കാണികളെ വിസ്മയിപ്പിച്ച് സാമ്രാജിന്റെ ‘മിസൈൽ ബ്ലാസ്റ്റ് എസ്കേപ്’

ആലപ്പുഴ∙ വർധിച്ചു വരുന്ന ഭീകരാക്രമണങ്ങൾക്കും ശത്രുരാജ്യങ്ങളുടെ കടന്നുകയറ്റത്തിനും എതിരെ മജിഷ്യൻ സാമ്രാജ് അവതരിപ്പിച്ച ‘മിസൈൽ ബ്ലാസ്റ്റ് എസ്കേപ്’ കാണികൾക്ക് വിസ്മായമായി.  അതിർത്തിയിലെ സൈനികന്റെ വേഷത്തിലെത്തിയ മാന്ത്രികനെ ചതിയിലൂടെ ശത്രുക്കൾ പിടികൂടി കൂറ്റൻ ചങ്ങല ഉപയോഗിച്ച് ബന്ധനസ്ഥനാക്കുന്നു.
ഒപ്പം അർജുന അവാർഡ് ജേതാവ് പി.ജെ.ജോസഫിനെയും 5 കുട്ടികളെയും ആയുധധാരികൾ ബന്ദികളാക്കി.സ്റ്റേജിൽ സ്ഥാപിച്ച 18 അടി ഉയരവും 6 അടി വിസ്തീർണവുമുള്ള കൂറ്റൻ മിസൈലിനുള്ളിൽ സൈനികനെ അടച്ച് തീ കൊടുക്കുന്നു. ശ്വാസമടക്കിപ്പിടിച്ചിരുന്ന കാണികൾക്കിടയിലൂടെ ചങ്ങലകൾ ഭേദിച്ച് രക്ഷപ്പെട്ട്  ദേശീയ പതാകയുമേന്തി സൈനിക വേഷം ധരിച്ച് കടന്നു വന്ന മജിഷ്യൻ സമ്രാജിനെ നീണ്ട

കരഘോഷത്തോടെയാണ് സദസ്സ് വരവേറ്റത്.
നെഹ്റുട്രോഫി വള്ളംകളിയുടെ പ്രചാരണാർഥമാണ് ജോൺസ് ഗ്രൗണ്ടിൽ പ്രത്യേകം തയാറാക്കിയ വേദിയിൽ മിസൈൽ ബ്ലാസ്റ്റ് എസ്കേപ് സംഘടിപ്പിച്ചത്.നഗരസഭ സ്റ്റാൻഡിങ് കമ്മിറ്റി ചെയർമാൻ നസീർ പുന്നയ്ക്കൽ,ഡിടിപിസി സെക്രട്ടറി അജേഷ്, ചിക്കൂസ് ശിവൻ, പുന്നപ്ര അപ്പച്ചൻ, എന്നിവരും കാണികളിലൊരാളും  ചങ്ങലയുടെയും പൂട്ടുകളുടെയും ബലം പരിശോധിച്ച ശേഷമാണ് മാന്ത്രികനെ പരിപൂർണ ബന്ധനസ്ഥനാക്കിയത്.  
സംസ്ഥാന സർക്കാർ, നെഹ്റു ട്രോഫി ബോട്ട് റേസ് സൊസൈറ്റി, ടൂറിസം വകുപ്പ്, ആലപ്പുഴ ജില്ലാ ഭരണകൂടം എന്നിവരുടെ സഹകരണത്തോടെയായിരുന്നു പരിപാടി. ഓപ്പറേഷൻ സിന്ദൂറിൽ രാജ്യത്തിനു വേണ്ടി ധീരമായി പോരാടിയ ഇന്ത്യൻ സൈന്യത്തിന് ആദരം അർപ്പിച്ചാണ് മാന്ത്രിക വിദ്യ സംഘടിപ്പിച്ചത്. വിവിധ നൃത്തപരിപാടികളും മാജിക് ഷോയും പരിപാടിയുടെ ഭാഗമായി നടന്നു.

…