തിരുവനന്തപുരം: സംസ്ഥാനത്ത് അതിശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. സംസ്ഥാനത്തെ നാല് ജില്ലകളിൽ ഓറഞ്ച് അലേർട്ടും എട്ട് ജില്ലകളിൽ യെല്ലോ അലേർട്ടും പ്രഖ്യാപിച്ചു. തിരുവനന്തപുരത്തും കൊല്ലത്തും അതിശക്തമായ മഴയാണ് പെയ്യുന്നത്. പല പ്രദേശങ്ങളും വെള്ളക്കെട്ട് ഭീഷണി നേരിടുകയാണ്. തിരുവനന്തപുരം മുതൽ ആലപ്പുഴ വരെയുള്ള ജില്ലകളിലാണ് ഓറഞ്ച് അലേർട്ട് പ്രഖ്യാപിച്ചിട്ടുള്ളത്.
തെക്കൻ തമിഴ്‌നാടിനു മുകളിൽ ചക്രവാതചുഴിയും അറബിക്കടലിനു മുകളിൽ ന്യൂനമർദ്ദ സാധ്യതയും നിലനിൽക്കുന്നതിനാൽ വരുന്ന അഞ്ച് ദിവസവും അതിശക്തമായ മഴക്കു സാധ്യത ഉണ്ടെന്ന് കാലാവസ്ഥ വകുപ്പ് മുന്നറിയിപ്പ് നൽകിയിട്ടുണ്ട്.
