അനധികൃത മദ്യ, മയക്കുമരുന്ന് വിൽപ്പനയുടെ പ്രധാന കേന്ദ്രം; പരിശോധനക്കെത്തിയ എക്സൈസ് ഉദ്യോഗസ്ഥർക്കുനേരെ വിഷപാമ്പുകളുടെ ആക്രമണവും; എരുമേലി മാലാഖമാരുടെ താഴ്വരയിൽ ചാരായവാറ്റുകാർ അറസ്റ്റിൽ; പിടിയിലായത് കണമല, കരോട്ട് സ്വദേശികൾ
എരുമേലി: മാലാഖമാരുടെ താഴ് വരയിൽ ചാരായ വാറ്റുകാർ പിടിയിൽ
എരുമേലി എക്സൈസ് ഓഫീസ് പരിധിയിൽ നിരവധി ചാരായ വാറ്റു കേസുകളിൽ പ്രതിയും ഒളിവിൽ കഴിഞ്ഞു വന്നിരുന്നതുമായ കണമല എഴുകുംമൺ സ്വദേശി വാക്കയിൽ വീട്ടിൽ കരുണാകരൻ നായർ മകൻ പ്രസാദ്, കരോട്ട് വെച്ചൂർ വീട്ടിൽ തോമസ് വർഗ്ഗീസ് മകൻ ജോജാ കെ തോമസ് എന്നിവരാണ് പിടിയിലായത്.
ശബരിമല മണ്ഡല മഹോത്സവത്തിൻ്റെ മുന്നോടിയായി എക്സൈസ് ഇൻസ്പെക്ടർ അൽഫോൻസ് ജേക്കബിൻ്റെ നേതൃത്വത്തിലുള്ള കോട്ടയം എക്സൈസ് എൻഫോഴ്സ്മെൻ്റ് ആൻഡ് ആൻ്റിനാർക്കോട്ടിക് സ്പെഷ്യൽ സ്ക്വാഡ് പാർട്ടി എരുമേലി, മുക്കൂട്ടുതറ, കണമല ,എയ്ഞ്ചൽവാലി ഭാഗങ്ങളിൽ നടത്തിയ പരിശോധനയ്ക്കിടയിൽ ലഭിച്ച രഹസ്യവിവരത്തിൻ്റെ അടിസ്ഥാനത്തിൽ പ്രസാദ് താമസിക്കുന്ന വീട്ടിൽ നടത്തിയ പരിശോധനയിൽ വീട്ടിൽ നിന്നും 1 ലിറ്റർ ചാരായം 60 ലിറ്റർ കോട എന്നിവ കണ്ടെടുത്ത് വീട്ടുടമയായ പ്രസാദിനെ അറസ്റ്റ് ചെയ്ത് കേസെടുക്കുകയായിരുന്നു.
തേർഡ് ഐ ന്യൂസിന്റെ വാട്സ് അപ്പ് ഗ്രൂപ്പിൽ അംഗമാകുവാൻ ഇവിടെ ക്ലിക്ക് ചെയ്യുക
Whatsapp Group 1 | Whatsapp Group 2 |Telegram Group
എക്സൈസ് നടത്തിയ മറ്റൊരു പരിശോധനയിൽ പ്രസാദിൻ്റെ കൂട്ടാളി ജോജോ കെ തോമസിനെ ഇയാളുടെ വീട്ടിൽ നിന്നും 4 ലിറ്റർ ചാരായം, 60 ലിറ്റർ കോട, 15 ലിറ്റർ പനം കള്ള്, ഗ്യാസ് സിലിണ്ടർ, ഗ്യാസ് സ്റ്റൗ അടക്കം വാറ്റുപകരണങ്ങൾ എന്നിവ സഹിതം അറസ്റ്റ് ചെയ്തു കേസെടുത്തു.
ഇവരുടെ അറസ്റ്റിനെ തുടർന്ന് സ്ഥലത്തെ ചാരായ, അനധികൃത മദ്യ, മയക്കുമരുന്ന് വില്പന അവസാനിപ്പിച്ച് തരണമെന്നാവശ്യപ്പെട്ടുള്ള നിരവധി ഫോൺ കോളുകളാണ് ഉദ്യോഗസ്ഥർക്ക് ലഭിക്കുന്നത്. സന്ധ്യ മയങ്ങിയ സമയത്ത് പരിശോധനക്കെത്തിയ ഉദ്യോഗസ്ഥർ ഭാഗ്യം കൊണ്ടു മാത്രമാണ് പരിശോധനക്കിടയിൽ വിഷപ്പാമ്പിൻ്റെ കടിയേൽക്കാതെ രക്ഷപ്പെട്ടത്.
പ്രിവൻ്റീവ് ഓഫീസർ ട്രേഡ് നൗഷാദിന് നേരെ പത്തി ഉയർത്തി എത്തിയ മൂർഖൻ പാമ്പിൻ്റെ ശ്രദ്ധ പ്രിവൻ്റീവ് ഓഫീസർ അനു വി ഗോപിനാഥ് നിലത്ത് വടി കൊണ്ട് തട്ടിമാറ്റിയതിനെ തുടർന്ന് കടിയേൽക്കാതെ രക്ഷപെടുകയായിരുന്നു. പ്രദേശത്ത് പുലി ഉൾപ്പെടെയുള്ള വന്യമൃഗങ്ങളുടെയും രാജവെമ്പാല ഉൾപ്പെടെയുള്ള വിഷപ്പാമ്പുകളുടെയും സാന്നിദ്ധ്യമുള്ളതായി നാട്ടുകാർ പറഞ്ഞു.
ജോജോ കെ തോമസ് മണ്ഡലകാലത്ത് തീർത്ഥാനട പാതയിൽ ഹോട്ടൽ നടത്തുകയും അതിൻ്റെ മറവിൽ വ്യാപകമായി ചാരായവില്പന നടത്തിവന്നിരുന്ന ആളാണ് എന്നും ഇയാളുടെ അറസ്റ്റ് സത്യസന്ധമായി കച്ചവടം നടത്തുന്നവർക്ക് ഒരു അനുഗ്രഹമാണെന്നും വ്യാപാരികൾ പറയുന്നു.
പ്രതികളെ ചോദ്യം ചെയ്തതിൽ നിന്നും കൂട്ടാളികളെക്കുറിച്ചും പ്രദേശത്തെ മറ്റ് ചാരായ വാറ്റുകാരെക്കുറിച്ചും അവരുടെ വാറ്റുസങ്കേതങ്ങളെക്കുറിച്ചും കൂടുതൽ വിവരങ്ങൾ ലഭ്യമായിട്ടുണ്ട്. വരും ദിവസങ്ങളിൽ കൂടുതൽ പരിശോധനകളും അറസ്റ്റുകളും ഉണ്ടാകുമെന്ന് ഉദ്യോഗസ്ഥർ അറിയിച്ചു.
അറസ്റ്റ് ചെയ്ത പ്രതികളെയും കേസ് രേഖകളും തൊണ്ടിമുതലുകളും തുടർ നടപടികൾക്കായി എരുമേലി എക്സൈസ് റേഞ്ച് ഓഫീസിലേക്ക് കൈമാറി..
പരിശോധനയിൽ പ്രിവൻ്റീവ് ഓഫീസർ അനു വി ഗോപിനാഥ്, പ്രിവൻ്റീവ് ഓഫീസർ (ഗ്രേഡ്) നൗഷാദ്, സിവിൽ എക്സൈസ് ഓഫീസർമാരായ അനീഷ് രാജ്, നിമേഷ്, പ്രദീപ്, ശ്യാം ശശിധരൻ ഡ്രൈവർ അനിൽ എന്നിവരും പങ്കെടുത്തു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
