കാഞ്ഞങ്ങാട് റെയിൽവേ കോച്ച് റസ്റ്ററന്റ് പ്രതിസന്ധിയിൽ; പദ്ധതി ഉപേക്ഷിക്കാൻ കരാറുകാരൻ

പയ്യന്നൂരിന്റെ മാതൃകയിൽ സംസ്ഥാനത്ത് നിലവിൽവരുന്ന പുതിയ റെയിൽവേ കോച്ച് റസ്റ്ററന്റുകളിൽ കാഞ്ഞങ്ങാട് പദ്ധതി പ്രതിസന്ധിയിൽ. ഉപയോഗശൂന്യമായ റെയിൽവേ കോച്ചുകൾ ഉപയോഗിച്ച് നടപ്പാക്കുന്ന പദ്ധതികളിൽ കാഞ്ഞങ്ങാടും കാസർകോട് സ്റ്റേഷനുകളുമാണ് ഉൾപ്പെട്ടിരുന്നത്.

എന്നാൽ കാഞ്ഞങ്ങാട് സ്റ്റേഷന് സമീപത്തെ മത്സ്യമാർക്കറ്റിൽ നിന്നുള്ള രൂക്ഷമായ ദുർഗന്ധവും മാലിന്യപ്രശ്നങ്ങളും കാരണം ഇവിടെ റസ്റ്ററന്റ് ആരംഭിക്കുന്നതിൽ നിന്ന് പിന്മാറാൻ കരാറുകാരൻ ആലോചിക്കുന്നുണ്ട്. അതേസമയം, കാസർകോട് റെയിൽവേ സ്റ്റേഷനിലെ കോച്ച് റസ്റ്ററന്റിന്റെ നിർമ്മാണ പ്രവർത്തനങ്ങൾ ഉടൻ ആരംഭിക്കുമെന്ന് കരാറുകാരൻ വ്യക്തമാക്കിയിട്ടുണ്ട്.

പയ്യന്നൂരിൽ കോച്ച് റസ്റ്ററന്റിന്റെ കരാർ ഏറ്റെടുത്ത വ്യക്തികൾ തന്നെയാണ് കാഞ്ഞങ്ങാട്ടെയും കാസർകോട്ടെയും പദ്ധതികളുടെയും ചുമതല വഹിക്കുന്നത്. പയ്യന്നൂർ റെയിൽവേ സ്റ്റേഷന് മുന്നിൽ പ്രത്യേക പാളത്തിൽ സജ്ജീകരിച്ച ‘ജുജു എക്സ്പ്രസ്’ എന്ന കോച്ച് റസ്റ്ററന്റിന്റെ വിജയം കണക്കിലെടുത്താണ് മറ്റ് സ്റ്റേഷനുകളിലേക്കും ഈ പദ്ധതി വ്യാപിപ്പിച്ചത്.

കാഞ്ഞങ്ങാട് നേരിടുന്ന പ്രധാന പ്രതിസന്ധികൾ റെയിൽവേ സ്റ്റേഷൻ റോഡിലെ പഴയ റെയിൽവേ ഗേറ്റിന് സമീപമുള്ള ഉപയോഗശൂന്യമായ റെയിൽവേ ഭൂമിയിലാണ് കാഞ്ഞങ്ങാട്ടെ കോച്ച് റസ്റ്ററന്റിനായി സ്ഥലം അനുവദിച്ചിരിക്കുന്നത്. എന്നാൽ ഇതിന് തൊട്ടുപിന്നിലായി സ്ഥിതി ചെയ്യുന്ന മത്സ്യമാർക്കറ്റിൽ നിന്നുള്ള മലിനജലവും അവശിഷ്ടങ്ങളും നേരിട്ട് റോഡിലേക്ക് ഒഴുകിയെത്തുന്നത് വലിയ ബുദ്ധിമുട്ടാണ് സൃഷ്ടിക്കുന്നത്.

മലിനജലം സംസ്കരിക്കാനുള്ള സംവിധാനങ്ങളുടെ അഭാവം മൂലം ഈ വെള്ളം മുഴുവൻ റെയിൽവേ സ്റ്റേഷൻ റോഡിലേക്കാണ് എത്തുന്നത്. അടുത്തിടെ റോഡ് കോൺക്രീറ്റ് ചെയ്ത് ഓവുചാൽ നിർമ്മിച്ചിരുന്നെങ്കിലും രൂക്ഷമായ ദുർഗന്ധത്തിന് മാറ്റമില്ല.

മലിനജലത്തിന് പുറമെ കോഴിയുടെ അവശിഷ്ടങ്ങളും ഇവിടെ തള്ളുന്നുണ്ടെന്ന് കരാറുകാരൻ ആരോപിക്കുന്നു. കൂടാതെ, രാവിലെ സമയങ്ങളിൽ മീൻ കയറ്റി വരുന്ന വാഹനങ്ങൾ റോഡിൽ പാർക്ക് ചെയ്ത് മീൻ ഇറക്കുന്നതും ദുർഗന്ധം വർദ്ധിപ്പിക്കുന്നു.

വർഷങ്ങളായി പരിഹരിക്കപ്പെടാതെ കിടക്കുന്ന ഈ പ്രശ്നത്തിന് അധികൃതർ ഇതുവരെയും നടപടി സ്വീകരിച്ചിട്ടില്ല. ഈ സാഹചര്യങ്ങൾ കാരണം ഇതുവഴിയുള്ള യാത്രാക്കാരുടെ എണ്ണം വളരെ കുറവാണ്.

ഭൂരിഭാഗം ആളുകളും ഇപ്പോൾ ദീപ്തി തിയറ്റർ റോഡ് വഴിയാണ് റെയിൽവേ സ്റ്റേഷനിലേക്ക് എത്തുന്നതെന്നും ഈ പ്രശ്നത്തിന് ശാശ്വത പരിഹാരം കാണാത്ത പക്ഷം ഇവിടെ റസ്റ്ററന്റ് വിജയകരമായി മുന്നോട്ട് കൊണ്ടുപോകാൻ സാധിക്കില്ലെന്നും കരാറുകാരൻ വ്യക്തമാക്കുന്നു. നിലവിലെ സ്ഥിതി തുടരുകയാണെങ്കിൽ കാഞ്ഞങ്ങാട്ടെ പദ്ധതി ഒഴിവാക്കിക്കൊണ്ട് അധികാരികൾക്ക് കത്ത് നൽകാനുള്ള നീക്കത്തിലാണ് കരാറുകാരൻ.

അതേസമയം, കാസർകോട്ടെ പദ്ധതിയുമായി ബന്ധപ്പെട്ട് ഉടൻതന്നെ കോച്ചുകൾ എത്തിച്ച് പ്രവർത്തനങ്ങൾ ആരംഭിക്കാനുള്ള നടപടികൾ പുരോഗമിക്കുകയാണ്.