കഴിഞ്ഞ രണ്ട് മാസമായി അതിരൂക്ഷമായ ഗതാഗത പ്രതിസന്ധിയിലാണ് കൽപറ്റ നഗരം. നഗരത്തിലെ പഴയ ബസ് സ്റ്റാൻഡ് മുതൽ പുതിയ ബസ് സ്റ്റാൻഡ് വരെയുള്ള ഒന്നര കിലോമീറ്റർ ദൂരം പിന്നിടാൻ വാഹനയാത്രക്കാർക്ക് ഇപ്പോൾ അരമണിക്കൂറിലധികം സമയം ആവശ്യമായി വരുന്നു.
രാവിലെ മുതൽ തന്നെ ജനമൈത്രി ട്രാഫിക് ജംക്ഷൻ, ചുങ്കം, കൈനാട്ടി എന്നീ ഭാഗങ്ങളിൽ വലിയ വാഹനത്തിരക്കാണ് അനുഭവപ്പെടുന്നത്. ചുങ്കം ജംക്ഷനിലെ കുരുക്ക് പിണങ്ങോട് റോഡിലേക്കും വ്യാപിക്കുന്നത് നഗരഗതാഗതത്തെ പൂർണമായും സ്തംഭിപ്പിക്കുന്നു.
നഗരത്തിലെ വ്യാപാര സ്ഥാപനങ്ങളിൽ ഭൂരിഭാഗത്തിനും സ്വന്തമായി പാർക്കിങ് സൗകര്യമില്ലാത്തത് റോഡരികിലെ അനധികൃത പാർക്കിങ്ങിന് ഇടയാക്കുന്നുണ്ട്. അവധി ദിവസങ്ങളിൽ വിനോദസഞ്ചാരികളുടെ വലിയ ഒഴുക്കുണ്ടാകുന്നതും സ്ഥിതി കൂടുതൽ സങ്കീർണ്ണമാക്കുന്നു.
കെഎസ്ആർടിസി, സ്വകാര്യ ബസുകൾക്ക് സമയക്രമം പാലിക്കാൻ കഴിയാത്ത അവസ്ഥയാണുള്ളത്. പ്രതിസന്ധിയുടെ കേന്ദ്രമായി കൈനാട്ടി ജംക്ഷൻ
കൈനാട്ടി ജംക്ഷനിലെ ഗതാഗതക്കുരുക്ക് ഇപ്പോൾ ദേശീയപാത 766-ൽ പാറയ്ക്കൽ വരെയും ബൈപാസ് ജംക്ഷൻ വരെയും നീളുകയാണ്.
ഇതോടെ ബൈപാസ് വഴി മാനന്തവാടി, ബത്തേരി ഭാഗങ്ങളിലേക്ക് പോകേണ്ട വാഹനങ്ങൾ ഉൾപ്പെടെ മണിക്കൂറുകളോളം കുടുങ്ങിക്കിടക്കുന്നു.
പൊലീസിന്റെ ഇടപെടലുകൾക്കിടയിലും ഇവിടെ ഗതാഗത തടസ്സം തുടരുകയാണ്. ട്രാഫിക് സിഗ്നലിന്റെ പരാജയം
പൊതുമരാമത്ത് വകുപ്പിന്റെ റോഡ് സേഫ്റ്റി ഫണ്ടിൽ നിന്നും 14 ലക്ഷം രൂപ ചെലവഴിച്ച് 2022 ജൂലൈയിലാണ് ഇവിടെ ട്രാഫിക് സിഗ്നൽ സംവിധാനം സ്ഥാപിച്ചത്.
എന്നാൽ, കഴിഞ്ഞ മൂന്ന് മാസമായി ഈ സിഗ്നലുകൾ പലപ്പോഴും പ്രവർത്തനരഹിതമാകുന്നത് പതിവാണ്. പ്രത്യേകിച്ച് രാവിലെ ഒൻപത് മുതൽ പതിനൊന്ന് വരെയും വൈകിട്ട് മൂന്നര മുതൽ അഞ്ചര വരെയുമുള്ള സമയങ്ങളിൽ ഗതാഗതം പാടെ സ്തംഭിക്കുന്നു.
സിഗ്നൽ പ്രവർത്തിക്കാതിരിക്കുമ്പോൾ ബസുകൾ ജംക്ഷന്റെ മധ്യഭാഗത്തായി നിർത്തുന്നത് മറ്റ് വാഹനങ്ങളുടെ സഞ്ചാരത്തെ തടസ്സപ്പെടുത്തുന്നു. അമിതവേഗത്തിൽ വരുന്ന വാഹനങ്ങൾക്കിടയിലൂടെ വിദ്യാർഥികളും രോഗികളടക്കമുള്ള കാൽനടയാത്രക്കാരും ജീവൻ പണയം വെച്ചാണ് റോഡ് മുറിച്ചുകടക്കുന്നത്.
ഈ സാങ്കേതിക തകരാറുകൾ അടിയന്തരമായി പരിഹരിച്ചില്ലെങ്കിൽ വലിയ അപകടങ്ങൾക്കോ കൂടുതൽ ഗതാഗതക്കുരുക്കിനോ നഗരം സാക്ഷ്യം വഹിക്കേണ്ടി വരുമെന്ന് ആശങ്ക ഉയരുന്നുണ്ട്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
