കണ്ണൂരിലെ സ്കൂളുകളിൽ വർധിക്കുന്ന റാഗിങ്; വിദ്യാർഥികൾ ഭീതിയിൽ, നിയമനടപടികൾ കർശനമാക്കുന്നു

കണ്ണൂർ ജില്ലയിലെ വിവിധ വിദ്യാഭ്യാസ സ്ഥാപനങ്ങളിൽ വിദ്യാർഥികൾക്ക് നേരെ നടക്കുന്ന റാഗിങ് സംഭവങ്ങൾ ആശങ്കയുയർത്തുന്നു. പ്ലസ് വൺ വിദ്യാർഥികളെ ലക്ഷ്യമിട്ടാണ് സീനിയർ വിദ്യാർഥികളുടെ അക്രമങ്ങൾ അരങ്ങേറുന്നത്.

ക്ലാസ് ഇടവേളകളിലും സ്കൂൾ സമയങ്ങളിലും ശുചിമുറികൾ കേന്ദ്രീകരിച്ചാണ് പ്രധാനമായും ഇത്തരം അതിക്രമങ്ങൾ നടക്കുന്നത്. സീനിയർ വിദ്യാർഥികളുടെ നിർദേശങ്ങൾ അനുസരിക്കാത്ത വിദ്യാർഥികൾ നിരന്തരം പീഡനങ്ങൾക്ക് ഇരയാകുന്നു.

വസ്ത്രധാരണം, ഹെയർ കട്ട്, ഷൂസ് ധരിക്കൽ തുടങ്ങിയ വിഷയങ്ങളിൽ സീനിയർ വിദ്യാർഥികൾ ഏർപ്പെടുത്തിയിട്ടുള്ള നിയന്ത്രണങ്ങൾ പാലിക്കാൻ ജൂനിയർ വിദ്യാർഥികൾ നിർബന്ധിതരാകുന്നു. നിർദേശങ്ങൾ ലംഘിക്കുന്നവരെ സ്കൂൾ ശുചിമുറികളിലേക്ക് വിളിച്ചുവരുത്തി ക്രൂരമായി മർദിക്കുന്നതാണ് രീതി.

പലപ്പോഴും പെൺകുട്ടികളെ ഉപയോഗിച്ച് ജൂനിയർ വിദ്യാർഥികളെ തന്ത്രപൂർവം ശുചിമുറികളിൽ എത്തിച്ചാണ് മർദനം നടത്തുന്നത്. അടുത്തിടെ ജില്ലയിലെ ഒരു പ്രമുഖ സ്കൂളിൽ നടന്ന അക്രമ സംഭവത്തെത്തുടർന്ന് ആറ് സീനിയർ വിദ്യാർഥികളെ സസ്പെൻഡ് ചെയ്തിരുന്നു.

നിയമപരമായ വശങ്ങൾ റാഗിങ് എന്നത് നിയമവിരുദ്ധമായ കുറ്റകൃത്യമാണ്. മാനസികമോ ശാരീരികമോ ആയ ഉപദ്രവം, അധിക്ഷേപം, പരിഹാസം, നിർബന്ധപൂർവം പ്രത്യേക കാര്യങ്ങൾ ചെയ്യിപ്പിക്കൽ എന്നിവയെല്ലാം റാഗിങ്ങിന്റെ പരിധിയിൽ വരും.

ഇത്തരം പ്രവർത്തികളിൽ ഏർപ്പെടുന്നവർക്ക് രണ്ട് വർഷം വരെ തടവുശിക്ഷയും 10,000 രൂപ വരെ പിഴയും ലഭിക്കാം. കൂടാതെ, കുറ്റക്കാരായ വിദ്യാർഥികളെ പുറത്താക്കുന്നതിനും മൂന്ന് വർഷത്തേക്ക് മറ്റ് സ്ഥാപനങ്ങളിൽ പ്രവേശനം നിഷേധിക്കുന്നതിനും നിയമം വ്യവസ്ഥ ചെയ്യുന്നുണ്ട്.

പ്രതികരണവും നടപടികളും വിദ്യാഭ്യാസ സ്ഥാപനങ്ങൾക്ക് പുറത്തും ബസ് സ്റ്റോപ്പുകളിലും മറ്റും ഇത്തരം അക്രമങ്ങൾ തുടരുകയാണ്. പരാതി നൽകിയാൽ പഠനം മുടങ്ങുമെന്ന ഭയത്താൽ ഭൂരിഭാഗം വിദ്യാർഥികളും മൗനം പാലിക്കുന്നു.

സ്കൂളുകളിൽ പ്രിൻസിപ്പൽ, പിടിഎ പ്രസിഡന്റ്, അധ്യാപകർ, കൗൺസിലർ എന്നിവരടങ്ങുന്ന ആന്റി റാഗിങ് സ്ക്വാഡ് പ്രവർത്തിക്കുന്നുണ്ടെങ്കിലും അക്രമങ്ങൾ തടയുന്നതിൽ വെല്ലുവിളികൾ നേരിടുന്നു. പരാതി ലഭിച്ചാൽ ഏഴ് ദിവസത്തിനുള്ളിൽ അന്വേഷണം നടത്തി കുറ്റക്കാർക്കെതിരെ കർശന നടപടി സ്വീകരിക്കാൻ അധികൃതർക്ക് ബാധ്യതയുണ്ട്.

തലശ്ശേരിയിലെ സംഭവം തലശ്ശേരി ചിറക്കര ഗവ. വൊക്കേഷനൽ ഹയർ സെക്കൻഡറി സ്കൂളിൽ പ്ലസ് വൺ വിദ്യാർഥിക്ക് നേരെ സീനിയർ വിദ്യാർഥികളുടെ മർദനം ഉണ്ടായി.

ചൊവ്വാഴ്ച ഉച്ചയ്ക്ക് 1.20-നാണ് സംഭവം നടന്നത്. ഷർട്ടിന്റെ ബട്ടൺ ഇടാത്തതുമായി ബന്ധപ്പെട്ട

തർക്കത്തെത്തുടർന്ന് പ്ലസ് ടു വിദ്യാർഥികൾ ജൂനിയർ വിദ്യാർഥിയെ തടഞ്ഞുവച്ച് മർദിക്കുകയായിരുന്നു. ഈ സംഭവത്തിൽ 15 പ്ലസ് ടു വിദ്യാർഥികൾക്കെതിരെ പൊലീസ് കേസെടുത്തു.

എട്ട് വിദ്യാർഥികളെ സ്കൂൾ പ്രിൻസിപ്പൽ സസ്പെൻഡ് ചെയ്യുകയും ചെയ്തു.