അഹമ്മദാബാദ്: ഇന്ത്യന്‍ പ്രീമിയര്‍ ലീഗില്‍ മുംബൈ ഇന്ത്യന്‍സിന് തുടര്‍ച്ചയായ രണ്ടാം തോല്‍വി. ഗുജറാത്ത് ടൈറ്റന്‍സിനെതിരായ മത്സരത്തില്‍ 36 റണ്‍സിനാണ് മുംബൈ പരാജയപ്പെട്ടത്. അഹമ്മദാബാദ് നരേന്ദ്ര മോദി സ്‌റ്റേഡിയത്തില്‍ 197 റണ്‍സ് വിജയലക്ഷ്യം പിന്തുടര്‍ന്ന മുംബൈക്ക് ആറ് വിക്കറ്റ് നഷ്ടത്തില്‍ 160 റണ്‍സെടുക്കാനാണ് സാധിച്ചത്. 28 പന്തില്‍ 48 റണ്‍സെടുത്ത സൂര്യകുമാര്‍ യാദവാണ് മുംബൈയുടെ ടോപ് സ്‌കോറര്‍. ഗുജറാത്തിന് വേണ്ടി പ്രസിദ്ധ് കൃഷ്ണ, മുഹമ്മദ് സിറാജ് എന്നിവര്‍ രണ്ട് വിക്കറ്റ് വീതം വീഴ്ത്തി. നേരത്തെ, ടോസ് നഷ്ടപ്പെട്ട് ബാറ്റിംഗിനെത്തിയ ഗുജറാത്തിനെ സായ് സുദര്‍ശന്റെ (41 പന്തില്‍ 63) ഇന്നിംഗ്‌സാണ് ഭേദപ്പെട്ട സ്‌കോറിലേക്ക് നയിച്ചത്. ശുഭ്മാന്‍ ഗില്‍ (38), ജോസ് ബട്‌ലര്‍ (39) എന്നിവരും മികച്ച പ്രകടനം പുറത്തെടുത്തു.
തകര്‍ച്ചയോടെയായിരുന്നു മുംബൈയുടെ തുടക്കം. സ്‌കോര്‍ബോര്‍ഡില്‍ 35 റണ്‍സ് മാത്രമുള്ളപ്പോള്‍ രോഹിത് ശര്‍മ (8), റ്യാന്‍ റിക്കിള്ട്ടണ് (6) എന്നിവരുടെ വിക്കറ്റുകള്‍ മുംബൈക്ക് നഷ്ടമായി. മുഹമ്മദ് സിറാജിന്റെ പന്തില്‍ ബൗള്‍ഡാവുകയായിരുന്നു ഇരുവരും. തുടര്‍ന്നെത്തിയ തിലക് വര്‍മ (39), സൂര്യക്കൊപ്പം ചേര്‍ന്ന് 63 റണ്‍സ് കൂട്ടിചേര്‍ത്തു. എന്നാല്‍ 12-ാം ഓവറില്‍ പ്രസിദ്ധ് കൃഷ്ണ മുംബൈക്ക് ബ്രേക്ക് ത്രൂ നല്‍കി. തിലക് പുറത്ത്. പിന്നീടെത്തിയ റോബിന്‍ മിന്‍സ് (3), ഹാര്‍ദിക് പാണ്ഡ്യ (11) എന്നിവര്‍ക്ക് തിളങ്ങാനായില്ല. ഇതിനിടെ സൂര്യയും മടങ്ങി. 28 പന്തുകള്‍ നേരിട്ട താരം നാല് സിക്‌സും ഒരു ഫോറും നേടി. നമന്‍ ദിര്‍ (18), മിച്ചല്‍ സാന്റ്‌നര്‍ (18) പുറത്താവാതെ നിന്നു.
മികച്ച തുടക്കമായിരുന്നു ഗുജറാത്തിന്. ഒന്നാം വിക്കറ്റില്‍ ഗില്‍ – സായ് സഖ്യം 78 റണ്‍സ് ചേര്‍ത്തു. ഒമ്പതാം ഓവറിലാണ് കൂട്ടുകെട്ട് പൊളിയുന്നത്. ഗില്ലിനെ ഹാര്‍ദിക് പുറത്താക്കി. തുടര്‍ന്നെത്തിയ ബട്‌ലറും നിര്‍ണായക സംഭാവന നല്‍കി. സുദര്‍നൊപ്പം ചേര്‍ന്ന് 51 റണ്‍സാണ് ബട്‌ലര്‍ കൂട്ടിചേര്‍ത്തത്. മുജീബ് ഉര്‍ റഹ്മാന്റെ പന്തില്‍ റിക്കിള്ട്ടണ് ക്യാച്ച് നല്‍കിയാണ് ബട്‌ലര്‍ മടങ്ങുന്നത്. ഷാരുഖ് ഖാന്‍ (9), ഷെഫാനെ റുതര്‍ഫോര്‍ഡ് (18), രാഹുല്‍ തെവാട്ടിയ (0), റാഷിദ് ഖാന്‍ (6) എന്നിവര്‍ക്ക് തിളങ്ങാനായില്ല. ഇതിനിടെ സുദര്‍ശന്‍ പുറത്തായതും ഗുജറാത്തിന് തിരിച്ചടിയായി. 41 പന്തുകള്‍ നേരിട്ട താരം രണ്ട് സിക്‌സും നാല് ഫോറും നേടി.
ഭുവനേശ്വറിന് പരിക്കുകളില്ല! ചെന്നൈക്കെതിരെ കളിക്കുമോ ഇല്ലെയോ എന്നുള്ള സൂചന നല്‍കി കാര്‍ത്തിക്
ഗുജറാത്ത് ടൈറ്റന്‍സ്: ശുഭ്മാന്‍ ഗില്‍ (ക്യാപ്റ്റന്‍), സായ് സുദര്‍ശന്‍, ജോസ് ബട്ട്ലര്‍ (വിക്കറ്റ് കീപ്പര്‍), ഷെര്‍ഫാന്‍ റൂഥര്‍ഫോര്‍ഡ്, ഷാരൂഖ് ഖാന്‍, രാഹുല്‍ ടെവാതിയ, റാഷിദ് ഖാന്‍, രവിശ്രീനിവാസന്‍ സായ് കിഷോര്‍, കാഗിസോ റബാഡ, മുഹമ്മദ് സിറാജ്, പ്രസീദ് കൃഷ്ണ.
മുംബൈ ഇന്ത്യന്‍സ്: രോഹിത് ശര്‍മ്മ, റയാന്‍ റിക്കിള്‍ടണ്‍ (വിക്കറ്റ് കീപ്പര്‍), സൂര്യകുമാര്‍ യാദവ്, തിലക് വര്‍മ്മ, ഹാര്‍ദിക് പാണ്ഡ്യ (ക്യാപ്റ്റന്‍), നമാന്‍ ധിര്‍, മിച്ചല്‍ സാന്റ്‌നര്‍, ദീപക് ചാഹര്‍, ട്രെന്റ് ബോള്‍ട്ട്, മുജീബ് ഉര്‍ റഹ്മാന്‍, സത്യനാരായണ രാജു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
