പ്രൈം വോളിബോള്‍ ലീഗ്: ഹൈദരാബാദ് ബ്ലാക്ക്ഹോക്സിനെതിരെ ഡല്‍ഹി തൂഫാന്‍സിന് തകര്‍പ്പന്‍ ജയം.

ഹൈദരാബാദ്: പ്രൈം വോളിബോൾ ലീഗ് നാലാം സീസണിൽ ഡൽഹി തൂഫാൻസിന് തകർപ്പൻ ജയം. ആതിഥേയരായ ഹൈദരാബാദ് ബ്ലാക്ക്ഹോക്സിനെ നേരിട്ടുള്ള സെറ്റുകൾക്കാണ് ഡൽഹി പരാജയപ്പെടുത്തിയത്.

സ്കോർ: 15-10, 16-14, 17-15. ഡൽഹിയുടെ കാർലോസ് ബെറിയോസാണ് പ്ലെയർ ഓഫ് ദി മാച്ച്.

ഈ വിജയത്തോടെ നാല് പോയിന്റുമായി ഡൽഹി ആറാം സ്ഥാനത്തെത്തി. ഹൈദരാബാദ് ഒമ്പതാം സ്ഥാനത്താണ്.

ഹൈദരാബാദിലെ ഗച്ചിബൗളി ഇൻഡോർ സ്റ്റേഡിയത്തിൽ നടന്ന മത്സരത്തിന് തെലങ്കാന കായിക മന്ത്രി വകിതി ശ്രീഹരി, തെലങ്കാന സ്പോർട്സ് അതോറിറ്റി ചെയർമാൻ ശിവസേന റെഡ്ഡി എന്നിവർ സാക്ഷികളായി. മത്സരത്തിന് മുമ്പ് ഇരുവരും കളിക്കാരെ പരിചയപ്പെട്ടു.

സ്വന്തം കാണികൾക്ക് മുന്നിൽ തുടർച്ചയായ മൂന്ന് സർവീസ് പിഴവുകളോടെയാണ് ഹൈദരാബാദ് മത്സരം ആരംഭിച്ചത്. തുടക്കത്തിലെ ഈ പിഴവുകൾ അവർക്ക് വലിയ തിരിച്ചടിയായി.

ജീസസ് ചൗരിയോയുടെ ആക്രമണങ്ങളാണ് ഡൽഹിക്ക് മുൻതൂക്കം നൽകിയത്. പിന്നാലെ മിഡിൽ സോണിൽ നിന്ന് ജോൺ ജോസഫിന്റെ ഉജ്ജ്വലമായ സ്മാഷുകളിലൂടെ ഹൈദരാബാദും മത്സരത്തിലേക്ക് തിരിച്ചെത്തി.

എന്നാൽ ബ്ലാക്ക്ഹോക്സിന്റെ തുടർച്ചയായ പിഴവുകൾ അവർക്ക് വിനയായി. കാർലോസിന്റെ ശക്തമായ സർവീസുകൾ ഹൈദരാബാദിന്റെ പ്രതിരോധ നിരയെ തകർത്തു.

ഡൽഹി ക്യാപ്റ്റൻ സഖ്ലൈൻ താരിഖിന്റെ കൃത്യതയാർന്ന പാസുകൾ ആക്രമണങ്ങൾക്ക് മൂർച്ച കൂട്ടി. ഹൈദരാബാദിനായി ശിഖർ സിങ്, സാഹിൽ കുമാർ എന്നിവർ നടത്തിയ ചെറുത്തുനിൽപ്പാണ് ആദ്യ സെറ്റിലെ ഡൽഹിയുടെ വിജയം വൈകിപ്പിച്ചത്.

രണ്ടാം സെറ്റിൽ മലയാളി താരം മുഹമ്മദ് ജാസിമിന് പിഴവ് സംഭവിച്ചെങ്കിലും, തൊട്ടടുത്ത ഷോട്ടിൽ തന്നെ ഒരു സൂപ്പർ പോയിന്റ് സ്പൈക്കിലൂടെ താരം പ്രായശ്ചിത്തം ചെയ്തു. ഡൽഹി ലിബറോ ആനന്ദിന്റെ നിർണായക ഇടപെടൽ ടീമിന് ഒരു സുപ്രധാന പോയിന്റ് നേടിക്കൊടുത്തു.

ഇതോടെ കളിയുടെ നിയന്ത്രണം ഡൽഹി ഏറ്റെടുത്തു. ആനന്ദിന്റെ മിന്നും പ്രകടനം തൂഫാൻസ് ആരാധകരെ ആവേശത്തിലാഴ്ത്തി.

ആവേശകരമായ പോരാട്ടത്തിനൊടുവിൽ രണ്ടാം സെറ്റും ഡൽഹി സ്വന്തമാക്കി. മൂന്നാം സെറ്റിലും കാർലോസ് ഫ്രണ്ട് കോർട്ടിൽ ആക്രമണങ്ങളുമായി നിറഞ്ഞാടി.

ഡൽഹിയുടെ മധ്യനിരയിലെ പ്രതിരോധപ്പിഴവുകൾ മുതലെടുത്ത് ഹൈദരാബാദ് തിരിച്ചടിക്കാൻ ശ്രമിച്ചു. സെന്റർ സോണിലൂടെയുള്ള ഹൈദരാബാദിന്റെ ആക്രമണങ്ങൾ ഡൽഹിക്ക് തലവേദനയായി.

ബ്രസീലിയൻ അറ്റാക്കർ വിറ്റർ യൂഡി യമമോട്ടോയുടെ മികച്ച പ്രകടനം കണ്ട് ഡൽഹി തങ്ങളുടെ ഫോർമേഷനിൽ മാറ്റങ്ങൾ വരുത്താൻ നിർബന്ധിതരായി. ഈ തന്ത്രം ഫലം കണ്ടു.

നിർണായക ഘട്ടത്തിൽ കാർലോസ് ബെറിയോസിന്റെ ഒരു തകർപ്പൻ അറ്റാക്കിങ് പോയിന്റിലൂടെ ഡൽഹി തൂഫാൻസ് ഈ സീസണിലെ തങ്ങളുടെ കന്നി വിജയം സ്വന്തമാക്കി. ഇന്ന് വൈകിട്ട് 6.30ന് നടക്കുന്ന മത്സരത്തിൽ കൊച്ചി ബ്ലൂ സ്പൈക്കേഴ്സ് ബംഗളൂരു ടോർപിഡോസിനെയും, രാത്രി 8.30ന് കൊൽക്കത്ത തണ്ടർബോൾട്ട്സ് ചെന്നൈ ബ്ലിറ്റ്സിനെയും നേരിടും.

  FacebookTwitterWhatsAppTelegram