നടക്കാവ് മേൽപാലം: ഉറപ്പു പാലിച്ചില്ല; കലക്ടർ ഉടൻ യോഗം വിളിക്കണമെന്നു ജനകീയ സമിതി

അകത്തേത്തറ ∙ നടക്കാവ് റെയിൽവേ മേൽപാല നിർമാണം ഇഴയുന്നതിനെതിരെ ഉടൻ ബന്ധപ്പെട്ടവരുടെ യോഗം വിളിക്കണമെന്നാവശ്യപ്പെട്ട് മേൽപാലം ജനകീയ സമിതി കലക്ടർക്കു കത്തു നൽകി. നവംബർ ഒന്നിനു കലക്ടറുടെ അധ്യക്ഷതയിൽ ചേർന്ന യോഗത്തിൽ ഡിസംബർ 31നു മുൻപു പ്രവൃത്തികൾ പൂർത്തിയാക്കണമെന്നു നിർദേശിച്ചിരുന്നെങ്കിലും പാലിക്കപ്പെട്ടില്ലെന്നു കത്തിൽ പറയുന്നു.

ഈ സാഹചര്യത്തിൽ കലക്ടർ വീണ്ടും യോഗം വിളിച്ചു തുടർ നടപടി സ്വീകരിക്കണമെന്നാണ് ആവശ്യം. സമിതി കൺവീനർ വിപിൻ ശേക്കുറിയാണു കലക്ടർക്ക് കത്തു നൽകിയിരിക്കുന്നത്.
നിർമാണ പ്രവൃത്തികൾ വൈകരുത്: പഞ്ചായത്ത്
നടക്കാവ് റെയിൽവേ മേൽപാലം പ്രവൃത്തികൾ ഇനിയും വൈകിപ്പിച്ചു ജനത്തെ ദുരിതത്തിലാക്കരുതെന്നു നിർമാണം ഉടൻ പൂർത്തീകരിക്കണമെന്നും അകത്തേത്തറ പഞ്ചായത്ത് പ്രസിഡന്റ് പി.എ.ബിന്ദു, വൈസ് പ്രസിഡന്റ് ജി.സുജിത്ത് എന്നിവർ ആവശ്യപ്പെട്ടു.

റോഡ്സ് ആൻഡ് ബ്രിജസ് ഡവലപ്മെന്റ് കോർപറേഷന്റെ പ്രവൃത്തികൾ മന്ദഗതിയിലാണ്. ഇതിന്റെയെല്ലാം ദുരിതം അനുഭവിക്കുന്നതു പ്രദേശവാസികളും യാത്രക്കാരുമാണ്.

വീഴ്ച തുടരുകയാണ്. ശക്തമായ നടപടി വേണമെന്നും ഇരുവരും ആവശ്യപ്പെട്ടു.
ശക്തമായ നടപടി വേണം: ആക്‌ഷൻ കൗൺസിൽ
നടക്കാവ് മേൽപാല നിർമാണം ഇനിയും വൈകിപ്പിക്കരുത്.

ജനം കടുത്ത യാത്രാ ദുരിതത്തിലാണ്. അധികൃതരടക്കം ഇക്കാര്യം കണ്ടില്ലെന്നു നടിക്കുന്നു.

റെയിൽവേയുടെ പ്രവൃത്തികൾ ഏറെക്കുറെ പൂർത്തിയായിട്ടുണ്ട്. റോഡ്സ് ആൻഡ് ബ്രിജസ് ഡവലപ്മെന്റ് കോർപറേഷന്റെ പ്രവൃത്തികൾ ഇപ്പോഴും ഇഴയുകയാണ്.

നടപടി വേണം. ഇനിയും വീഴ്ച പാടില്ലെന്നു മേൽപാലം ആക്‌ഷൻ കൗൺസിൽ കൺവീനർ കെ.ശിവരാജേഷ് ആവശ്യപ്പെട്ടു.
വേഗത്തിലാക്കാൻ നിർദേശിച്ചു: എംഎൽഎ
നടക്കാവിൽ മേൽപാലം പ്രവൃത്തികൾ വേഗത്തിലാക്കാൻ റോഡ്സ് ആൻഡ് ബ്രിജസ് ഡവലപ്മെന്റ് കോർപറേഷനു നിർദേശം നൽകിയതായി എ.പ്രഭാകരൻ എംഎൽഎ അറിയിച്ചു.

ഈ മാസം പകുതിയോടെ ഗർഡറുകൾ എത്തിക്കുമെന്നാണ് ആർബിഡിസികെ അറിയിച്ചിട്ടുള്ളത്. ഇതര പ്രവൃത്തികളും വേഗത്തിലാക്കണം.

ഇക്കാര്യത്തിൽ അവരുമായി നിരന്തരം ചർച്ച നടത്തുന്നുണ്ട്. മാർച്ച് 31ന് മുൻപു മേൽപാല നിർമാണം പൂർത്തിയാക്കുമെന്നാണ് ആർബിഡിസികെയുടെ ഉറപ്പെന്നും എംഎൽഎ പറഞ്ഞു.

… FacebookTwitterWhatsAppTelegram