വിദ്യാർഥികൾക്കിടയിൽ വർധിച്ചുവരുന്ന ആത്മഹത്യാപ്രവണത പ്രതിരോധിക്കുന്നതിന്റെ ഭാഗമായി പുതിയ മുൻകരുതലുകളുമായി വീർ നർമദ് സൗത്ത് ഗുജറാത്ത് സർവകലാശാല രംഗത്ത്. ഇതിന്റെ തുടക്കമായി സർവകലാശാലാ ഹോസ്റ്റലുകളിലെ മുറികളിൽ പ്രത്യേകമായി രൂപകൽപ്പന ചെയ്ത 388 ആന്റി-സൂസൈഡ് സീലിങ് ഫാനുകൾ സ്ഥാപിക്കുന്നതിനുള്ള പ്രവർത്തനങ്ങൾ ആരംഭിച്ചതായി അധികൃതർ വ്യക്തമാക്കി.
സ്പ്രിങ് സംവിധാനത്തോടുകൂടിയാണ് ഈ പുതിയ ഫാനുകൾ നിർമ്മിച്ചിരിക്കുന്നത്. ഫാനിന്റെ ഹുക്കിൽ 10 കിലോഗ്രാമിൽ അധികം ഭാരം പ്രയോഗിക്കപ്പെടുന്ന സാഹചര്യമുണ്ടായാൽ, ഫാൻ തടസ്സമില്ലാതെ സീലിങ്ങിൽ നിന്നും വേർപെടുകയും ഒപ്പം വൈദ്യുതി ബന്ധം പൂർണ്ണമായി വിച്ഛേദിക്കപ്പെട്ട് താഴേക്ക് പതിക്കുകയും ചെയ്യും.
ഇത്തരം സുരക്ഷാ സങ്കേതങ്ങൾ വഴി തൂങ്ങിമരണ ശ്രമങ്ങളെ പൂർണ്ണമായി പരാജയപ്പെടുത്താൻ സാധിക്കുമെന്ന് സർവകലാശാല വൈസ് ചാൻസലർ ഡോ. കിഷോർസിങ് ചാവ്ദ വ്യക്തമാക്കി.
രാജ്യത്തെ വിവിധ വിദ്യാഭ്യാസ സ്ഥാപനങ്ങളിൽ വിദ്യാർഥികൾ ജീവനൊടുക്കുന്ന സംഭവങ്ങൾ ആശങ്കാജനകമാംവിധം ഉയരുന്ന പശ്ചാത്തലത്തിലാണ് ഇത്തരമൊരു സുരക്ഷാ ക്രമീകരണം നടപ്പിലാക്കുന്നത്. സ്ഥാപിച്ചിട്ടുള്ള സുരക്ഷാ സംവിധാനങ്ങൾ തകരാറുകളില്ലാതെ പ്രവർത്തിക്കുന്നുണ്ടെന്ന് ഉറപ്പുവരുത്തുന്നതിനായി കൃത്യമായ ഇടവേളകളിൽ കർശന പരിശോധനകൾ ഉണ്ടാകുമെന്ന് സർവകലാശാലാ അധികൃതർ അറിയിച്ചു.
എന്നാൽ കേവലം യാന്ത്രികമായ ഇത്തരം മാറ്റങ്ങൾ കൊണ്ട് മാത്രം വിദ്യാർഥികളുടെ മാനസികാരോഗ്യ പ്രശ്നങ്ങൾ പൂർണ്ണമായി പരിഹരിക്കാനാകില്ലെന്നും, മറിച്ച് കൃത്യമായ കൗൺസിലിങ് സൗകര്യങ്ങളും സമ്മർദ്ദരഹിതമായ പഠനാന്തരീക്ഷവും ഉറപ്പാക്കുകയാണ് ഇതിനുള്ള ശാശ്വത പരിഹാരമെന്നും ഈ മേഖലയിലെ വിദഗ്ധർ ചൂണ്ടിക്കാണിക്കുന്നു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
