കിടങ്ങറ ഒഴികെയുള്ളിടത്ത് ജലനിരപ്പ് അപകടനിലയ്ക്കു മുകളിൽ; ആശങ്ക ഒഴിയാതെ കുട്ടനാട്

കുട്ടനാട് ∙ ജലനിരപ്പിൽ നേരിയ കുറവുണ്ടായെങ്കിലും കിടങ്ങറ ഒഴികെയുള്ളിടത്ത്  ജലനിരപ്പ് അപകടനിലയ്ക്കു മുകളിൽ തുടരുന്നതിനാൽ ആശങ്ക ഒഴിയാതെ കുട്ടനാട്. നീരേറ്റുപുറത്ത് ഇന്നലെയും ഒരടിയോളം ജലനിരപ്പ് താഴ്ന്നെങ്കിലും  അപകട

നിലയ്ക്കു താഴെയെത്തിയില്ല. താലൂക്കിൽ പ്രവർത്തിക്കുന്ന ദുരിതാശ്വാസ ക്യാംപുകൾ മാറ്റമില്ലാതെ തുടരുകയാണ്.

രാമങ്കരിയിൽ ഒരു ക്യാംപും തലവടിയിൽ 4 ക്യാംപുമാണുള്ളത്. 5 ക്യാംപിലുമായി 52 കുടുംബത്തിലെ 193 പേരാണു താമസിക്കുന്നത്.  ദുരിതാശ്വാസ ക്യാംപുകൾ പ്രവർത്തിക്കുന്ന സ്കൂളുകൾക്ക് ഇന്ന് അവധിയാണെങ്കിലും രാമങ്കരി എൻഎസ്എസ് ഹയർ സെക്കൻഡറി സ്കൂൾ അധികൃതർ അവധി വേണ്ടന്ന് ആവശ്യപ്പെട്ടതിനാൽ രാമങ്കരിയിൽ പഠനം നടക്കും.

ഇവിടെ പഠനത്തിനു ബുദ്ധിമുട്ട് ഉണ്ടാകാത്ത രീതിയിലാണു ക്യംപ് പ്രവർത്തിക്കുന്നത്.
ഇന്നലെ തലവടി, മുട്ടാർ പഞ്ചായത്തുകൾ ഒഴികെയുള്ള പഞ്ചായത്തുകളിൽ വിദ്യാഭ്യാസ സ്ഥാപനങ്ങൾ തുറന്നിരുന്നു. എന്നാൽ വെള്ളക്കെട്ടു ദുരിതം മൂലം പുളിങ്കുന്ന് പഞ്ചായത്തിൽ ഇന്നലെ പഠനം താറുമാറായി.

റോഡുകളിൽ   വെള്ളക്കെട്ടു തുടരുന്നു. പുളിങ്കുന്ന് പ്രദേശത്തെ പല സ്കൂളുകളും ഇന്നലെ ഓൺലൈൻ ക്ലാസുകളാണു നടത്തിയത്.

എന്നാൽ മങ്കൊമ്പ് അടക്കമുള്ള പ്രദേശങ്ങളിൽ ക്ലാസ് നടന്നെങ്കിലും ഹാജർ നില തീരെ കുറവായിരുന്നു.ജലനിരപ്പു മാറ്റമില്ലാതെ തുടരുന്നതിനാൽ ചങ്ങനാശേരിയിൽ നിന്നു കുട്ടനാടിന്റെ വിവിധ ഭാഗങ്ങളിലേക്കു   നിർത്തിവച്ച കെഎസ്ആർടിസിയുടെ പല സർവീസുകളും ഇന്നലെയും പുനരാരംഭിച്ചില്ല. ചങ്ങനാശേരിയിൽ നിന്ന് കൃഷ്ണപുരം വഴി കാവാലത്തിനുള്ള സർവീസ് മാത്രമാണ് ഇന്നലെ പുനരാരംഭിച്ചത്.

വാലടി–മുളയാക്കാംതുരുത്തി റോഡ് തകർന്നു കിടക്കുന്നതിനാൽ ചങ്ങനാശേരിയിൽ നിന്നു പറാൽ വഴിയാണു കാവാലം സർവീസ് ക്രമീകരിച്ചത്.
എസി റോഡിലൂടെയുള്ള നീരേറ്റുപുറം, കളങ്ങര, തായങ്കരി വഴി എടത്വയ്ക്കുള്ള സർവീസുകളും കിടങ്ങറ വഴി കായൽപുറം, ചതുർഥ്യാകരി സർവീസുകളും ഇന്നലെയും പുനരാരംഭിക്കാൻ സാധിച്ചിട്ടില്ല. ഇന്നു ജലനിരപ്പ് കുറയുകയാണെങ്കിൽ സർവീസ് പുനരാരംഭിക്കാൻ സാധിക്കുമോ എന്നു പരിശോധിക്കുമെന്ന് കെഎസ്ആർടിസി ചങ്ങനാശേരി ഡിപ്പോ അധികൃതർ പറഞ്ഞു.നീരേറ്റുപുറത്ത്  24 സെന്റീമീറ്ററും കിടങ്ങറയിൽ 11 സെന്റീമീറ്ററും പള്ളാത്തുരുത്തി, മങ്കൊമ്പ് മേഖലയിൽ 6 സെന്റീമീറ്ററും നെടുമുടി, കാവാലം മേഖലയിൽ 5 സെന്റീമീറ്ററും ചമ്പക്കുളത്തു 4 സെന്റീമീറ്ററും ജലനിരപ്പ് ഇന്നലെ താഴ്ന്നു.

…