വെറും 10,000 രൂപ ബജറ്റിൽ ഇന്ത്യ ചുറ്റാൻ ഇറങ്ങിത്തിരിച്ച് യുവതി; വീഡിയോ സോഷ്യൽ മീഡിയയിൽ വൈറൽ

വളരെ കുറഞ്ഞ ചെലവിൽ രാജ്യമാകെ സഞ്ചരിക്കാൻ സാധിക്കുമെന്ന തെളിയിക്കാനുള്ള ശ്രമത്തിലാണ് ഒരു കണ്ടന്റ് ക്രിയേറ്റർ. വെറും 10,000 രൂപ ബജറ്റിൽ ഇന്ത്യ മുഴുവൻ യാത്ര ചെയ്യുക എന്ന ലക്ഷ്യവുമായി ഇറങ്ങിത്തിരിച്ചിരിക്കുന്ന ഈ പെൺകുട്ടി, ഇൻസ്റ്റാഗ്രാമിലും യൂട്യൂബിലും തന്റെ യാത്രാവിശേഷങ്ങൾ പങ്കുവെച്ചുകൊണ്ട് ഇതിനോടകം തന്നെ സോഷ്യൽ മീഡിയയിൽ വലിയ തരംഗമായി മാറിയിട്ടുണ്ട്.

ഇത്രയും ചെറിയ തുകയ്ക്ക് രാജ്യത്ത് ഇത്രയധികം ദൂരം സഞ്ചരിക്കാൻ സാധിക്കുമോ എന്ന അത്ഭുതത്തിലാണ് നിലവിൽ നെറ്റിസൺസ്. യാത്ര ആരംഭിച്ച് ചുരുങ്ങിയ ദിവസങ്ങൾക്കുള്ളിൽ തന്നെ വെറും 2,000 രൂപ മാത്രം ചെലവഴിച്ച് ആറ് സംസ്ഥാനങ്ങൾ താൻ സന്ദർശിച്ചു കഴിഞ്ഞതായി അവർ വ്യക്തമാക്കുന്നു.

“നിങ്ങൾ ചിലപ്പോൾ ഒരൊറ്റ സ്ഥലം സന്ദർശിക്കാൻ മാത്രം 10,000 രൂപ ചെലവാക്കുമായിരിക്കും. എന്നാൽ, ഇന്ത്യ മുഴുവൻ ചുറ്റിക്കാണുകയാണ് എന്റെ ലക്ഷ്യം.

കേൾക്കുമ്പോൾ തമാശയായി തോന്നാം, പക്ഷേ ഇതൊരു തമാശയല്ല; ഞാൻ സ്വയം ഏറ്റെടുത്ത ഒരു വെല്ലുവിളിയാണ്. ഇതുവരെ 6 സംസ്ഥാനങ്ങൾ കവർ ചെയ്തു കഴിഞ്ഞു, ഇതിനായി ചെലവായത് വെറും 2,000 രൂപ മാത്രമാണ്” എന്ന് യുവതി വീഡിയോയിലൂടെ പറയുന്നു.

എങ്കിലും, വരും ദിവസങ്ങളിൽ യാത്ര കൂടുതൽ ദുഷ്കരമാകുമെന്ന ആശങ്കയും അവർ പങ്കുവെക്കുന്നുണ്ട്. “എന്നാൽ ഇനിയും ഒരുപാട് സ്ഥലങ്ങൾ ചുറ്റിക്കാണാൻ ബാക്കിയുണ്ട്.

ഈ 10,000 രൂപ ബജറ്റിൽ ഇന്ത്യ മുഴുവൻ എനിക്ക് കാണാൻ സാധിക്കുമോ എന്ന് എനിക്കറിയില്ല” എന്നാണ് അവരുടെ പക്ഷം. “10,000 രൂപയ്ക്ക് താഴെയുള്ള ബജറ്റിൽ ഇന്ത്യ കാണാൻ ശ്രമിക്കുകയാണ്!

ഞാൻ ഈ യാത്രയിൽ അതിജീവിക്കുമോ അതോ പകുതിവഴിയിൽ ഉപേക്ഷിക്കുമോ എന്ന് അറിയാൻ ഒപ്പം കൂടുക. കാരണം ഇത് എളുപ്പമുള്ള ഒരു ചലഞ്ചല്ല, ഒരു വലിയ കഠിനാധ്വാനമാണ്” എന്നാണ് ഈ ദൃശ്യങ്ങൾക്കൊപ്പം നൽകിയിരിക്കുന്ന അടിക്കുറിപ്പ്.

‘Flyying Fishh’ എന്ന ഇൻസ്റ്റാഗ്രാം പേജിലൂടെയാണ് ഈ യാത്രാ ദൃശ്യങ്ങൾ പുറത്തുവന്നിരിക്കുന്നത്. ഈ സാഹസിക യാത്രയുടെ വീഡിയോ വൈറലായതോടെ സമ്മിശ്ര പ്രതികരണങ്ങളാണ് സമൂഹമാധ്യമങ്ങളിൽ ഉയരുന്നത്.

ഒരു വിഭാഗം ആളുകൾ ഇതിന്റെ പ്രായോഗികതയെയും സുരക്ഷയെയും ചോദ്യം ചെയ്യുമ്പോൾ, മറ്റു ചിലർ പെൺകുട്ടിയുടെ ആത്മവിശ്വാസത്തെ പൂർണ്ണമായി പിന്തുണയ്ക്കുന്നു. “10,000 രൂപ ബജറ്റിൽ ഇന്ത്യ മുഴുവൻ യാത്ര ചെയ്യുക എന്നത് എങ്ങനെ സാധ്യമാകും? താമസവും ഭക്ഷണവും ഉറക്കവും ട്രെയിൻ ടിക്കറ്റുമെല്ലാം കണക്കുകൂട്ടിയാൽ പോലും ഇത് സാധ്യമല്ല.

പ്രത്യേകിച്ചും ഒരു പെൺകുട്ടിക്ക് തനിയെ ഇങ്ങനെ യാത്ര ചെയ്യാൻ കഴിയില്ല, ഇതിന്റെ സത്യാവസ്ഥ വിശദീകരിക്കാമോ?” എന്നാണ് ഒരാൾ സംശയം പ്രകടിപ്പിച്ചത്. എന്നാൽ ഈ അഭിപ്രായത്തോട് വിയോജിച്ചുകൊണ്ട് മറ്റൊരു ഉപയോക്താവ് കുറിച്ചത് ഇങ്ങനെയാണ്: “ഒരു രൂപ പോലും ചെലവഴിക്കാതെ ഇന്ത്യയിൽ യാത്ര ചെയ്യുന്ന നിരവധി ആളുകളുണ്ട്.

പിന്നെന്തുകൊണ്ട് 10,000 രൂപ കൊണ്ട് ഇവർക്ക് യാത്ര ചെയ്തുകൂടാ? ബുദ്ധിപൂർവ്വം യാത്ര ചെയ്യാനുള്ള മനസ്സ് ഉണ്ടായാൽ മാത്രം മതി, തീർച്ചയായും ഇതിൽ വിജയിക്കാൻ കഴിയും.”