കോട്ടയം ∙ കൈനകരി വില്ലേജ് ബോട്ട് ക്ലബ് തുഴഞ്ഞ വീയപുരം ചുണ്ടൻ കോട്ടയം മത്സര വള്ളംകളിയിൽ ജലരാജാവ്. പള്ളാത്തുരുത്തി ബോട്ട് ക്ലബ്ബിന്റെ മേൽപാടം ചുണ്ടനാണ് രണ്ടാം സ്ഥാനം.
പുന്നമട ബോട്ട് ക്ലബ് തുഴഞ്ഞ നടുഭാഗം ചുണ്ടൻ മൂന്നാമതെത്തി.
3 ഹീറ്റ്സുകളിലായി 9 ചുണ്ടൻവള്ളങ്ങളാണ് താഴത്തങ്ങാടിയിൽ മാറ്റുരച്ചത്. ചെറുവള്ളങ്ങളുടെ മത്സരത്തിൽ വെപ്പ് എ ഗ്രേഡ് വിഭാഗത്തിൽ തിരുവാർപ്പ് ബോട്ട് ക്ലബ്ബിന്റെ നെപ്പോളിയൻ ഒന്നാമതെത്തി.
കാഞ്ഞിരം ന്യൂ സ്റ്റാറിന്റെ ഷോട്ട് പുളിക്കത്തറയ്ക്കാണ് രണ്ടാം സ്ഥാനം. വെപ്പ് ബി ഗ്രേഡ് വിഭാഗത്തിൽ കൊണ്ടാക്കൽ ബോട്ട് ക്ലബ്ബിന്റെ പി.ജി.കരിപ്പുഴ ജേതാക്കളായപ്പോൾ അറുപറ ബോട്ട് ക്ലബ്ബിന്റെ ചിറമേൽ തോട്ടുകടവൻ രണ്ടാം സ്ഥാനത്തെത്തി.
കോട്ടയം വെസ്റ്റ് ക്ലബ്ബും ടൂറിസം വകുപ്പും ചേർന്നാണ് മത്സര വള്ളംകളി സംഘടിപ്പിച്ചത്. തിരുവഞ്ചൂർ രാധാകൃഷ്ണൻ എംഎൽഎ, കലക്ടർ ചേതൻ കുമാർ മീണ എന്നിവർ സമ്മാനം വിതരണം ചെയ്തു.
തീപാറും പോരു തന്നെ
ആവേശം അലയടിച്ച് കോട്ടയം മത്സര വള്ളംകളിയും താഴത്തങ്ങാടി ചാംപ്യൻ ബോട്ട് ലീഗും.
കൈനകരി വില്ലേജ് ബോട്ട് ക്ലബ് തുഴഞ്ഞ വീയപുരം ചുണ്ടനു പള്ളാത്തുരുത്തി ബോട്ട് ക്ലബ്ബിന്റെ മേൽപ്പാടം ചുണ്ടനും തമ്മിലുണ്ടായത് 200 മൈക്രോ സെക്കൻഡിന്റെ വ്യത്യാസം. വീയപുരം (വിബിസി കൈനകരി ക്ലബ്), നടുഭാഗം (പിബിസി പുന്നമട), മേൽപാടം (പിബിസി), നിരണം (നിരണം ബോട്ട് ക്ലബ്), പായിപ്പാടൻ (കെടിബിസി), നടുവിലെ പറമ്പൻ (ഐബിസി), കാരിച്ചാൽ (കെസിബിസി), ചെറുതന (തെക്കേക്കര ബിസി), ചമ്പക്കുളം (ചങ്ങനാശേരി ബിസി) എന്നി ചുണ്ടൻവള്ളങ്ങളാണ് 3 റൗണ്ടുകളിലായി മത്സരിച്ചത്.
ഇരുട്ടുകുത്തി എ ഗ്രേഡ് വിഭാഗത്തിൽ പുളിങ്കുന്ന് ടൗൺ ബോട്ട് ക്ലബ്ബിന്റെ മൂന്നുതൈക്കനും ചെന്നിത്തല ടൗൺ ബോട്ട് ക്ലബ്ബിന്റെ തുരുത്തിത്തറയും യഥാക്രമം ഒന്നും രണ്ടും സ്ഥാനം നേടി. ഇരുട്ടുകുത്തി ബി ഗ്രേഡ് വിഭാഗത്തിൽ കൊറുംകോട്ട
കെബിസിയുടെ താണിയൻ ദ ഗ്രേറ്റ് ജേതാക്കളായപ്പോൾ സിറ്റി ബോട്ട് ക്ലബ്ബിന്റെ ഡാനിയേൽ രണ്ടാം സ്ഥാനം നേടി. ചുരുളൻ വള്ളങ്ങളുടെ മത്സരത്തിൽ കുമരംകരി ബിബിസിയുടെ വേലങ്ങാടൻ, വേളൂർ പുളിക്കമറ്റം ബോട്ട് ക്ലബ്ബിന്റെ കോടിമത, കുമരകം തോപ്പിൽ പിബിസിയുടെ മൂഴി എന്നിവ ഒന്നു മുതൽ മൂന്നു വരെ സ്ഥാനങ്ങളിലെത്തി. ചാംപ്യൻസ് ബോട്ട് ലീഗിന്റെ ഉദ്ഘാടനം മന്ത്രി വി.എൻ.
വാസവൻ നിർവഹിച്ചു.
തിരുവഞ്ചൂർ രാധാകൃഷ്ണൻ എംഎൽഎ അധ്യക്ഷത വഹിച്ചു. ഫ്രാൻസിസ് ജോർജ് എംപി ജലഘോഷയാത്ര ഫ്ലാഗ് ഓഫ് ചെയ്തു.
കലക്ടർ ചേതൻകുമാർ മീണ പതാക ഉയർത്തി. വള്ളംകളിയുടെ സുവനീർ ചാണ്ടി ഉമ്മൻ എംഎൽഎ. പ്രകാശനം ചെയ്തു.
ഏറ്റുമാനൂർ ബ്ലോക്ക് പഞ്ചായത്ത് പ്രസിഡന്റ് ആര്യ രാജൻ, തിരുവാർപ്പ് പഞ്ചായത്ത് പ്രസിഡന്റ് ഒ.എസ്.അനീഷ്, നഗരസഭാംഗങ്ങളായ ഷേബ മർക്കോസ്, ജിഷ ജോഷി, വി.ബി.ബിനു, വള്ളംകളി ജനറൽ കൺവീനർ സുനിൽ എബ്രഹാം, സെക്രട്ടറി സാജൻ പി.ജേക്കബ് എന്നിവർ പ്രസംഗിച്ചു. കോട്ടയം ബസേലിയസ് കോളജ് എൻഎസ്എസ് വിദ്യാർഥികൾ ജങ്കാറിൽ ലഹരിവിരുദ്ധ സന്ദേശ പരിപാടി നടത്തി.
വോട്ട് ബോട്ട് വന്നു
വള്ളംകളി വേദിയിൽ വോട്ടർമാരെ ബോധവൽകരിക്കുന്നതിനായി ജില്ലാ തിരഞ്ഞെടുപ്പ് വിഭാഗം അവതരിപ്പിച്ച വോട്ടു ബോട്ട് ശ്രദ്ധ നേടി.
സിസ്റ്റമാറ്റിക് വോട്ടർ എജ്യുക്കേഷൻ ആൻഡ് ഇലക്ടറൽ പാർട്ടിസിപ്പേഷൻ(സ്വീപ്) ‘എന്റെ വോട്ട് എന്റെ അവകാശം’ എന്ന സന്ദേശമാണ് അലങ്കരിച്ച ബോട്ടിൽ പ്രദർശിപ്പിച്ചത്. കലക്ടർ ചേതൻ കുമാർ മീണയുടെ നേതൃത്വത്തിൽ സ്വീപ് മോഡൽ ഓഫിസർ പി.എ.അമാനത്ത്, ഇലക്‌ഷൻ ഡപ്യൂട്ടി കലക്ടർ ഷീബ കുര്യൻ, തിരഞ്ഞെടുപ്പ് വിഭാഗം ഉദ്യോഗസ്ഥരായ ഗിരീഷ് കുമാർ, അജിത്ത്, വി.എസ്.രമേശ്, ഇലക്‌ഷൻ ലിറ്ററസി കോഓർഡിനേറ്റർ ടി.സത്യൻ എന്നിവർ നേതൃത്വം നൽകി.
… FacebookTwitterWhatsAppTelegram
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
