ആമ്പൽ പൂവേ…നീയറിഞ്ഞോ…! അയ്മനത്ത് ആമ്പൽ വസന്തം കനാൽ ഫെസ്റ്റ്

അയ്മനം ∙ സഞ്ചാരികളുടെ മനം നിറയ്ക്കാൻ അയ്മനം ഗ്രാമം ഒരുങ്ങുന്നു. രാജ്യാന്തര അംഗീകാരം  നേടിയ ഗ്രാമം കാഴ്ചയുടെ പുതിയ അനുഭവം ഒരുക്കുകയാണ്.

പഞ്ചായത്തിലെ രണ്ടാം വാർഡിൽ പുത്തൂക്കരി പാടത്ത് ആമ്പൽ പൂക്കൾ നിറഞ്ഞു നിൽക്കുകയാണ്. ഈ കാഴ്ച കാണാൻ സ്വദേശികളും വിദേശികളും അടക്കം ഒട്ടേറെ വിനോദസഞ്ചാരികളാണ്  എത്തുന്നത്.

മൂന്നു ദിവസത്തെ ഫെസ്റ്റിന്റെ ഉദ്ഘാടനം നാളെ 9 ന് മന്ത്രി വി എൻ വാസവൻ നിർവഹിക്കും.പഞ്ചായത്ത് റസിഡൻസ് അസോസിയേഷനുകൾ , പാടശേഖര സമിതി, ഉത്തരവാദിത്ത ടൂറിസം മിഷ, അരങ്ങ് സാസ്കാരിക കൂട്ടായ്മ എന്നിവ ചേർന്നാണ് പുത്തൂക്കരിയിൽ ടൂറിസം ഉത്സവം ഒരുക്കുന്നത്. നാളെ ആരംഭിക്കുന്ന ആമ്പൽ വസന്തം കനാൽ ഫെസ്റ്റ് രാവിലെ ആറു മുതൽ പത്തു വരെയാണ് . മൂന്നു ദിവസം നീണ്ടുനിൽക്കുന്ന ടൂറിസം ഫെസ്റ്റിന്റെ ഭാഗമായി നാടൻ കലാകായിക മത്സരങ്ങൾ, ആമ്പൽ ജലയാത്ര, കയാക്കിങ്, കുട്ടവഞ്ചി, ശിക്കാരി വള്ളയാത്ര, നാടൻ ഭക്ഷ്യമേള, വല വീശൽ മത്സരം, ഓലമെടയൽ മത്സരം, എട്ടു കളി, പകിട

കളി മത്സരങ്ങൾ എന്നിവയും വീട്ടമ്മമാർക്കായി രുചിക്കൂട്ട് പാചക മത്സരവും ഒരുക്കിയിട്ടുണ്ട്.
ഗ്രാമീണ കാഴ്ചകളെ തൊട്ടറിഞ്ഞ് അനുഭവിക്കാം എന്നതാണു അയ്മനം ആമ്പൽ വസന്തം കനാൽ ഫെസ്റ്റിന്റെ പ്രത്യേകത. വഞ്ചിയാത്രയും ഗ്രാമത്തെ അടുത്തറിയാനുമുള്ള പാക്കേജുമാണു പുത്തൂക്കരിയിൽ നൽകുന്നത്.

ശിക്കാരി വള്ളത്തിലും, ചെറുവള്ളങ്ങളിലും, ബോട്ടിലും പുത്തൂക്കരിയിൽ നിന്ന് ചീപ്പുങ്കലിലേക്കു യാത്രയും ഒരുക്കിയിട്ടുണ്ട്. മനോഹരമായ കനാൽ സൗന്ദര്യം ആസ്വദിക്കുന്നതിനൊപ്പം കയർപിരി, തെങ്ങുകയറ്റം , ഓലമെടയൽ, പാ നെയ്ത്ത്, മീൻ പിടിത്തം, കള്ള് ചെത്ത് തുടങ്ങിയവ കാണാം.  നാടൻ ഭക്ഷണം ഉണ്ടാക്കുന്നതു കാണുവാനും ആസ്വദിക്കാനും സാധിക്കുന്നതിനുള്ള സൗകര്യം ഒരുക്കിയിട്ടുണ്ട്.

ഫെസ്റ്റ് മൂന്നുദിവസം കൊണ്ട് അവസാനിക്കുമെങ്കിലും സഞ്ചാരികൾക്കായുള്ള ആമ്പൽ വസന്തം സീസൺ അടുത്തമാസം ആദ്യവാരം വരെ തുടരും. ബോട്ട് യാത്ര സൗകര്യവും ലഭ്യമാക്കും.

…