ഷൊർണൂർ – പാലക്കാട് റെയിൽവേ ട്രാക്കിൽ ഇരുമ്പു ക്ലിപ്പുകൾ

ഒറ്റപ്പാലം ∙ ഷൊർണൂർ – പാലക്കാട് റെയിൽവേ ട്രാക്കിൽ അപകടകരമായ രീതിയിൽ ഇരുമ്പു ക്ലിപ്പുകൾ കയറ്റിവച്ച നിലയിൽ. ഒറ്റപ്പാലം, ലക്കിടി റെയിൽവേ സ്റ്റേഷനുകൾക്കു മധ്യേ മായന്നൂർ മേൽപാലത്തിനു സമീപമാണു ക്ലിപ്പുകൾ കണ്ടെത്തിയത്.പാളത്തെയും കോൺക്രീറ്റ് സ്ലീപ്പറിനെയും ബന്ധിപ്പിക്കുന്ന അഞ്ച് ഇആർ ക്ലിപ്പുകളായിരുന്നു ട്രാക്കിനു മുകളിൽ.

പാലക്കാട് ഭാഗത്തേക്കു ട്രെയിനുകൾ കടന്നുപോകുന്ന ട്രാക്കിനു മുകളിലായിരുന്നു ഇരുമ്പു ക്ലിപ്പുകൾ. കഴിഞ്ഞ ദിവസം വൈകിട്ട് ആറോടെയാണു സംഭവം.

എറണാകുളം – പാലക്കാട് മെമുവിന്റെ ലോക്കോ പൈലറ്റാണ് പാളത്തിൽ അസ്വാഭാവികത അനുഭവപ്പെട്ടതായി റിപ്പോർട്ട് ചെയ്തത്.
പിന്നാലെയെത്തിയ നിലമ്പൂർ – പാലക്കാട് പാസഞ്ചർ വേഗം കുറച്ചാണു കടത്തിവിട്ടത്. പിന്നീടു നടത്തിയ പരിശോധനയിൽ 5 ക്ലിപ്പുകൾ വിവിധ ഭാഗങ്ങളിലായി പാളത്തിന് മുകളിൽ കണ്ടെത്തുകയായിരുന്നു.

കട്ടിയുള്ള ഇരുമ്പായതിനാൽ അപകടസാധ്യത ഉണ്ടായിരുന്നുവെന്നാണു വിലയിരുത്തൽ. ട്രെയിൻ അട്ടിമറി ലക്ഷ്യത്തോടെ ക്ലിപ്പുകൾ വച്ചെന്ന കുറ്റത്തിന് ഒറ്റപ്പാലം പൊലീസ് കേസെടുത്തു. അയഞ്ഞു കിടന്നിരുന്ന ക്ലിപ്പുകൾ അഴിച്ചുമാറ്റി ട്രാക്കിൽ കയറ്റിവച്ചതാണെന്നാണു പൊലീസിന്റെ നിഗമനം.

വിജനമായ സ്ഥലമായതിനാൽ പ്രതികളെക്കുറിച്ചു പൊലീസിന് ഇതുവരെ സൂചന ലഭിച്ചിട്ടില്ല. പൊലീസിനു പുറമേ ആർപിഎഫും അന്വേഷണം തുടങ്ങി.നേരത്തെ, ഓടിക്കൊണ്ടിരുന്ന ട്രെയിനിനു നേരെ കല്ലേറുണ്ടായ പ്രദേശമാണിത്.

ഒന്നര വർഷം പിന്നിടുമ്പോഴും ഈ കേസിൽ ഇതുവരെ പ്രതികളെ കണ്ടെത്താനായിട്ടില്ല. നിരീക്ഷണ ക്യാമറകൾ ഇല്ലാത്ത പ്രദേശം കൂടിയാണിത്.
അന്വേഷണം നടത്തണം
ഒറ്റപ്പാലം ∙ റെയിൽപാളത്തിനു മുകളിൽ ക്ലിപ്പ് കാണപ്പെട്ട

സംഭവം ഗൗരവമുള്ളതാണെന്നു ബിജെപി വെസ്റ്റ് ജില്ലാ പ്രസിഡന്റ് പി.വേണുഗോപാലൻ. അട്ടിമറി സംബന്ധിച്ച കേസിൽ പൊലീസും ആർപിഎഫും സമഗ്രാന്വേഷണം നടത്തണമെന്നും അദ്ദേഹം ആവശ്യപ്പെട്ടു.

…