സാംസങ് ഗാലക്സി എസ് 27 പ്രോ വരുന്നു: ശ്രദ്ധേയമായ മാറ്റങ്ങളുമായി പുതിയ സ്മാർട്ട്ഫോൺ നിര

സ്മാർട്ട്ഫോൺ വിപണിയിൽ വൻ മാറ്റങ്ങൾക്ക് തുടക്കമിട്ടുകൊണ്ട് തങ്ങളുടെ ഗാലക്സി ശ്രേണിയിൽ പുതിയ പരിഷ്കാരങ്ങളുമായി സാംസങ് ഒരുങ്ങുന്നു. നിലവിലുള്ള ‘പ്ലസ്’ മോഡലുകൾക്ക് പകരമായി ‘പ്രോ’ പതിപ്പുകളെ അവതരിപ്പിക്കാനാണ് കമ്പനിയുടെ തീരുമാനം.

മുൻനിര മോഡലായ ‘അൾട്ര’യുടെ മികച്ച സവിശേഷതകൾ ഉൾപ്പെടുത്തി, കൂടുതൽ ഒതുക്കമുള്ള രൂപകൽപ്പനയിലായിരിക്കും ഈ പുതിയ മോഡലുകൾ വിപണിയിലെത്തുക. പ്രമുഖ ടെക് ലീക്കറായ ഡിജിറ്റൽ ചാറ്റ് സ്റ്റേഷൻ പുറത്തുവിട്ട

വിവരങ്ങൾ പ്രകാരം, ഗാലക്സി എസ് 27 പ്രോ മോഡലിൽ 6.47 ഇഞ്ച് വലിപ്പമുള്ള ‘പ്രൈവസി ഡിസ്പ്ലേ’ പരീക്ഷിച്ചുവരികയാണ്. വരാനിരിക്കുന്ന ഗാലക്സി എസ് 27-ന്റെ 6.1 ഇഞ്ച് ഡിസ്പ്ലേയ്ക്കും, അൾട്രയുടെ 6.9 ഇഞ്ച് ഡിസ്പ്ലേയ്ക്കും ഇടയിലുള്ള വലുപ്പമായിരിക്കും പുതിയ മോഡലിന് ഉണ്ടാവുക.

സമാന വിഭാഗത്തിലുള്ള പിക്സൽ 10 പ്രോ, ഐഫോൺ 17 പ്രോ എന്നീ ഫോണുകളുടെ 6.3 ഇഞ്ച് ഡിസ്പ്ലേയെക്കാൾ വലിപ്പമുള്ളതായിരിക്കും എസ് 27 പ്രോ എന്നതും ശ്രദ്ധേയമാണ്. ഡിസ്പ്ലേ സാങ്കേതികവിദ്യയിലെ പ്രത്യേകതയാണ് ‘പ്രൈവസി ഡിസ്പ്ലേ’.

പാസ്‌വേഡുകൾ, ക്രെഡിറ്റ് കാർഡ് വിവരങ്ങൾ, മറ്റ് സ്വകാര്യ നോട്ടിഫിക്കേഷനുകൾ തുടങ്ങിയവ അനാവശ്യ കാഴ്ചക്കാരിൽ നിന്ന് മറച്ചുവെക്കാൻ ഈ സംവിധാനം സഹായിക്കും. ഇതിനുപുറമെ, ഗാലക്സി എസ് 27 പ്രോ-യിൽ അൾട്ര മോഡലിലെ 200 എംപി പ്രൈമറി ക്യാമറ സെൻസറും ഉൾപ്പെടുത്തിയേക്കുമെന്ന് അഭ്യൂഹങ്ങളുണ്ട്.

എന്നാൽ, ചെറിയ ഡിസ്‌പ്ലേ ആയതിനാൽ എസ് പെൻ സൗകര്യം ഈ മോഡലിൽ ലഭിക്കാൻ സാധ്യത കുറവാണ്. ഈ മാറ്റങ്ങളിലൂടെ സ്മാർട്ട്ഫോൺ വിപണിയിൽ കൂടുതൽ തന്ത്രപരമായ വിലനിർണ്ണയ രീതികൾ നടപ്പിലാക്കാൻ സാംസങ് പദ്ധതിയിടുന്നു.

ഉൽപ്പാദനച്ചെലവ് വർദ്ധിച്ചുവരുന്ന സാഹചര്യത്തിൽ, കൂടുതൽ പ്രീമിയം സൗകര്യങ്ങൾ പ്രോ, അൾട്ര മോഡലുകളിലേക്ക് മാത്രമായി പരിമിതപ്പെടുത്തി ലാഭക്ഷമത വർദ്ധിപ്പിക്കാനാണ് കമ്പനിയുടെ നീക്കം. പ്ലസ് മോഡലുകളെക്കാൾ ഉപഭോക്താക്കൾക്ക് മികച്ച അനുഭവം നൽകാൻ പുതിയ പ്രോ പതിപ്പുകൾക്ക് സാധിക്കുമെന്നാണ് വിലയിരുത്തൽ.