യൂണിട്രീയുടെ പുതിയ റോബോട്ട്; അത്ഭുതപ്പെടുത്തുന്ന സവിശേഷതകളുമായി സൂപ്പർ അത്‌ലറ്റ് AS2-W വിപണിയിലേക്ക്

റോബോട്ടിക്സ് സാങ്കേതികവിദ്യയിൽ വിപ്ലവകരമായ മാറ്റങ്ങളുമായി ചൈനീസ് നിർമാതാക്കളായ യൂണിട്രീ (Unitree) വീണ്ടും രംഗത്ത്. സാധാരണ മനുഷ്യർക്കും വാഹനങ്ങൾക്കും എത്തിച്ചേരാൻ ദുഷ്കരമായ മേഖലകളിൽ പോലും അനായാസം സഞ്ചരിക്കാൻ സാധിക്കുന്ന നൂതന നാല് കാലുകളുള്ള റോബോട്ടിനെയാണ് കമ്പനി അവതരിപ്പിച്ചിരിക്കുന്നത്.

യൂണിട്രീ സൂപ്പർ അത്‌ലറ്റ് AS2-W എന്ന് നാമകരണം ചെയ്തിട്ടുള്ള ഈ ഉപകരണം, ഇതുവരെ പുറത്തിറക്കപ്പെട്ടതിൽവെച്ച് ഏറ്റവും ശേഷിയുള്ള ക്വാഡ്രുപെഡ് റോബോട്ടുകളിൽ ഒന്നായാണ് വിലയിരുത്തപ്പെടുന്നത്. സമൂഹമാധ്യമമായ എക്സിൽ പങ്കുവെച്ച ദൃശ്യങ്ങളിലൂടെയാണ് കമ്പനി ഈ പുതിയ ഉൽപ്പന്നത്തെ ലോകത്തിന് പരിചയപ്പെടുത്തിയത്.

കുത്തനെയുള്ള പാറക്കെട്ടുകൾ കയറുന്നതും, ചെറിയ അരുവികൾ മുറിച്ചുകടക്കുന്നതും, നിമിഷനേരം കൊണ്ട് ദിശ മാറ്റുന്നതും, ഫ്ലിപ്പുകൾ അവതരിപ്പിക്കുന്നതുമെല്ലാം ഈ വീഡിയോയിൽ വ്യക്തമായി കാണാൻ സാധിക്കും. ഇതിനിടയിൽ ഒരു ബാക്ക്പാക്ക് വഹിച്ചുകൊണ്ടാണ് റോബോട്ടിന്റെ പ്രയാണം.

റീഇൻഫോഴ്സ്മെന്റ് ലേണിങ് സാങ്കേതികവിദ്യയുടെ സഹായത്തോടെയാണ് ഇതിന്റെ ചലനങ്ങൾ നിയന്ത്രിക്കപ്പെടുന്നത്. ഇതിലൂടെ വിവിധ തരത്തിലുള്ള സങ്കീർണ്ണ സാഹചര്യങ്ങളുമായി തത്സമയം പൊരുത്തപ്പെടാൻ ഈ യന്ത്രത്തിന് സാധിക്കുന്നു.

മുൻപ് പുറത്തിറക്കിയ റോബോട്ടിക് നായകളോട് സാദൃശ്യം തോന്നുമെങ്കിലും തികച്ചും വ്യത്യസ്തമായ രൂപകൽപ്പനയാണ് AS2-W സ്വീകരിച്ചിരിക്കുന്നത്. കാലുകൾക്കൊപ്പം ചക്രങ്ങൾ കൂടി ഉൾപ്പെടുത്തി തയ്യാറാക്കിയ ഹൈബ്രിഡ് സംവിധാനമാ ഇതിലുള്ളത്.

നിരപ്പായ പ്രതലത്തിലൂടെ അതിവേഗം സഞ്ചരിക്കാനും, അതേസമയം പരുക്കൻ പാറക്കെട്ടുകളും കയറ്റങ്ങളും കാലുകളുടെ സഹായത്തോടെ അനായാസം മറികടക്കാനും ഇതിലൂടെ കഴിയുന്നു. പതിനാറ് കിലോഗ്രാം വരെ തുടർച്ചയായി ഭാരം വഹിക്കാനുള്ള ശേഷി ഈ റോബോട്ടിനുണ്ട്.

ബാറ്ററിയടക്കം ഏകദേശം 18 കിലോഗ്രാമാണ് ഇതിന്റെ മൊത്തത്തിലുള്ള ഭാരം. ഒറ്റ ചാർജിൽ 30 കിലോമീറ്ററിലധികം ദൂരം താണ്ടാനും സെക്കൻഡിൽ അഞ്ച് മീറ്ററിലധികം വേഗത കൈവരിക്കാനും സാധിക്കുമെന്ന് നിർമാതാക്കൾ അവകാശപ്പെടുന്നു.

25 സെന്റീമീറ്റർ ഉയരമുള്ള പടവുകൾ കയറാനും, 40 ഡിഗ്രി വരെയുള്ള ചരിവുകൾ താണ്ടാനും, 50 സെന്റീമീറ്റർ വരെ ഉയരമുള്ള തടസ്സങ്ങൾ തരണം ചെയ്യാനും ഇതിന് കഴിയും. 12 ഹൈ-പവർ ഡെൻസിറ്റി മോട്ടോറുകൾ, എട്ട് കോർ പ്രോസസർ, വൈഫൈ 6, ബ്ലൂടൂത്ത് 5.2 തുടങ്ങിയവയാണ് ഇതിന്റെ പ്രധാന സാങ്കേതിക അടിത്തറ.

കൂടാതെ ആധുനിക കൃത്രിമ ബുദ്ധി അധിഷ്ഠിതമായ സെൻസർ സംവിധാനങ്ങളും ഇതിൽ സജ്ജീകരിച്ചിട്ടുണ്ട്. ലിഡാർ, ഹൈ ഡെഫനിഷൻ ക്യാമറ, മൈക്രോഫോൺ, സ്പീക്കർ, യൂണിട്രീയുടെ ISS 3.0 ഇന്റലിജന്റ് ഫോളോ സിസ്റ്റം എന്നിവ ഇതിൽ ഘടിപ്പിക്കാൻ സാധിക്കും.

ഇത് വഴി കൂടുതൽ കൃത്യതയോടെ സ്ഥാനങ്ങൾ നിർണയിക്കാനും സ്വന്തമായി തീരുമാനങ്ങൾ കൈക്കൊള്ളാനും റോബോട്ടിന് സാധിക്കുന്നു. വ്യാവസായിക പരിശോധനകൾ, ചരക്ക് നീക്കം, രക്ഷാപ്രവർത്തനം, ഗവേഷണം, ഔട്ട്ഡോർ പര്യവേക്ഷണം തുടങ്ങിയ ലക്ഷ്യങ്ങളോടെയാണ് ഈ റോബോട്ട് രൂപകൽപ്പന ചെയ്തിട്ടുള്ളതെന്നാണ് ഔദ്യോഗിക വിശദീകരണം.

എങ്കിലും ഇതിന്റെ പ്രകടനക്ഷമത ഭാവിയിൽ സൈനിക ആവശ്യങ്ങൾക്കായി ഉപയോഗിക്കപ്പെടുമോ എന്ന ചർച്ചകൾക്കും തുടക്കമിട്ടിട്ടുണ്ട്. അപകടകരമായ മേഖലകളിൽ നിരീക്ഷണം നടത്താനും, അവശ്യ സാധനങ്ങൾ എത്തിക്കാനും, വിവിധ ഉപകരണങ്ങൾ വഹിക്കാനും ഇത്തരം സംവിധാനങ്ങൾക്ക് സാധിക്കും.

ഏതാനും വർഷങ്ങൾക്ക് മുൻപ് ലളിതമായ ജോലികൾ മാത്രം ചെയ്തിരുന്ന സാങ്കേതികവിദ്യയിൽ നിന്നും ഏറെ മുന്നിലാണ് ഇന്നത്തെ ഈ നവീകരണം. ലോജിസ്റ്റിക്സ്, ദുരന്തനിവാരണം തുടങ്ങി നിരവധി രംഗങ്ങളിൽ വലിയ സ്വാധീനം ചെലുത്താൻ പോന്നതാണ് ഈ പുതിയ മുന്നേറ്റം.