ഓഹരി വിപണിയിൽ ചരിത്രമെഴുതി വീഗാലാൻഡ് ഡവലപ്പേഴ്സ്; മികച്ച തുടക്കത്തിനു പിന്നാലെ ഇടിവ്

സംസ്ഥാനത്തുനിന്നു പ്രാരംഭ ഓഹരി വിൽപന (ഐപിഒ) നടത്തി ഓഹരി വിപണിയിൽ പ്രവേശിക്കുന്ന ആദ്യ റിയൽ എസ്റ്റേറ്റ് സംരംഭമെന്ന അഭിമാനാർഹമായ നേട്ടവുമായി വീഗാലാൻഡ് ഡവലപ്പേഴ്സ് നാഷണൽ സ്റ്റോക്ക് എക്സ്ചേഞ്ചിൽ (എൻഎസ്ഇ) അരങ്ങേറ്റം കുറിച്ചു. നിശ്ചയിക്കപ്പെട്ട

ഐപിഒ വിലയായ 140 രൂപയിൽനിന്ന് 10 ശതമാനം നേട്ടത്തോടെ 154 രൂപയിലായിരുന്നു ഓഹരികളുടെ ലിസ്റ്റിങ്. എങ്കിലും, ഇതിനു പിന്നാലെയുണ്ടായ ലാഭമെടുക്കലിനെത്തുടർന്ന് ഓഹരിവിലയിൽ താഴ്ച രേഖപ്പെടുത്തി.

നിലവിൽ 5 ശതമാനം ഇടിഞ്ഞ് 146.30 രൂപയെന്ന ലോവർ-സർക്യൂട്ടിലാണ് വ്യാപാരം പുരോഗമിക്കുന്നത്. ബോംബെ സ്റ്റോക്ക് എക്സ്ചേഞ്ചിൽ (ബിഎസ്ഇ) 7.86 ശതമാനം ഉയർച്ചയോടെ 151 രൂപയിലായിരുന്നു കമ്പനിയുടെ ലിസ്റ്റിങ് നടപടികൾ പൂർത്തിയായത്.

പ്രമുഖ വ്യവസായിയായ കൊച്ചൗസേപ്പ് ചിറ്റിലപ്പിള്ളിയുടെ ഉടമസ്ഥതയിൽ ഓഹരി വിപണിയിലെത്തുന്ന മൂന്നാമത്തെ കമ്പനിയാണിത്. വി-ഗാർഡ് ഇൻഡസ്ട്രീസ്, വണ്ടർല എന്നിവയാണ് അദ്ദേഹത്തിന്റെ നേതൃത്വത്തിൽ ഇതിനകം വിപണിയിലെത്തിയ മറ്റ് രണ്ട് സംരംഭങ്ങൾ.

ഒരു വ്യവസായിയുടെ മൂന്ന് വ്യത്യസ്ത കമ്പനികൾ ഓഹരി വിപണിയിലെത്തുന്നത് അത്യപൂർവമായ ഒരു നേട്ടമായാണ് വിലയിരുത്തപ്പെടുന്നത്. 210 കോടി രൂപ സമാഹരിക്കുകയെന്ന ലക്ഷ്യത്തോടെയാണ് കമ്പനി ഐപിഒയുമായി രംഗത്തെത്തിയത്.

നിക്ഷേപകർക്കിടയിൽ വലിയ സ്വീകാര്യത ലഭിച്ച ഈ ഓഹരി വിൽപനയ്ക്ക് മൊത്തത്തിൽ 14.60 മടങ്ങ് അപേക്ഷകളാണ് ലഭിച്ചത്. ഇതിൽ ചെറുകിട

നിക്ഷേപകരായ റീട്ടെയ്ൽ നിക്ഷേപകരിൽ നിന്ന് 9.95 മടങ്ങും, സ്ഥാപനേതര നിക്ഷേപകരിൽ (എൻഐഐ) നിന്ന് 19.41 മടങ്ങും അപേക്ഷകൾ ലഭിച്ചു. യോഗ്യരായ നിക്ഷേപ സ്ഥാപനങ്ങളുടെ (ക്യുഐബി) ഭാഗത്തുനിന്ന് 19.13 മടങ്ങ് അപേക്ഷകളാണ് എത്തിയത്.

പുതിയ വിപണിമൂല്യ കണക്കുകൾ പ്രകാരം 713.21 കോടി രൂപയാണ് വീഗാലാൻഡ് ഡവലപ്പേഴ്സിന്റെ ആകെ വിപണിമൂല്യം. 2011-ൽ പ്രവർത്തനമാരംഭിച്ച കമ്പനി, പ്രീമിയം റസിഡൻഷ്യൽ പദ്ധതികൾക്കാണ് പ്രധാനമായും മുൻഗണന നൽകുന്നത്.

‘വീഗാലാൻഡ് ഹോംസ്’ എന്ന ബ്രാൻഡിനു കീഴിൽ ഇതിനകം 10 പദ്ധതികൾ പൂർത്തീകരിച്ചിട്ടുണ്ട്. കൂടാതെ 12 പുതിയ പദ്ധതികളുടെ നിർമാണ പ്രവർത്തനങ്ങൾ വിവിധ ഘട്ടങ്ങളിലായി പുരോഗമിക്കുകയാണ്.

ഐപിഒ വഴി ലഭ്യമാകുന്ന തുക പ്രധാനമായും നിലവിൽ നിർമാണത്തിലിരിക്കുന്ന പദ്ധതികൾക്കായുള്ള ഫണ്ട് ഉറപ്പാക്കാനും, പുതിയ സംരംഭങ്ങൾക്കായി ആവശ്യമായ ഭൂമി സ്വന്തമാക്കാനുമാണ് കമ്പനി വിനിയോഗിക്കുന്നത്. (Disclaimer: ഈ ലേഖനം ഓഹരി/കടപ്പത്രം/മ്യൂച്വൽഫണ്ട്/ക്രിപ്റ്റോകറൻസി/ഐപിഒ/സ്വർണം മുതലായവ വാങ്ങാനോ വില്‍ക്കാനോ ഉള്ള നിര്‍ദേശമോ ഉപദേശമോ അല്ല.

ഓഹരി/കടപ്പത്രം/മ്യൂച്വൽഫണ്ട് മുതലായ നിക്ഷേപങ്ങൾ വിപണിയിലെ റിസ്കുകൾക്ക് വിധേയമാണ്. നിക്ഷേപം നടത്തുന്നതിന് മുമ്പ് നിങ്ങള്‍ സ്വയം പഠനങ്ങൾ നടത്തുകയോ ഒരു വിദഗ്ധന്റെ ഉപദേശം തേടുകയോ ചെയ്യുക)