നെയ്യാറ്റിൻകര ജനറൽ ആശുപത്രി: മിനി ആംബുലൻസ് കട്ടപ്പുറത്ത്; വാഹനം തുരുമ്പെടുക്കുന്നു, ബാറ്ററി മോഷണംപോയി

നെയ്യാറ്റിൻകര ∙ നെയ്യാറ്റിൻകര ജനറൽ ആശുപത്രിയിൽ എത്തുന്ന നടക്കാൻ കഴിയാത്ത രോഗികൾക്കു വേണ്ടി, വാങ്ങിയ ഇലക്ട്രിക് മിനി മെഡിക്കൽ ആംബുലൻസ് ‘സഹായി’ കട്ടപ്പുറത്തായിട്ട് കാലങ്ങളായി. ഒഴിഞ്ഞ കോണിൽ നിർത്തിയിട്ടിരുന്ന ഈ വാഹനത്തിന്റെ ബാറ്ററി ആരോ കടത്തിക്കൊണ്ടു പോയി.

കള്ളനെ കണ്ടെത്തിയിട്ടും നടപടി സ്വീകരിച്ചില്ലെന്ന് ആക്ഷേപമുണ്ട്.
ജനറൽ ആശുപത്രിയുടെ അത്യാഹിത വാർഡിൽ എത്തുന്ന രോഗിയെ രക്തം പരിശോധിക്കാനും എക്സ്റേ എടുക്കാനുമൊക്കെ വീൽ ചെയറിലോ സ്ട്രെച്ചറിലോ ആണ് കൊണ്ടു പോയിരുന്നത്. കല്ലുകൾ ഇളകിയ തറയിലൂടെ (ഇന്റർലോക് ചെയ്യുന്നതിനു മുൻപ്) വീൽചെയറിലും സ്ട്രെച്ചറിലും കൊണ്ടു പോകുന്നത് വലിയ പാടായിരുന്നു.

ഈ ബുദ്ധിമുട്ട് കണ്ടിട്ടാണ് എംഎൽഎ, 2019–20 കാലയളവിൽ ആശുപത്രിക്കു വേണ്ടി ‘ഇലക്ട്രിക് മിനി മെഡിക്കൽ ആംബുലൻസ്’ വാങ്ങി നൽകിയത്.
കുറച്ചധികം കാലം ഈ വാഹനം ഉദാത്തമായ പ്രവർത്തനം തന്നെ നടത്തി. വയോധികർക്കും അപകടങ്ങളിൽപ്പെട്ട് നടക്കാനാവാതെ എത്തുന്നവർക്കും  സഹായിയായി.

പിന്നീട് ബാറ്ററി സംബന്ധമായ തകരാറിനെ തുടർന്നാണ് ഒഴിഞ്ഞ കോണിൽ നിർത്തിയിട്ടത്. പുതിയ ബാറ്ററി വാങ്ങാനുള്ള നടപടിക്രമങ്ങൾ കാലങ്ങൾ കഴിഞ്ഞിട്ടും പൂർത്തിയായില്ല.

ഇതിനിടെയാണ് ബാറ്ററി മോഷണം നടന്നത്. 
പൊതുമുതൽ നഷ്ടപ്പെട്ടാൽ പൊലീസിൽ പരാതി നൽകണമെന്നു ചട്ടമുണ്ടെങ്കിലും അതു പാലിച്ചില്ല.  ദീർഘകാലമായി നിർത്തിയിട്ടതു കാരണം ഈ ചെറിയ ആംബുലൻസ് തുരുമ്പെടുത്തു നശിക്കുകയാണ്. വാഹനത്തെ വീണ്ടും പ്രവർത്തിപ്പിക്കണമെന്നാണ് രോഗികളുടെയും ജീവനക്കാരുടെയും ആഗ്രഹം.

…