നിയമസഭാ തിരഞ്ഞെടുപ്പ്: വോട്ടിങ് യന്ത്രങ്ങൾ സജ്ജമാക്കൽ ഇന്നു തുടങ്ങും

കാക്കനാട്∙ നിയമസഭാ തിരഞ്ഞെടുപ്പിനുള്ള വോട്ടിങ് യന്ത്രങ്ങൾ സജ്ജമാക്കൽ ഇന്നു തുടങ്ങും. കലക്ടറേറ്റിൽ ഇലക്‌ഷൻ ഗോഡൗണിനു മുൻപിൽ പ്രത്യേകം പന്തൽ ഒരുക്കിയാണ് വോട്ടിങ് യന്ത്രങ്ങളുടെ അറ്റകുറ്റപ്പണി നടത്തുന്നത്.

ഭാരത് ഇലക്ട്രോണിക്സ് കോർപറേഷനിലെ വിദഗ്ധർ മേൽനോട്ടം വഹിക്കും. 14 നിയമസഭാ മണ്ഡലങ്ങളിലെ 3,148 പോളിങ് ബൂത്തുകളിൽ ഉപയോഗിക്കാനുള്ള ബാലറ്റ് യൂണിറ്റുകളും കൺട്രോൾ യൂണിറ്റുകളുമാണ് അറ്റകുറ്റപ്പണി ചെയ്യുന്നത്. ലോക്സഭ തിരഞ്ഞെടുപ്പിൽ ഉപയോഗിച്ച യന്ത്രങ്ങളിലെ വോട്ടുകൾ നീക്കം ചെയ്യുന്ന നടപടിയാണ് ആദ്യം പൂർത്തിയാക്കുക. 
അറ്റകുറ്റപ്പണി പൂർത്തിയാക്കുന്ന വോട്ടിങ് യന്ത്രങ്ങൾ സുരക്ഷാ മുറിയിലേക്കു മാറ്റും.അടുത്ത മാസം അവസാനം നിയമസഭാ തിരഞ്ഞെടുപ്പ് പ്രഖ്യാപിക്കുമെന്ന വിലയിരുത്തലിലാണു നടപടികൾ. അറ്റകുറ്റപ്പണിയുടെ നോഡൽ ഓഫിസറായി തഹസിൽദാർ ജോസഫ് ആന്റണി ഹെർട്ടിസിനെയും അസിസ്റ്റന്റ് നോഡൽ ഓഫിസറായി ഡപ്യൂട്ടി തഹസിൽദാർ എം.എസ്.ഗോപകുമാറിനെയും ജനറൽ സൂപ്പർവൈസറായി ഡപ്യൂട്ടി തഹസിൽദാർ കെ.പി.പോളിനെയും നിയമിച്ചു.

… FacebookTwitterWhatsAppTelegram