപം, പോലീസ് യൂണിഫോം എന്നിവ ഒത്തുവരുമ്പോൾ. ശരൺ, സെന്തിൽ കൃഷ്ണ, രാജേഷ് ശർമ, ഗോവിന്ദ് കൃഷ്ണ, ടി.ജി. രവി, അനിഖ എന്നിവരും അവരവരുടെ ഭാഗങ്ങൾ മികച്ചതാക്കി. ജേക്സ് ബിജോയിയുടെ പശ്ചാത്തലസംഗീതവും രാജശേഖർ, മഹേഷ് മാത്യൂ എന്നിവർ ഒരുക്കിയ ആക്ഷൻ രംഗങ്ങളുമില്ലാതെ കിംഗ് ഓഫ് കൊത്ത പൂർണമാവില്ല. നിർണായക രംഗങ്ങളിലെല്ലാം ചിത്രത്തെ മറ്റൊരുതലത്തിലേക്ക് കൂട്ടിക്കൊണ്ടുപോവുന്നതിൽ ജേക്സ് ബിജോയിയുടെ പശ്ചാത്തലസംഗീതം വഹിക്കുന്ന പങ്ക് ചെറുതല്ല. കെ.ജി.എഫ് ചിത്രങ്ങളിൽ നായകനെ എലിവേറ്റ് ചെയ്തുനിർത്തുന്നതിൽ സംഗീതത്തിന് എത്ര പ്രാധാന്യമുണ്ടോ അതേരീതിയിലാണ് കിംഗ് ഓഫ് കൊത്തയിലെ പശ്ചാത്തലസംഗീതവും ജേക്സ് ഒരുക്കിയിരിക്കുന്നത്. നിമീഷ് രവിയുടെ ഛായാഗ്രഹണവും മികച്ചതായി.
ഒരു ഗ്യാങ്സ്റ്റർ ചിത്രം എന്നതിലുപരി സൗഹൃദത്തിന്റെ വിവിധ ഭാവങ്ങളാണ് കിംഗ് ഓഫ് കൊത്ത കാട്ടിത്തരുന്നത്. അതിന് മേമ്പൊടിയാവുന്നതാകട്ടെ രക്തവും സംഘർഷവുമാണെന്നുമാത്രം. മലയാളത്തിൽ ഏറെക്കാലത്തിനുശേഷം വന്ന മാസ് ഗ്യാങ്സ്റ്റർ ആക്ഷൻ ത്രില്ലർ കൂടിയാണ് കിംഗ് ഓഫ് കൊത്ത. നായകന്റെ രാജകീയമായ ആട്ടം കാണാൻ ടിക്കറ്റെടുക്കാം കിംഗ് ഓഫ് കൊത്തയ്ക്ക്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
