പുതിയ ജിഎസ്ടി നിരക്കുകൾ: കാറുകൾക്ക് മാത്രമല്ല, ഈ നിത്യോപയോഗ സാധനങ്ങൾക്കും ഇനി വില കുറയും.

രാജ്യത്ത് പുതുക്കിയ ജിഎസ്ടി നിരക്കുകൾ സെപ്റ്റംബർ 22 തിങ്കളാഴ്ച മുതൽ പ്രാബല്യത്തിൽ വരും. ജിഎസ്ടി കൗൺസിൽ പ്രഖ്യാപിച്ച പുതിയ നികുതി ഘടന സാധാരണക്കാർക്ക് ഏറെ ആശ്വാസം പകരുന്നതാണ്.

ഇതോടെ നിരവധി ഉൽപ്പന്നങ്ങൾക്ക് വില കുറയും. 18%, 5%, 40% എന്നിങ്ങനെയുള്ള പുതിയ നികുതി സ്ലാബുകൾ അടിസ്ഥാനമാക്കിയാണ് ഈ മാറ്റം.

വിലയിൽ മാറ്റം വരുന്ന പ്രധാന ഉൽപ്പന്നങ്ങൾ ഏതൊക്കെയെന്ന് നോക്കാം. പുതിയ മാറ്റം സാധാരണക്കാർക്ക് ഏറ്റവും പ്രയോജനകരമാവുന്നത് നിത്യോപയോഗ സാധനങ്ങളുടെ വിലക്കുറവിലാണ്.

പാക്ക് ചെയ്ത ഭക്ഷ്യവസ്തുക്കൾ, ടൂത്ത് പേസ്റ്റ്, സോപ്പ്, ഷാംപൂ തുടങ്ങിയവയുടെയെല്ലാം വില കുറയും. ഗൃഹോപകരണ വിപണിയിലും വിലക്കുറവ് ദൃശ്യമാകും.

എയർ കണ്ടീഷണറുകൾക്ക് 4500 രൂപ വരെയും ഡിഷ് വാഷറുകൾക്ക് 8000 രൂപ വരെയും വില കുറയുമെന്ന് പ്രമുഖ കമ്പനികൾ അറിയിച്ചു. ഈ ഉൽപ്പന്നങ്ങളുടെ ജിഎസ്ടി നിരക്ക് 28 ശതമാനത്തിൽ നിന്ന് 18 ശതമാനമായി കുറച്ചതാണ് ഇതിന് കാരണം.

വോൾട്ടാസ്, ഡെയ്കിൻ, ഗോദ്‌റെജ്, ഹയർ തുടങ്ങിയ മുൻനിര കമ്പനികൾ പുതിയ വിലവിവരം പുറത്തുവിട്ടിട്ടുണ്ട്. സെപ്റ്റംബർ 22 മുതൽ പുതിയ നിരക്കുകൾ നിലവിൽ വരും.

നവരാത്രി ഉത്സവ സീസൺ ആരംഭിക്കുന്നതോടെ വിൽപ്പന വർധിക്കുമെന്ന പ്രതീക്ഷയിലാണ് കമ്പനികൾ. ഇതോടൊപ്പം സിമന്റ്, ഗ്രാനൈറ്റ് തുടങ്ങിയ നിർമ്മാണ സാമഗ്രികൾക്കും വില കുറയും, അമുൽ തങ്ങളുടെ 700-ഓളം ഉൽപ്പന്നങ്ങൾക്ക് വില കുറയ്ക്കുമെന്ന് പ്രഖ്യാപിച്ചത് വിപണിക്ക് കൂടുതൽ ഉണർവേകിയിട്ടുണ്ട്.

വാഹന വിപണിയിലാണ് ഏറ്റവും ശ്രദ്ധേയമായ വിലക്കുറവ് വരുന്നത്. ഇടത്തരം കാറുകളെ 18 ശതമാനം ജിഎസ്ടി സ്ലാബിലേക്ക് മാറ്റിയതാണ് കാരണം.

നാല് മീറ്ററിൽ താഴെ നീളവും 1200 സിസിയിൽ താഴെ എഞ്ചിൻ ശേഷിയുമുള്ള പെട്രോൾ കാറുകൾക്കും, 1500 സിസിയിൽ താഴെയുള്ള ഡീസൽ കാറുകൾക്കുമാണ് വില കുറയുക. മാരുതി, ജീപ്പ് തുടങ്ങിയ കമ്പനികൾ ഇതിനകം വിലക്കുറവ് പ്രഖ്യാപിച്ചിട്ടുണ്ട്.

എസ്-പ്രസോ, ഓൾട്ടോ കെ10, ഹ്യുണ്ടായ് ഐ20, ടാറ്റ ആൾട്രോസ്, ക്വിഡ്, എക്സ്റ്റർ, ഗ്രാൻഡ് വിറ്റാര, സെലേറിയോ, വാഗൺ ആർ, ഇഗ്നിസ്, സ്വിഫ്റ്റ്, ബലേനോ, ഡിസയർ, ജിംനി, എർട്ടിഗ, ബ്രെസ തുടങ്ങിയ ജനപ്രിയ മോഡലുകൾക്ക് വില കുറയും. അതേസമയം, പ്രീമിയം വാഹനങ്ങൾക്ക് വിലയേറും.

4000 മില്ലിമീറ്ററിൽ (4 മീറ്റർ) കൂടുതൽ നീളമുള്ള എല്ലാ കാറുകൾക്കും ഇനി 40 ശതമാനം ജിഎസ്ടി നൽകണം. ഇത് ക്രെറ്റ, കിയ സെൽറ്റോസ്, ഹാരിയർ, ഫോർച്യൂണർ തുടങ്ങിയ എസ്.യു.വികളുടെ വില വർധിപ്പിക്കും.

350 സിസിക്ക് മുകളിലുള്ള റോയൽ എൻഫീൽഡ് ഹിമാലയൻ പോലുള്ള മോട്ടോർസൈക്കിളുകൾക്കും 40 ശതമാനം ജിഎസ്ടി ബാധകമാകും. ഇവയ്ക്ക് പുറമെ കാർഷികോപകരണങ്ങൾ, വെണ്ണ, നെയ്യ് അടക്കമുള്ള പാലുൽപ്പന്നങ്ങൾ, ഹെയർ ഓയിൽ, ടൂത്ത് ബ്രഷ്, നാപ്കിൻ, ഡയപ്പർ, പേന, സ്കൂൾ ബാഗുകൾ, സ്യൂട്ട്കേസുകൾ, 32 ഇഞ്ചിന് മുകളിലുള്ള ടിവി, മോണിറ്റർ എന്നിവയ്ക്കും വില കുറയും.

ലൈഫ്, ആരോഗ്യ, ജനറൽ ഇൻഷുറൻസ് പോളിസികൾ, ജീവൻ രക്ഷാ മരുന്നുകൾ എന്നിവയെ ജിഎസ്ടിയിൽ നിന്ന് പൂർണ്ണമായും ഒഴിവാക്കിയിട്ടുണ്ട്. റെയിൽവേയുടെ ഔദ്യോഗിക കുടിവെള്ള ബ്രാൻഡായ ‘റെയിൽ നീരി’ന് വില കുറയുമെന്ന് റെയിൽവേ മന്ത്രാലയം അറിയിച്ചു.

ലിറ്ററിന് ഒരു രൂപയാണ് കുറയുക. റെയിൽവേ സ്റ്റേഷനുകളിലും ട്രെയിനുകളിലും വിൽക്കുന്ന മറ്റ് അംഗീകൃത കുടിവെള്ള ബ്രാൻഡുകൾക്കും വിലക്കുറവ് ബാധകമാകും.

ഡിസ്കൗണ്ടിൽ വിൽക്കുന്ന ഉൽപ്പന്നങ്ങൾക്ക്, കിഴിവ് കഴിഞ്ഞുള്ള തുകയിന്മേലാണ് ജിഎസ്ടി ഈടാക്കുക. പുകയില ഉൽപ്പന്നങ്ങൾ, പാൻ മസാല, ലോട്ടറി, ആഡംബര കാറുകൾ, ഓൺലൈൻ ഗെയിമിംഗ്, കാർബണേറ്റഡ്, ഫ്ലേവേഡ് പാനീയങ്ങൾ എന്നിവയ്ക്ക് വില വർധിക്കും.

പ്രീമിയം കായിക മത്സരങ്ങളുടെ ജിഎസ്ടി 28 ശതമാനത്തിൽ നിന്ന് 40 ശതമാനമായി ഉയർത്തിയത് ക്രിക്കറ്റ് ആരാധകർക്ക് തിരിച്ചടിയാകും. ഐപിഎൽ പോലുള്ള മത്സരങ്ങൾ സ്റ്റേഡിയത്തിൽ കാണാൻ ഇനി കൂടുതൽ പണം മുടക്കേണ്ടി വരും.

ലോട്ടറി ടിക്കറ്റിന്റെ വില വർധനവിനെതിരെ ഇതിനകം പ്രതിഷേധം ഉയർന്നിട്ടുണ്ട്. 2,500 രൂപയ്ക്ക് മുകളിലുള്ള വസ്ത്രങ്ങളുടെ ജിഎസ്ടി 12 ശതമാനത്തിൽ നിന്ന് 18 ശതമാനമായി ഉയർത്തിയതും ശ്രദ്ധേയമാണ്.

അവശ്യസാധനങ്ങൾ, ഗൃഹോപകരണങ്ങൾ, ചെറിയ വാഹനങ്ങൾ എന്നിവയുടെ വിലക്കുറവ് വിപണിക്ക് പുത്തനുണർവ് നൽകുമെന്നാണ് പ്രതീക്ഷ. ഈ മാറ്റം ഓഹരി വിപണിയിലും പ്രതിഫലിക്കും.

ഓട്ടോ, കൺസ്യൂമർ ഗുഡ്സ് തുടങ്ങിയ മേഖലകളിലെ ഓഹരികൾ നേട്ടമുണ്ടാക്കാൻ സാധ്യതയുണ്ട്. ജിഎസ്ടി കൗൺസിൽ പ്രഖ്യാപനത്തിന് പിന്നാലെ നിഫ്റ്റിയിൽ ഇതിന്റെ ചലനങ്ങൾ ദൃശ്യമായിരുന്നു.

പുതിയ പരിഷ്കാരങ്ങൾ രാജ്യത്തിന്റെ ജിഎസ്ടി വരുമാന വളർച്ചയെ ത്വരിതപ്പെടുത്തുമെന്ന് സാമ്പത്തിക വിദഗ്ധർ വിലയിരുത്തുന്നു.  FacebookTwitterWhatsAppTelegram