ടാർവീപ്പയിൽ വീണ നായക്കുട്ടിയെ രക്ഷിച്ചു

പൊറത്തിശ്ശേരി∙ ടാർവീപ്പയിൽ അകപ്പെട്ട നായക്കുട്ടിക്ക് രക്ഷകരായി ഇരിങ്ങാലക്കുട

അഗ്നിരക്ഷാസേന. ചാക്കാലക്കൽ ബെന്നി വീട്ടുവളപ്പിൽ സൂക്ഷിച്ചിരുന്ന തുറന്നുകിടന്ന ടാർവീപ്പയിൽ പെട്ടുപോയ മൂന്ന് മാസം പ്രായമുള്ള നായക്കുട്ടിയെയാണ് അഗ്നി രക്ഷാസേന പുറത്തെടു‍ത്തത്.

ടാറിങ് കഴിഞ്ഞശേഷം വീട്ടുവളപ്പിൽ വച്ചിരുന്ന വീപ്പ ചെരിഞ്ഞുവീണ നിലയിലായിരുന്നു.
വീപ്പയിൽ ശേഷിച്ച ടാറിൽ അകപ്പെട്ട നായ്ക്കുട്ടിയുടെ കരച്ചിൽ ഇന്നലെ രാവിലെയാണ് വീട്ടുകാരുടെ ശ്രദ്ധയിൽപെട്ടത്.   തുടർന്ന് അഗ്നിരക്ഷാസേനയെ വിവരം അറിയിക്കുകയായിരുന്നു. ഭാഗികമായി ടാറിൽ മുങ്ങിയ നായയെ പുറത്തെടുത്ത് ശരീരത്തിൽ പറ്റിയ ടാർ നീക്കം ചെയ്ത് പ്രാഥമിക ചികിത്സ നൽകി.

ഗ്രേഡ് അസിസ്റ്റന്റ് സ്റ്റേഷൻ ഓഫിസർ കെ.വി.സജീവ്, ടി.ടി.പ്രദീപ്, ടി.ബി.സതീഷ്, രാജിത്ത്, വി.ആർ.മഹേഷ്, സജിത്ത് എന്നിവർ രക്ഷാപ്രവർത്തനത്തിന് നേതൃത്വം നൽകി. …