രാജ്യത്തെ മുൻനിര ബാങ്കായ എച്ച്ഡിഎഫ്സി ആദ്യമായി ഓഹരി ഉടമകൾക്ക് 1:1 ബോണസ് ഓഹരികൾ പ്രഖ്യാപിച്ചു. ഇത് സംബന്ധിച്ച് എച്ച്ഡിഎഫ്സി ബാങ്കിന്റെ ബോർഡ് യോഗത്തിൽ തീരുമാനമായി.
എച്ച്ഡിഎഫ്സി ബാങ്ക് ആദ്യമായിട്ടാണ് നിക്ഷേപകർക്ക് ബോണസ് ഓഹരികൾ നൽകുന്നത്. ഇതനുസരിച്ച് നിലവിലുള്ള ഒരു ഓഹരിക്ക് ഒരു ബോണസ് ഓഹരി വീതം ലഭിക്കും.
ബോണസ് ഓഹരികൾക്കു പുറമേ ഓഹരി ഉടമകൾക്ക് നടപ്പു സാമ്പത്തിക വർഷം ഓഹരിയൊന്നിന് 5 രൂപ പ്രത്യേക ഇടക്കാല ലാഭവിഹിതം നൽകുന്നതിനും ബോർഡ് തീരുമാനിച്ചു.
ബോണസ് ഓഹരികളും പ്രത്യേക ലാഭവിഹിതവും ലഭിക്കുന്നതിനുള്ള അർഹത നിർണയിക്കുന്ന റെക്കോർഡ് തിയതി ഓഗസ്റ്റ് 27 ആണ്. ഈ തിയതിയ്ക്ക് മുമ്പ് ഓഹരിയുടമകളായവർക്ക് ബോണസിന് അർഹതയുണ്ട്.
സെപ്റ്റംബർ 18നു മുമ്പ് ബോണസ് ലഭ്യമാകും.
ഇന്ന് നടന്ന ബോർഡ് യോഗത്തിന് ശേഷം നടപ്പ് സാമ്പത്തിക വർഷത്തെ ആദ്യ ത്രൈമാസത്തിലെ പ്രവർത്തന ഫലം പ്രഖ്യാപിച്ചു. ഇതനുസരിച്ച് ബാങ്കിന്റെ ലാഭം 12.2 ശതമാനം ഉയർന്ന് 18,155 കോടി രൂപയായി.
ബാങ്കിന്റെ അറ്റ പലിശ വരുമാനം അവലോകന കാലയളവിൽ 5.4 ശതമാനം ഉയർന്ന് 31438 കോടി രൂപയായപ്പോൾ, അറ്റ പലിശ മാർജിൻ 3.46 ശതമാനത്തിൽ നിന്ന് 3.35 ശതമാനമായി താഴ്ന്നിട്ടുണ്ട്. ബാങ്കിന്റെ ഉപകമ്പനിയായ എച്ച്ഡിബി ഫിനാൻഷ്യലിന്റെ ഐപിഒ വേളയിൽ ഓഫർ ഫോർ സെയിലിലൂടെ 9,128 കോടി രൂപയുടെ നേട്ടമുണ്ടാക്കി.
1956 രൂപയാണ് ഇന്നലെ വ്യാപാരം അവസാനിച്ചപ്പോൾ എച്ച്ഡിഎഫ്സി ബാങ്കിന്റെ ഓഹരി വില
2019ലും 2011ലും എച്ച്ഡിഎഫ്സി ബാങ്ക് ഓഹരി വിഭജനം നടത്തിയിരുന്നുവെങ്കിലും ബോണസ് ഓഹരി നൽകുന്നത് ആദ്യമായാണ്. കഴിഞ്ഞ ആറു മാസക്കാലയളവിൽ എച്ച്ഡിഎഫ്സി ബാങ്ക് ഓഹരി വില 21 ശതമാനമാണ് ഉയർന്നത്.
…
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
