മെൽബൺ∙ ഓസ്ട്രേലിയയ്‌ക്കെതിരായ ടെസ്റ്റ് പരമ്പരയ്ക്കു മുന്നോടിയായി മത്സരപരിചയം ലക്ഷ്യമിട്ട് ഓസ്ട്രേലിയ എ ടീമിനെതിരെ കളിക്കുന്ന ഇന്ത്യ എ ടീമിന്റെ ഭാഗമായി കളിക്കാനിറങ്ങിയ കെ.എൽ. രാഹുലിന്, ഓസ്ട്രേലിയൻ മണ്ണിലും രക്ഷയില്ല! ഓസ്ട്രേലിയ എയ്‌ക്കെതിരായ രണ്ടാം അനൗദ്യോഗിക ടെസ്റ്റിൽ ഓപ്പണറായി എത്തിയ കെ.എൽ. രാഹുൽ, നാലു പന്തിൽ ഒരു ഫോർ സഹിതം നാലു റൺസുമായി പുറത്ത്. രാഹുലിനു പുറമേ സഹ ഓപ്പണർ അഭിമന്യു ഈശ്വരൻ (0), സായ് സുദർശൻ (0), ക്യാപ്റ്റൻ ഋതുരാജ് ഗെയ്ക്വാദ് (4) എന്നിവരും നിരാശപ്പെടുത്തിയതോടെ, മെൽബൺ ക്രിക്കറ്റ് ഗ്രൗണ്ടിൽ നടക്കുന്ന മത്സരത്തിൽ ഇന്ത്യയ്ക്ക് ആദ്യ നാലു വിക്കറ്റുകൾ നഷ്ടമായത് വെറും 11 റൺസിനിടെ!
18 ഓവർ പൂർത്തിയാകുമ്പോൾ നാലു വിക്കറ്റ് നഷ്ടത്തിൽ 48 റൺസ് എന്ന നിലയിലാണ് ഇന്ത്യ. ദേവ്ദത്ത് പടിക്കൽ (17), ധ്രുവ് ജുറേൽ (18) എന്നിവർ ക്രീസിൽ. പിരിയാത്ത അഞ്ചാം വിക്കറ്റിൽ ഇരുവരും ഇതുവരെ 37 റൺസ് കൂട്ടിച്ചേർത്തിട്ടുണ്ട്. ഇതുവരെ 41 പന്തുകൾ നേരിട്ട പടിക്കൽ മൂന്നു ഫോറുകളോടെയാണ് 17 റൺസെടുത്തത്. ജുറേലാകട്ടെ, 54 പന്തിൽ ഒരേയൊരു ഫോർ സഹിതം 18 റൺസുമെടുത്തു.
ഓപ്പണർ അഭിമന്യു ഈശ്വരൻ വെറും മൂന്നു പന്തു മാത്രം നേരിട്ടാണ് ഡക്കിന് പുറത്തായത്. സായ് സുദർശൻ ഗോൾഡൻ ഡക്കായി. ഗെയ്ക്വാദ് ആറു പന്തിൽ ഒരു ഫോർ സഹിതം നാലു റൺസെടുത്തും കൂടാരം കയറി. മൈക്കൽ നെസർ ബോൾ ചെയ്ത ആദ്യ ഓവറിൽ അക്കൗണ്ട് തുറക്കും മുൻപേ ഇന്ത്യയ്ക്ക് രണ്ട് വിക്കറ്റ് നഷ്ടമായിരുന്നു. ഈശ്വരൻ, സായ് സുദർശൻ എന്നിവരാണ് പുറത്തായത്. പിന്നാലെയെത്തിയ ക്യാപ്റ്റൻ ഗെയ്ക്വാദ് ബൗണ്ടറിയോടെ തുടക്കമിട്ടെങ്കിലും അധികം ആയുസുണ്ടായില്ല.
ആറ് ഓവറിൽ ഒരു മെയ്ഡൻ സഹിതം 16 റൺസ് വഴങ്ങി മൂന്നു വിക്കറ്റെടുത്ത മൈക്കൽ നെസറാണ് ഇന്ത്യയുടെ ടോപ് ഓർഡറിനെ തകർത്തത്. അഭിമന്യു ഈശ്വരൻ, സായ് സുദർശൻ, ഗെയ്ക്വാദ് എന്നിവർ നെസറിനു മുന്നിലാണ് വീണത്. കെ.എൽ. രാഹുലിനെ സ്കോട്ട് ബോളണ്ടും പുറത്താക്കി.
ആദ്യ മത്സരത്തിൽ കളിച്ച ഇന്ത്യ എ ടീമിൽ നാല് മാറ്റങ്ങളുണ്ട്. ബാബ ഇന്ദ്രജിത്ത്, ഇഷാൻ കിഷൻ, മാനവ് സുതർ, നവ്ദീപ് സെയ്നി എന്നിവർക്കു പകരം കെ.എൽ. രാഹുൽ, ധ്രുവ് ജുറേൽ, തനുഷ് കൊട്ടിയൻ, ഖലീൽ അഹമ്മദ് എന്നിവർ ടീമിലെത്തി. ആദ്യ അനൗദ്യോഗിക ടെസ്റ്റിൽ ഇന്ത്യ ഓസ്ട്രേലിയയോട് ഏഴു വിക്കറ്റിനു തോറ്റിരുന്നു.
English Summary:
Australia A vs India A, 2nd unofficial Test, Day 1 – Live Cricket Score
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
