അടുത്ത ബ്രഹ്മാണ്ഡചിത്രം തയ്യാറാക്കുന്നതിന്റെ പണിപ്പുരയിലാണ് സംവിധായകന്‍ എസ്.എസ്. രാജമൗലി. മഹേഷ് ബാബുവിനൊപ്പം കൈകോര്‍ക്കുന്ന ‘എസ്.എസ്.എം.ബി.-29’ എന്ന ചിത്രത്തില്‍ വന്‍താരനിരയാണ് അണിനിരക്കുന്നത് എന്നാണ് പുറത്തുവരുന്ന റിപ്പോര്‍ട്ടുകള്‍ സൂചിപ്പിക്കുന്നത്. നായികയായി പ്രിയങ്ക ചോപ്ര എത്തുമ്പോള്‍ മഹേഷിന് വില്ലനായി മലയാളികളുടെ പ്രിയതാരം പൃഥ്വിരാജാണ് എത്തുക എന്ന വാര്‍ത്തകളും പുറത്തുവന്നിരുന്നു. ഇക്കാര്യത്തില്‍ പൃഥ്വി നടത്തിയ പ്രതികരണമാണ് ഇപ്പോള്‍ വൈറലാകുന്നത്.
മോഹന്‍ലാലിനെ നായകനാക്കി സംവിധാനം ചെയ്ത എല്‍.ടു.-എംപുരാന്‍ എന്ന സിനിമയുടെ പ്രമോഷണല്‍ പരിപാടികളില്‍ സജീവമാണ് നിലവില്‍ പൃഥ്വിരാജ്. ഇതിന്റെ ഭാഗമായി പിങ്ക വില്ലയ്ക്ക് നല്‍കിയ പ്രത്യേക അഭിമുഖത്തിലാണ് പൃഥ്വി ‘എസ്.എസ്.എം.ബി.-29’ സംബന്ധിച്ച വാര്‍ത്തകളെക്കുറിച്ചും പ്രതികരിച്ചത്. തന്നെപ്പറ്റിയുള്ള വാര്‍ത്തകള്‍ താന്‍ അറിയുന്നതിനേക്കാള്‍ മുന്നേ നെറ്റിസണ്‍സ് എങ്ങനെയാണ് അറിയുന്നത് എന്ന് മനസിലാകുന്നില്ല എന്നായിരുന്നു തമാശരൂപത്തിലുള്ള പൃഥ്വിയുടെ പ്രതികരണം.
‘എസ്.എസ്.എം.ബി.-29’ സംബന്ധിച്ച ചര്‍ച്ചകള്‍ പുരോഗമിക്കുകയാണ്. ഇതുവരെയും ഒന്നും തീരുമാനമായിട്ടില്ല. ചര്‍ച്ച ചെയ്യേണ്ടതായി നിരവധി കാര്യങ്ങളുണ്ട്. എല്ലാം നന്നായി വന്നാല്‍ അതിനെക്കുറിച്ച് കൂടുതല്‍ സംസാരിക്കാം, പൃഥ്വിരാജ് പറഞ്ഞു. രാജമൗലിയുടെ അടുത്ത ചിത്രത്തില്‍ പൃഥ്വരാജ് വില്ലനായി എത്തുന്നു എന്ന വാര്‍ത്തകള്‍ ആദ്യംമുതലേ പുറത്തുവന്നിരുന്നു. എന്നാല്‍, പൃഥ്വിക്ക് പകരം ജോണ്‍ എബ്രഹാം ആയിരിക്കും ചിത്രത്തില്‍ എത്തുക എന്നതരത്തില്‍ റിപ്പോര്‍ട്ടുകള്‍ വന്നിരുന്നു.
ചര്‍ച്ചകള്‍ നടക്കുന്നതേയുള്ളൂ എന്ന് പറഞ്ഞ സ്ഥിതിക്ക് പൃഥ്വിരാജ് തന്നെയാവും വില്ലനെന്നും ജോണ്‍ എബ്രഹാം മറ്റൊരു കഥാപാത്രമായാവും എത്തുക എന്നുമാണ് ആരാധകരുടെ പക്ഷം. 900-1000 കോടി ബഡ്ജറ്റില്‍ ഒരുങ്ങുന്ന ചിത്രം കാടുമായി ബന്ധപ്പെട്ട ഉദ്വേഗജനകമായ കഥയായിരിക്കും പറയുക എന്നാണ് അണിയറപ്രവര്‍ത്തകര്‍ വ്യക്തമാക്കുന്നത്. 2028-ലായിരിക്കും ചിത്രം റിലീസിനെത്തുക.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
