കോട്ടയം: രാഷ്ട്രീയ കേരളം ഉറ്റുനോക്കുന്ന പുതുപ്പള്ളി ഉപതെരഞ്ഞെടുപ്പ് ഫലം പ്രേക്ഷകരിൽ എത്തിക്കാൻ വിപുലമായ ഒരുക്കങ്ങളാണ് ഏഷ്യാനെറ്റ് ന്യൂസ് ഏർപ്പെടുത്തിയിരിക്കുന്നത്. തെരഞ്ഞെടുപ്പ് ഫലപ്രഖ്യാപനത്തിൽ കാൽ നൂറ്റാണ്ടിലേറെ അനുഭവ പരിചയമുള്ള ഏഷ്യാനെറ്റ് ന്യൂസ് പുതുപ്പള്ളിയിൽ എണ്ണുന്ന ഓരോ വോട്ടിന്റെയും വിവരം പ്രേക്ഷകരിൽ എത്തിക്കാൻ സജ്ജമായി. കോട്ടയം ബസേലിയോസ് കോളജിൽ 20 മേശകൾ പുതുപ്പള്ളിയുടെ വിധി പറയുമ്പോൾ ഓരോ സെക്കൻ‍ഡിലെയും ഉദ്വേഗങ്ങൾക്ക് ഏഷ്യാനെറ്റ് ന്യൂസിന്റെ സമഗ്ര സ്‌ക്രീൻ ഉത്തരം നൽകും. ലീഡ് നിലയും രാഷ്ട്രീയ പ്രതികരണങ്ങളും വിശദമായ വിശകലനങ്ങളും ഇടവേളകൾ ഇല്ലാതെ രാവിലെ മുതൽ തത്സമയം പ്രേക്ഷകരിലേക്ക് എത്തും.
എട്ടേകാലോടെ ആദ്യ ഫലസൂചന; ആദ്യം എണ്ണുക അയർക്കുന്നം, പിന്നാലെ വരിവരിയായി ഈ പഞ്ചായത്തുകള്‍
വോട്ടെണ്ണൽ വെള്ളിയാഴ്ച രാവിലെ 8 മുതലാണ് നടക്കുക. കോട്ടയം ബസേലിയോസ് കോളേജിലെ വോട്ടെണ്ണൽ കേന്ദ്രത്തിൽ ആദ്യ റൗണ്ട് എണ്ണിത്തീരുന്പോൾ തന്നെ ട്രെൻഡ് വ്യക്തമാകും. കടുത്ത മത്സരം നടന്ന പുതുപ്പള്ളിയിൽ ഫലമറിയാൻ കാത്തിരിക്കുന്ന അവസാന മണിക്കൂറിലും വലിയ അവകാശവാദങ്ങളിലാണ് മുന്നണികൾ. രാവിലെ എട്ടു മണിക്ക് വോട്ടെണ്ണി രണ്ട് മണിക്കൂറിനകം തന്നെ ഫലമറിയാനാകുന്ന വിധത്തിലാണ് ക്രമീകരണങ്ങൾ. ആകെ 20 മേശകൾ. 14 മേശകളിൽ വോട്ടിംഗ് യന്ത്രങ്ങളും 5 മേശകളിൽ അസന്നിഹിത വോട്ടുകളും ഒരു ടേബിളിൽ സർവീസ് വോട്ടുകളും എണ്ണും. 13 റൗണ്ടുകളിലായി വോട്ടിംഗ് യന്ത്രങ്ങൾ എണ്ണിത്തീരും. അയർക്കുന്നം പഞ്ചായത്തിലെ 28 ബൂത്തുകളാണ് ആദ്യ രണ്ട് റൗണ്ടുകളിലായി എണ്ണുന്നത്. ഈ റൗണ്ടുകൾ എണ്ണിക്കഴിയുമ്പോൾ തന്നെ കൃത്യമായ ഫലസൂചന കിട്ടും.
കടുത്ത മത്സരം നടന്ന 2021 പോലും ഉമ്മൻചാണ്ടിക്ക് 1293 വോട്ടിന്‍റെ ഭൂരിപക്ഷം അയർക്കുന്നത്ത് കിട്ടിയിരുന്നു. അയ്യായിരത്തിന് മുകളിലുള്ള ലീഡാണ് യു ഡി എഫ് ഇത്തവണ ഇവിടെ പ്രതീക്ഷിക്കുന്നത്. ലീഡ് 2000 ൽ താഴെ പിടിച്ചുനിർത്തിയാൽ ഇടതുമുന്നണിക്കും പ്രതീക്ഷ നിലനിർത്താം. പിന്നാലെ അകലക്കുന്നം, കൂരോപ്പട, മണർകാട്, പാമ്പാടി, പുതുപ്പള്ളി, മീനടം, വാകത്താനം പഞ്ചായത്തുകളും എണ്ണും. 2491 അസന്നിഹിത വോട്ടുകളും 138 സർവീസ് വോട്ടുകളും ആറ് മേശകളിലായി ഇതോടൊപ്പം എണ്ണിത്തീരും.
എട്ടേകാലോടെ ആദ്യ ഫലസൂചനകൾ കിട്ടിത്തുടങ്ങും. എക്സിറ്റ് പോളുകളടക്കം പുറത്ത് വന്നതോടെ വൻ വിജയ പ്രതീക്ഷയിലാണ് യു ഡി എഫ്. മുൻപെങ്ങുമില്ലാത്ത ഭൂരിപക്ഷത്തോടെ വിജയിക്കുമെന്ന കണക്ക് കൂട്ടലുമുണ്ട്. എന്നാൽ ചിട്ടയായ സംഘടന സംവിധാനത്തിൽ നടന്ന തെരഞ്ഞെടുപ്പ് പ്രവർത്തനങ്ങളിലാണ് ഇടത് പ്രതീക്ഷ. പുതുപ്പള്ളി ഇത്തവണ മാറി ചിന്തിക്കുമെന്ന് ഇടത് ക്യാമ്പ് കണക്ക് കൂട്ടുന്നു. നല്ല മത്സരം കാഴ്ച വച്ചെന്നാണ് ബി ജെ പി അവകാശവാദം.
ഏഷ്യാനെറ്റ് ന്യൂസ് വാർത്തകൾ തത്സമയം കാണാം
Last Updated Sep 7, 2023, 10:33 PM IST
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
