കായക്കൊടി എള്ളിക്കാംപാറയിൽ ശബ്ദം, കുലുക്കം; ഭൂചലനം?

കായക്കൊടി∙ പഞ്ചായത്തിലെ എള്ളിക്കാംപാറയിൽ ഭൂചലനമെന്നു സംശയം. നാട്ടുകാർ പരിഭ്രാന്തിയിൽ. പഞ്ചായത്തിലെ 4,5 വാർഡുകളിൽ ഉൾപ്പെടുന്ന പ്രദേശത്താണ് 2 ദിവസമായി ഭൂചലനം അനുഭവപ്പെടുന്നതായി നാട്ടുകാർ പറയുന്നത്. കഴിഞ്ഞ ദിവസം രാവിലെ 7.15നും ഇന്നലെ രാത്രി എട്ടിനും ആണ് ചെറുതായി ഭൂചലനം അനുഭവപ്പെട്ടത്. ഇന്നലെ രാത്രി കുറച്ചു കൂടി ശക്തിയിലാണ് ഭൂചലനം അനുഭവപ്പെട്ടത്.

സെക്കൻഡുകൾ മാത്രം നീണ്ട ഭൂചലനത്തെ തുടർന്ന് അന്തരീക്ഷത്തിൽ ഒരു പ്രത്യേക ശബ്ദം അനുഭവപ്പെട്ടതായും നാട്ടുകാർ പറയുന്നു. ശബ്ദത്തെ തുടർന്ന് പരിഭ്രാന്തരായ ജനം വീടുവിട്ട് പുറത്തിറങ്ങി. കടയുടെ ഗ്രില്ല് കുലുങ്ങുകയും ടെറസ് വീടുകൾക്ക് മുകളിൽ എന്തോ പതിക്കുന്നതു പോലെയുള്ള ശബ്ദം അനുഭവപ്പെടുകയും ചെയ്തതായി നാട്ടുകാർ പറഞ്ഞു.

തുടർന്ന് പഞ്ചായത്ത് അധികൃതർ ഇ.കെ.വിജയൻ എംഎൽഎയെ ബന്ധപ്പെട്ടു. അദ്ദേഹം കലക്ടറുമായി സംസാരിച്ചു. ഇന്നു രാവിലെ വിദഗ്ധ സംഘത്തെ പ്രദേശത്തേക്ക് അയയ്ക്കുമെന്ന് കലക്ടർ അറിയിച്ചു. എള്ളിക്കാംപാറ, കാവിന്റടുത്ത്, പുന്നത്തോട്ടം, കരിമ്പാലക്കണ്ടി, പാലോളി തുടങ്ങി ഒന്നര കിലോമീറ്റർ ചുറ്റളവിലാണ് ഭൂചലനം അനുഭവപ്പെട്ടത്.