ലോക്കറിൽ സൂക്ഷിച്ചിരുന്ന ഒരു കിലോയിലധികം സ്വർണം മോഷ്ടിച്ചു; മാനേജർ അറസ്റ്റിൽ

വലപ്പാട് ∙ തൃപ്രയാർ വള്ളുവനാട് ക്യാപിറ്റൽ ലിമിറ്റഡ് എന്ന സ്ഥാപനത്തിലെ‍ ലോക്കറിൽ സൂക്ഷിച്ചിരുന്ന ഒരു കിലോയിലധികം പണയ സ്വർണം മോഷ്ടിച്ച കേസിൽ സ്ഥാപനത്തിലെ മാനേജർ അറസ്റ്റിൽ. കിഴുപ്പിള്ളിക്കര കല്ലിങ്ങൽ വീട്ടിൽ ദീപു (34) ആണ് അറസ്റ്റിലായത്.

96,09,963 രൂപ വില വരുന്ന സ്വർണമാണ് മോഷ്ടിച്ചത്. പ്രതിയുമായി പൊലീസ് തെളിവെടുപ്പ് നടത്തി.

മോഷ്ടിച്ച സ്വർണത്തിൽ കുറച്ച് ചാവക്കാടുള്ള സ്ഥാപനത്തിൽ പണയം വച്ചിരുന്നു. അത് വീണ്ടെടുത്തു.

കൂടുതൽ സ്ഥലങ്ങളിൽ പണയം വച്ചിട്ടുണ്ടെന്നാണ് വിവരം.
2025 ഫെബ്രുവരി 22നാണ് സ്ഥാപനത്തിൽ അവസാനമായി ഓഡിറ്റിങ് നടന്നത്. ജൂലൈ 17ന് രാവിലെ സർപ്രൈസ് ഗോൾഡ് ഓഡിറ്റിങ്ങിനായി ജീവനക്കാർ എത്തിയപ്പോൾ, ദീപു ലോക്കർ തുറന്ന് പണയ സ്വർണ ഉരുപ്പടികൾ എടുത്തു നൽകി.

ശേഷം ബാഗുമെടുത്ത് സ്ഥാപനത്തിൽ നിന്ന് പുറത്തേക്ക് പോകുകയായിരുന്നു. ഓഡിറ്റിങ്ങിൽ സ്വർണം മോഷണം പോയതായി കണ്ടെത്തി.

തുടർന്ന് സ്ഥാപനത്തിന്റെ തൃശൂർ ഏരിയാ സെയിൽ മാനേജർ നൽകിയ പരാതിയിലാണ് കേസ് റജിസ്റ്റർ ചെയ്തത്.
കടന്നുകളയാൻ ശ്രമിക്കുന്നതിനിടെ തൃശൂർ റെയിൽവേ സ്റ്റേഷനിൽ നിന്ന് തൃശൂർ റൂറൽ ജില്ലാ പൊലീസ് മേധാവി ബി.കൃഷ്ണകുമാറിന്റെ നേതൃത്വത്തിലുള്ള സംഘമാണ് പ്രതിയെ അറസ്റ്റ് ചെയ്തത്. കൊടുങ്ങല്ലൂർ ഡിവൈഎസ്പി വി.കെ.രാജു, വലപ്പാട് പൊലീസ് സ്റ്റേഷൻ ഇൻസ്പെക്ടർ എം.കെ.രമേഷ്, സബ് ഇൻസ്പെക്ടർ സി.എൻ.എബിൻ, സിപിഒമാരായ അലി, മാഷ് എന്നിവരാണ് അന്വേഷണ സംഘത്തിലുണ്ടായിരുന്നത്.

…