കുട്ടികളുടെ പ്രതിരോധശേഷി വർദ്ധിപ്പിക്കാൻ സമീകൃതാഹാരം അനിവാര്യം: വിദഗ്ധ അഭിപ്ദേശം

കുട്ടികളിൽ കണ്ടുവരുന്ന ഇടവിട്ടുള്ള ചുമ, ജലദോഷം, വിവിധ അണുബാധകൾ എന്നിവ പ്രധാനമായും പ്രതിരോധശേഷി കുറയുന്നതിന്റെ ലക്ഷണങ്ങളാകാമെന്ന് ആരോഗ്യവിദഗ്ധർ വ്യക്തമാക്കുന്നു. കുട്ടികളുടെ ആരോഗ്യകരമായ വളർച്ചയ്ക്കും മികച്ച പ്രതിരോധ സംവിധാനത്തിനും സമീകൃതമായ ഭക്ഷണക്രമം അതീവ നിർണായകമാണ്.

ഏതെങ്കിലും ഒരു പ്രത്യേക ‘ഇമ്മ്യൂണിറ്റി ബൂസ്റ്റർ’ ഭക്ഷണത്തേക്കാൾ ഉപരിയായി, കുട്ടിയുടെ മൊത്തത്തിലുള്ള സമഗ്രമായ ഭക്ഷണരീതിയാണ് പ്രതിരോധശേഷിയെ നിയന്ത്രിക്കുന്നതെന്ന് ബെംഗളൂരു ഇലക്ട്രോണിക് സിറ്റിയിലെ കിംസ് ഹോസ്പിറ്റൽസ് ചീഫ് ഡയറ്റീഷ്യനായ ഡോ. ചിത്ര ബി.കെ. അഭിപ്രേയപ്പെടുന്നു.

പോഷകസമൃദ്ധമായ ആഹാരത്തോടൊപ്പം മതിയായ ഉറക്കം, ശരീരത്തിൽ ജലാംശം നിലനിർത്തൽ, കൃത്യമായ ശാരീരിക പ്രവർത്തനങ്ങൾ എന്നിവയും കുട്ടികളുടെ ആരോഗ്യത്തിന് അത്യന്താപേക്ഷിതമാണ്. പ്രോട്ടീൻ, ആരോഗ്യകരമായ കൊഴുപ്പ്, വിറ്റാമിനുകൾ, ധാതുക്കൾ, നാരുകൾ എന്നിവ കൃത്യമായ അളവിൽ അടങ്ങിയ ആഹാരം നൽകാൻ മാതാപിതാക്കൾ പ്രത്യേകം ശ്രദ്ധിക്കണം.

കുട്ടിയുടെ ശരീരത്തിന്റെ പ്രതിരോധ പ്രവർത്തനങ്ങൾ സുഗമമായി നടക്കാൻ വിവിധ വിറ്റാമിനുകളും മിനറലുകളും അത്യാവശ്യമാണ്. പോഷകങ്ങളുടെ കുറവ് കുട്ടികളുടെ വളർച്ചയെയും രോഗപ്രതിരോധ ശേഷിയെയും നേരിട്ട് ബാധിച്ചേക്കാം.

ശ്വാസകോശത്തിന്റെ ആരോഗ്യത്തിലും രോഗപ്രതിരോധത്തിലും വിറ്റാമിൻ ഡി പ്രധാന പങ്കുവഹിക്കുന്നുണ്ട്. ചില ശിശുക്കൾക്ക് ഇതിന്റെ പ്രതിരോധ ഡോസ് ആവശ്യമായി വന്നേക്കാം.

പ്രതിരോധ കോശങ്ങളുടെ പ്രവർത്തനത്തെ സഹായിക്കുന്ന ശക്തമായ ആന്റിഓക്‌സിഡന്റാണ് വിറ്റാമിൻ സി. സിട്രസ് പഴങ്ങൾ, പേരയ്ക്ക, നെല്ലിക്ക, കാപ്സിക്കം എന്നിവയിൽ ഈ പോഷകം ധാരാളമായി അടങ്ങിയിരിക്കുന്നു.

ന്യൂട്രോഫിലുകളും നാച്ചുറൽ കില്ലർ സെല്ലുകളും ഉൾപ്പെടെയുള്ള വിവിധ പ്രതിരോധ കോശങ്ങളുടെ വികാസത്തിന് സിങ്ക് അത്യാവശ്യമാണ്. നട്‌സ്, മത്തങ്ങയുടെ വിത്തുകൾ, പയർവർഗ്ഗങ്ങൾ, മുട്ട

എന്നിവയിലൂടെ സിങ്ക് ശരീരത്തിന് ലഭ്യമാക്കാവുന്നതാണ്. ശരീരത്തിന്റെ പ്രതിരോധ സംവിധാനത്തിന്റെ ആദ്യനിരയായ ശ്വാസകോശത്തിന്റെ ആരോഗ്യം സംരക്ഷിക്കാൻ വിറ്റാമിൻ എ സഹായിക്കുന്നു.

ക്യാരറ്റ്, മധുരക്കിഴങ്ങ്, ഇലക്കറികൾ എന്നിവ വിറ്റാമിൻ എ ലഭ്യമാക്കുന്ന മികച്ച ഭക്ഷണങ്ങളാണ്. പ്രതിരോധ കോശങ്ങളുടെ വളർച്ചയ്ക്ക് ഇരുമ്പും, ശരീരത്തിലെ ആന്റിഓക്‌സിഡന്റ് പ്രവർത്തനങ്ങൾക്ക് സെലിനിയവും ഏറെ പ്രധാനമാണ്.

വിവിധ നിറത്തിലുള്ള പഴങ്ങളും പച്ചക്കറികളും, ധാന്യങ്ങൾ, പയറുവർഗ്ഗങ്ങൾ, മുട്ട തുടങ്ങിയ പ്രോട്ടീൻ ഉറവിടങ്ങളും ഭക്ഷണത്തിൽ ഉൾപ്പെടുത്തുന്നത് കുട്ടികൾക്ക് ആവശ്യമായ പോഷകങ്ങൾ ഉറപ്പാക്കും.

ബെറികൾ, ബീറ്റ്‌റൂട്ട് തുടങ്ങിയ ചുവപ്പ്, പർപ്പിൾ നിറങ്ങളിലുള്ള ഭക്ഷണങ്ങളിൽ ആന്തോസയാനിനുകൾ പോലുള്ള ഗുണകരമായ സസ്യ സംയുക്തങ്ങൾ അടങ്ങിയിട്ടുണ്ട്. ക്യാരറ്റ്, ഓറഞ്ച് എന്നിവ കരോട്ടിനോയിഡുകളും വിറ്റാമിൻ സിയും നൽകുമ്പോൾ, ചീര, ബ്രൊക്കോളി തുടങ്ങിയ പച്ചക്കറികളിൽ ഫോളേറ്റ് അടങ്ങിയിരിക്കുന്നു.