പള്ളിക്കര–ചിത്രപ്പുഴ റോഡ് നിർമാണം മന്ദഗതിയിൽ

പള്ളിക്കര–ചിത്രപ്പുഴ റോഡ് നിർമാണം മന്ദഗതിയിൽ കിഴക്കമ്പലം ∙ പള്ളിക്കര–ചിത്രപ്പുഴ റോഡ് നിർമാണം മന്ദഗതിയിൽ. മാർച്ച് അവസാനത്തോടെ റോഡ് നിർമാണം ആരംഭിച്ചതാണെങ്കിലും റോഡിന്റെ പല ഭാഗങ്ങളും കുത്തിപ്പൊളിച്ചിട്ടിരിക്കുകയാണ്. പള്ളിക്കര കുടുംബാരോഗ്യ കേന്ദ്രത്തിന്റെ മുൻവശത്തെ റോഡ് കുത്തിപ്പൊളിച്ചിട്ടു മാസങ്ങളായി.

റോഡിന്റെ കയറ്റം കുറയ്ക്കാനായിട്ടാണു റോഡ് കുത്തിപ്പൊളിച്ചത്. കൂടാതെ പെരിങ്ങാലയിൽ തോടിന്റെ വീതി കൂട്ടി സ്ലാബ് ഇടാനായി റോഡ് കുത്തിപ്പൊളിച്ചെങ്കിലും പാതിവഴിയിൽ നിർമാണം നിർത്തിവച്ചിരിക്കുകയാണ്.

ഒരു ഭാഗത്ത് കൂടി മാത്രമാണ് വാഹനങ്ങൾക്ക് സഞ്ചരിക്കാനാകുന്നത്. ഇതോടെ പെരിങ്ങാല ഭാഗത്ത് ഗതാഗതക്കുരുക്ക് രൂക്ഷമായി.

പാടത്തിക്കര മൂലേക്കുഴി കയറ്റത്ത് റോഡിന്റെ വശങ്ങളിലുള്ള കരിങ്കൽക്കെട്ട് നിർമാണം പൂർത്തീകരിച്ചെങ്കിലും റോഡ് വശങ്ങളിൽ കോൺക്രീറ്റ് ചെയ്തിട്ടില്ല. റോഡ് വീതി കൂട്ടാൻ കരിമുകൾ മുതൽ അമ്പലപ്പടി വരെയുള്ള ഭാഗത്ത് മെറ്റൽ വിരിച്ചെങ്കിലും ശക്തമായ മഴയിൽ മെറ്റൽ ഒലിച്ചു റോഡിലേക്ക് വീണിട്ടുണ്ട്.

അമ്പലപ്പടി, മൂലേക്കുഴി കയറ്റം എന്നിവിടങ്ങളിൽ റോഡരികിൽ വലിയ കുഴികൾ രൂപപ്പെട്ടു. വെളിച്ചമില്ലാത്ത ഇടങ്ങളി‍ൽ രാത്രി വലിയ അപകടങ്ങൾക്കു സാധ്യതയുണ്ട്.

കൂടാതെ കരിമുകൾ കാർബൺ കമ്പനിക്ക് സമീപമുള്ള ചപ്പാത്തിൽ വെള്ളക്കെട്ട് രൂക്ഷമാണ്. കലുങ്ക് നിർമിക്കാനുള്ള നടപടികൾ ആരംഭിച്ചിട്ടില്ല.

പാടത്തിക്കര ചപ്പാത്തിൽ മണ്ണ് ഒലിച്ചെത്തി അപകട സാധ്യത വർധിച്ചിട്ടുണ്ട്.

റോഡിന്റെ നിർമാണത്തിന്റെ 12 കോടി രൂപയാണ് പൊതുമരാമത്ത് വകുപ്പ് അനുവദിച്ചിരിക്കുന്നത്. എന്നാൽ കൃത്യമായി നിർമാണം നടക്കാത്തതു നാട്ടുകാർക്കിടയിൽ ആശങ്ക വർധിപ്പിക്കുന്നുണ്ട്.

അപകടസാധ്യതകൾ ഒഴിവാക്കി റോഡ് നിർമാണം നടത്തണമെന്നാണു നാട്ടുകാരുടെ ആവശ്യം.

…