സ്കൂളുകളിൽ അധ്യാപകരില്ല; വികാരാധീനനായി വീഡിയോ പങ്കുവെച്ച എഎപി എംഎൽഎ സസ്പെൻഷനിൽ

പഞ്ചാബിലെ മൗർ മണ്ഡലത്തിൽ നിന്നുള്ള എംഎൽഎ മൈസർഖാനയെ പാർട്ടിയിൽ നിന്ന് സസ്പെൻഡ് ചെയ്തു. പാർട്ടി വിരുദ്ധ പ്രവർത്തനങ്ങളും അച്ചടക്ക ലംഘനവും ചൂണ്ടിക്കാണിച്ചാണ് ആം ആദ്മി പാർട്ടി ഈ നടപടി സ്വീകരിച്ചിരിക്കുന്നത്.

സ്വന്തം മണ്ഡലത്തിലെ സ്കൂളുകളിൽ ആവശ്യത്തിന് അധ്യാപകരില്ലെന്ന വിഷയം ഉന്നയിച്ച് അദ്ദേഹം സമൂഹമാധ്യമങ്ങളിൽ വികാരാധീനനായി ഒരു വീഡിയോ പങ്കുവെച്ചിരുന്നു. ഇതിന് പിന്നാലെയാണ് പാർട്ടി അദ്ദേഹത്തിനെതിരെ കടുത്ത നടപടിയുമായി മുന്നോട്ട് വന്നത്.

സുഖ്‌വീർ സിങ്ങിന്റെ പ്രാഥമിക അംഗത്വമാണ് പാർട്ടി പ്രസ്താവനയിലൂടെ സസ്‌പെൻഡ് ചെയ്തതായി അറിയിച്ചത്. എന്നാൽ എംഎൽഎയുടെ വീഡിയോയും ഈ സസ്‌പെൻഷനും തമ്മിൽ നേരിട്ട് ബന്ധമുള്ളതായി പാർട്ടി ഔദ്യോഗികമായി സ്ഥിരീകരിച്ചിട്ടില്ല.

അച്ചടക്കമില്ലായ്മയും പാർട്ടി വിരുദ്ധ പ്രവർത്തനങ്ങളും മാത്രമാണ് നടപടിക്ക് കാരണമായി പ്രസ്താവനയിൽ വ്യക്തമാക്കിയിട്ടുള്ളത്. തന്റെ മണ്ഡലത്തിലെ സർക്കാർ വിദ്യാലയങ്ങളിൽ നിലനിൽക്കുന്ന അധ്യാപകരുടെ കുറവ് പരിഹരിക്കണമെന്നായിരുന്നു വീഡിയോയിൽ സുഖ്‌വീർ സിങ് ആവശ്യപ്പെട്ടത്.

അധ്യാപകർ ഇല്ലാത്തതിനാൽ വിദ്യാർത്ഥികൾ നേരിടുന്ന പ്രതിസന്ധികളെക്കുറിച്ച് സംസാരിക്കുന്നതിനിടയിൽ അദ്ദേഹം വികാരാധീനനാകുകയായിരുന്നു. ഈ ദൃശ്യങ്ങൾ സമൂഹമാധ്യമങ്ങളിൽ വലിയ തോതിൽ ചർച്ച ചെയ്യപ്പെടുകയും ശ്രദ്ധനേടുകയും ചെയ്തിരുന്നു.

എംഎൽഎയുടെ ഈ വീഡിയോ പങ്കുവെച്ചുകൊണ്ട് ബിജെപി നേതാവ് രവ്‌നീത് സിങ് ബിട്ടു പഞ്ചാബ് സർക്കാരിന്റെ വിദ്യാഭ്യാസ മാതൃകയ്ക്കെതിരെ രൂക്ഷ വിമർശനവുമായി രംഗത്തെത്തി. സ്വന്തം പാർട്ടിയിലെ എംഎൽഎയ്ക്ക് മണ്ഡലത്തിലെ സ്കൂളുകളിൽ അധ്യാപകരെ ആവശ്യപ്പെട്ട് സമൂഹമാധ്യമങ്ങളിൽ കരയേണ്ടി വരുന്നത് സംസ്ഥാനത്തെ വിദ്യാഭ്യാസ രംഗത്തിന്റെ യഥാർത്ഥ അവസ്ഥയാണ് കാണിക്കുന്നതെന്ന് അദ്ദേഹം ആരോപിച്ചു.

പഞ്ചാബ് സർക്കാരിന്റെ വിദ്യാഭ്യാസ അവകാശവാദങ്ങളുടെ പൊള്ളത്തരമാണ് സ്വന്തം എംഎൽഎയുടെ കണ്ണീറിലൂടെ വെളിച്ചത്തായതെന്നും ബിട്ടു കൂട്ടിച്ചേർത്തു.