തടികയറ്റിയ ലോറി പിന്നോട്ടുരുണ്ട് ഓട്ടോറിക്ഷയിലിടിച്ചു; വൻ അപകടം ഒഴിവായി

ചുങ്കപ്പാറ ∙ തടികയറ്റിയെത്തിയ ലോറി ഒാട്ടോറിക്ഷയിലിടിച്ചു. ഓട്ടോ മറിഞ്ഞു.

ഡ്രൈവർ പരുക്കേൽക്കാതെ രക്ഷപ്പെട്ടു. ചുങ്കപ്പാറ – ആലപ്രക്കാട് റോഡിൽ മരുതിക്കുഴിപ്പടിയിൽ ഇന്നലെ വൈകിട്ടു നാലരയോടെയാണ് അപകടം. കോൽത്തടിയുമായി കുത്തുകയറ്റത്തിലൂടെ പോകുകയായിരുന്ന ലോറി യന്ത്രത്തകരാറുമൂലം നിയന്ത്രണം നഷ്ടപ്പെട്ടു പിന്നിലേക്ക് ഉരുളുകയായിരുന്നു.

പിന്നാലെയെത്തിയ ഓട്ടോറിക്ഷയിലിടിച്ച ലോറി 12 മീറ്ററോളം റോഡിലൂടെ നിരങ്ങി.
ലോറി പിന്നോട്ടുരുളുന്നതുകണ്ട ഓട്ടോറിക്ഷ ഡ്രൈവർ ആലപ്ര സ്വദേശി മുരളി (53) വാഹനം നിർത്തി ചാടിയോടിയതിനാൽ പരുക്കേൽക്കാതെ രക്ഷപ്പെടുകയായിരുന്നു.

ഓട്ടോറിക്ഷയിൽ യാത്രക്കാർ ഇല്ലാതിരുന്നതും തൊട്ടുപിന്നാലെ വാഹനങ്ങളെത്താതിരുന്നതും അപകട വ്യാപ്തി കുറച്ചു.

ഇടിയുടെ ആഘാതത്തിൽ ഓട്ടോ പൂർണമായും തകർന്നെങ്കിലും അത്ഭുതകരമായി രക്ഷപ്പെട്ടതിന്റെ ആശ്വാസത്തിലാണ് ഡ്രൈവർ . …