മൂവാറ്റുപുഴ∙ മണ്ണിടിഞ്ഞ് എംസി റോഡ് തകരാതിരിക്കാൻ കൂറ്റൻ യന്ത്രം എത്തിച്ച് മെറ്റൽ ഷീറ്റ് പൈലിങ് ആരംഭിച്ചു. കച്ചേരിത്താഴം പാലത്തിനു സമീപം റോഡിനു നടുവിൽ നീളത്തിൽ തുരന്ന് 27 അടി താഴ്ചയിലേക്കു മെറ്റൽ ഷീറ്റ് പൈലിങ് നടത്തുന്ന ജോലികളാണു നടക്കുന്നത്.
പാലത്തിനു സമീപം റോഡിൽനിന്നുള്ള മണ്ണിടിച്ചിൽ തടഞ്ഞാൽ മാത്രമാണു ഭൂമിക്കടിയിലെ കാന കണ്ടെത്തി തകരാർ പരിഹരിക്കാനുള്ള ജോലി ആരംഭിക്കാനാവൂ.മൂവാറ്റുപുഴയിലെ മേരി മാതാ കൺസ്ട്രക്‌ഷൻ കമ്പനിയുടെ യന്ത്രമാണു മെറ്റൽ പൈലിങ് നടത്തുന്നത്.പൈലിങ്ങിനിടെ മണ്ണിടിച്ചിൽ ചെറിയ തോതിലുണ്ടാകുന്നുണ്ട്.
ഇന്നലെ രാവിലെ പാലം അടച്ച് പൈലിങ് ആരംഭിച്ചു. 27 അടി നീളമുള്ള കൂറ്റൻ മെറ്റൽ ഷീറ്റുകളാണു മണ്ണിലേക്ക് അടിച്ചിരുത്തുന്നത്.
ഭൂമിക്കടിയിൽ കരിങ്കൽകെട്ടു പോലുള്ള നിർമാണത്തിൽ തട്ടി പൈലിങ് ഇടയ്ക്കിടെ തടസ്സപ്പെട്ടു. ശക്തിയായി പൈലിങ് ആരംഭിച്ചപ്പോൾ യന്ത്രത്തിനും തകരാർ സംഭവിച്ചു.പിന്നീടു തകരാർ പരിഹരിച്ച ശേഷമാണു പൈലിങ് പുനരാരംഭിച്ചത്.
പൈലിങ് പൂർത്തിയാകുന്നതോടെ മണ്ണിടിച്ചിൽ പൂർണമായി ഒഴിവാക്കാനാവുമെന്നാണ് കരാർ കമ്പനിയുടെ പ്രോജക്ട് എൻജിനീയർ പറയുന്നത്. ഇതിനു ശേഷം കേരള ഹൈവേ റിസർച് ഇൻസ്റ്റിറ്റ്യൂട്ട് ഉദ്യോഗസ്ഥർ നൽകുന്ന റിപ്പോർട്ടുകളുടെ അടിസ്ഥാനത്തിലാകും തുടർപ്രവർത്തനങ്ങൾ.
എംസി റോഡ് സ്തംഭിച്ചു
മൂവാറ്റുപുഴ∙ മൂവാറ്റുപുഴയാറിനു കുറുകെയുള്ള പാലം അടച്ചിട്ട് റോഡ് നീളത്തിൽ തുരന്നു പൈലിങ് ആരംഭിച്ചതോടെ എംസി റോഡ് സ്തംഭിച്ചു.
പഴയ പാലത്തിലൂടെ ഒരു ഭാഗത്തേക്കു മാത്രമാണു ഗതാഗതം അനുവദിച്ചത്. മൂവാറ്റുപുഴ നഗരം കടന്നുപോകാൻ വാഹനങ്ങൾ രണ്ടു മണിക്കൂറിലേറെ വേണ്ടിവന്നു.
ഇതോടെ എംസി റോഡിനു പുറമേ, മൂവാറ്റുപുഴ– പുനലൂർ റോഡിലും കൊച്ചി– ധനുഷ്കോടി റോഡിലും വാഹനങ്ങൾ കുരുങ്ങി.കിലോമീറ്ററുകളോളം നീളത്തിലാണു വാഹനങ്ങളുടെ നിര നീണ്ടത്.വാഹനങ്ങൾ തിരിച്ചുവിട്ട ഇഇസി ബൈപാസ് റോഡും കാവുംപടി റോഡും കിഴക്കേക്കര റോഡും എല്ലാം ഗതാഗതക്കുരുക്കിൽ വീർപ്പുമുട്ടി.
എംസി റോഡിലൂടെ നെടുമ്പാശേരി വിമാനത്താവളത്തിലേക്കു പോകുന്നവരും മണിക്കൂറുകളോളം ഗതാഗതക്കുരുക്കിൽ പെട്ടു.
മന്ത്രിമാരുടെ വാഹനങ്ങളും ആംബുലൻസുമെല്ലാം റോഡിൽ കുരുങ്ങിക്കിടന്നു. പൊലീസിനും ട്രാഫിക് പൊലീസിനും കാര്യമായി ഒന്നും ചെയ്യാൻകഴിയാത്ത സ്ഥിതിയായിരുന്നു. പൈലിങ് പൂർത്തിയായാൽ വാഹനങ്ങൾ ഇന്നു രാവിലെതന്നെ പാലത്തിലൂടെ കടത്തിവിടാനാണു തീരുമാനം.എന്നാൽ കുഴി മൂടുന്നതിനു മുൻപേ കാരണം കണ്ടെത്താൻ വിപുലമായ പരിശോധന നടത്താൻ നിർദേശം ഉണ്ടായാൽ പാലം വീണ്ടും അടച്ചിട്ടു പരിശോധന നടത്തേണ്ടിവരും.
…
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
About the Author
