കെഎസ്ഇബി സ്മാർട് മീറ്ററുകൾ സ്ഥാപിച്ചു തുടങ്ങി

പെരിയ∙ ജില്ലയിൽ കെഎസ്ഇബിയുടെ സ്മാർട്ട് മീറ്ററുകൾ സ്ഥാപിച്ചു തുടങ്ങി. ആദ്യ ഘട്ടത്തിൽ ജില്ലയിലെ സർക്കാർ ഓഫിസുകളിലും സബ് സ്റ്റേഷനുകളിലെ ഫീഡർ മീറ്ററുകളിലുമാണ് സ്മാർട്ട് മീറ്ററുകൾ സ്ഥാപിക്കുന്നത്.

7500 ലേറെ സ്മാർട്ട് മീറ്ററുകൾ ജില്ലയിലെത്തിച്ചു. ഈ മാസം 31നകം സർക്കാർ ഓഫിസുകളിലും സബ് സ്റ്റേഷനുകളിലെ ഫീഡർ മീറ്ററുകളിലും സ്മാർട്ട് മീറ്ററുകൾ സ്ഥാപിക്കുന്ന പ്രവൃത്തി പൂർത്തിയാക്കുകയാണ് ലക്ഷ്യമെന്ന് കെഎസ്ഇബി കാസർകോട് സർക്കിൾ  ഡപ്യൂട്ടി ചീഫ് എൻജിനീയർ മുഹമ്മദ് സെയ്ദ് അറിയിച്ചു.
കെഎസ്ഇബിയിൽ ബദൽ മാതൃകപ്രകാരമാണ് സ്മാർട്ട് മീറ്റർ സ്ഥാപിക്കുന്നത്. സബ്സ്റ്റേഷനുകളിലെ 11 കെവി, 22 കെവി ഫീഡറുകളിൽ സ്മാർട്ട് മീറ്റർ സ്ഥാപിക്കുന്ന പ്രവൃത്തി ഈ മാസവും സർക്കാർ ഉപഭോക്താക്കളുടെ മീറ്ററുകൾ മാറ്റി സ്ഥാപിക്കുന്ന പ്രവൃത്തി നവംബറിലും പൂർത്തിയാക്കാനാണ് കെഎസ്ഇബി തീരുമാനം. സംസ്ഥാന സർക്കാരിന്റെ അധിക കടമെടുപ്പുമായി ബന്ധപ്പെട്ട വിഷയമായതിനാൽ സംസ്ഥാന സർക്കാരും ഈ കാര്യത്തിൽ കർശന നിർദേശം നൽകിയിട്ടുണ്ട്.
ലോ ടെൻഷൻ (LT) ഉപഭോക്താക്കളിൽ ആദ്യഘട്ടത്തിൽ സർക്കാർ ഉപഭോക്താക്കൾക്ക് മാത്രമാണ് സ്‌മാർട് മീറ്റർ സ്ഥാപിക്കുന്നത്. സോളർ, ഇവി ചാർജിങ്, ടിഒഡി (ടൈം ഓഫ് ഡേ) ഉപഭോക്താക്കൾക്ക് മീറ്റർ സ്ഥാപിക്കുന്നതിൽ സോഫ്റ്റ്‌വെയർ മാറ്റങ്ങൾ ആവശ്യമുള്ളതിനാൽ ഈ വിഭാഗക്കാർക്കുള്ള മീറ്ററുകൾ നവംബർ അവസാനത്തോടെ പൂർത്തിയാക്കാനാണ് നിർദേശം.
സംസ്ഥാനത്തെ സർക്കാർ ഉപഭോക്താക്കൾക്കായി ആകെ 1.5 ലക്ഷം സിംഗിൾ ഫേസ് മീറ്ററുകളും, 37,000 ത്രീ ഫേസ് മീറ്ററുകളും 1,100 എൽടി സിടി മീറ്ററുകളും ലഭ്യമാക്കും.

സിംഗിൾ ഫേസ് മീറ്ററുകൾ ഭൂരിഭാഗം സെക്‌ഷൻ ഓഫിസുകളിലും എത്തിക്കഴിഞ്ഞു. ബാക്കി മീറ്ററുകളും ഒക്ടോബറിൽ ലഭ്യമാക്കും.

… FacebookTwitterWhatsAppTelegram