ബസ് ബേ ഇല്ല; വടശേരിക്കര ടൗണിൽ ബസുകൾ നിർത്തുന്നത് റോഡിന് മധ്യേ

വടശേരിക്കര ∙ ടൗണിൽ ബസുകൾ നിർത്തി യാത്രക്കാരെ കയറ്റിയിറക്കുന്നതു തോന്നുംപടി. ശബരിമല പാതയുടെ മധ്യത്തിൽ ബസുകൾ നിർത്തുന്നത് ഗതാഗത തടസ്സത്തിനും ഇടയാക്കുന്നു.  മണ്ണാരക്കുളഞ്ഞി–പ്ലാപ്പള്ളി പാതയിലെ പ്രധാന ടൗണാണു വടശേരിക്കര.

പെരുനാട്, പമ്പ, അത്തിക്കയം, ചിറ്റാർ, സീതത്തോട്, ആങ്ങമൂഴി എന്നിവിടങ്ങളിലേക്കുള്ള ബസുകളെല്ലാം ഇതിലെയാണു കടന്നു പോകുന്നത്. പത്തനംതിട്ട

ഭാഗത്തേക്കുള്ള ബസുകൾ ടൗണിന്റെ മധ്യത്തിലെ കുരിശടിക്കു മുന്നിൽ നിർത്തിയാണു യാത്രക്കാരെ കയറ്റിയിറക്കുന്നത്.ഇവിടെ ബസുകൾ പാതയുടെ വശത്തേക്കു നീക്കി നിർത്താറില്ല.
പാതയുടെ മധ്യത്തിലാണു നിർത്തുന്നത്. പിന്നീട് മുന്നിലും പിന്നിലും നിന്നെത്തുന്ന വാഹനങ്ങൾക്കു കടന്നു പോകാനിടമില്ല.

ഇതു കുരുക്കിനിടയാക്കുന്നു. റാന്നിക്കുള്ള ബസുകൾ പാതയുടെ വശം ചേർത്തു നി‍ർത്തിയിടുമ്പോഴാണ് പത്തനംതിട്ട ബസുകൾ നടുറോഡിൽ കിടക്കുന്നത്.

പൊലീസ് ഇടപെട്ട് ഇതിനു പരിഹാരം കാണണം. ബസ് ബേ അടയാളപ്പെടുത്തുകയാണു വേണ്ടത്.

…