മോഹൻലാൽ ആരാധകർ ഏറെ ആകാംക്ഷയോടെ കാത്തിരിക്കുന്ന ചിത്രമാണ് പൃഥ്വിരാജ് സംവിധാനം ചെയ്യുന്ന എമ്പുരാൻ. ചിത്രത്തിന്റെ കേരളത്തിലെ ഷൂട്ടിങ് പുരോഗമിക്കുകയാണ്. കഴിഞ്ഞദിവസം ചിത്രത്തിന്റെ ലൊക്കേഷനിൽ നിന്നുള്ള ഒരു ചിത്രം നടൻ ബൈജു പോസ്റ്റ് ചെയ്തിരുന്നു. ഇതിന് നടൻ കലാഭവൻ ഷാജോൺ നൽകിയ രസകരമായ കമന്റ് ശ്രദ്ധേയമാകുകയാണ്.
പൃഥ്വിരാജ്, തിരക്കഥാകൃത്ത് മുരളി ഗോപി എന്നിവർക്കൊപ്പം തിരുവനന്തപുരത്ത് എമ്പുരാന്റെ സെറ്റിൽ നിൽക്കുന്ന ചിത്രമാണ് ബൈജു പോസ്റ്റ് ചെയ്തത്. ഇതിനുതാഴെ വന്ന കമന്റുകളിൽ ഏറ്റവും ശ്രദ്ധേയം നടൻ കലാഭവൻ ഷാജോണിന്റേതായിരുന്നു. ദുഷ്ടാ… എന്നെ വെടിവെച്ചുകൊന്നിട്ട് നിന്നുചിരിക്കുന്നോ എന്നായിരുന്നു ആ കമന്റ്. ഇതിന് ബൈജു ഒരു മറുപടിയും ഇട്ടിട്ടുണ്ട്.
2019-ൽ പുറത്തിറങ്ങിയ ലൂസിഫറിൽ മുരുകൻ എന്ന രാഷ്ട്രീയക്കാരനായാണ് ബൈജു എത്തിയത്. ഇതേ കഥാപാത്രമായിത്തന്നെയാണ് എമ്പുരാനിലും ബൈജു എത്തുക. അലോഷി എന്ന രാഷ്ട്രീയക്കാരനായാണ് കലാഭവൻ ഷാജോൺ ലൂസിഫറിൽ എത്തിയത്. ചിത്രത്തിന്റെ അവസാന ഭാഗത്ത് ബൈജുവിന്റെ കഥാപാത്രം അലോഷിയെ വെടിവെച്ച് കൊലപ്പെടുത്തുകയായിരുന്നു. ഈ രംഗത്തിൽ ബൈജു പറഞ്ഞ ‘ഒരു മര്യാദയൊക്കെ വേണ്ടടേ’ എന്ന ഡയലോഗ് പിന്നീട് തരംഗമായി മാറി.
പൃഥ്വിരാജ് ആദ്യമായി സംവിധാനം ചെയ്ത ലൂസിഫർ എന്ന ചിത്രത്തിന്റെ രണ്ടാം ഭാഗമാണ് എമ്പുരാൻ. ഒട്ടേറെ ഹിറ്റ് ചിത്രങ്ങൾ ഒരുക്കിയ ലൈക്ക പ്രൊഡക്ഷൻസ് ആശിർവാദ് സിനിമാസിനൊപ്പം ‘എമ്പുരാന്റെ’ നിർമാണ പങ്കാളിയാണ്. മലയാളം, തമിഴ്, തെലുങ്ക്, കന്നഡ, ഹിന്ദി തുടങ്ങിയ ഭാഷകളിൽ ഒരുങ്ങുന്ന ഒരു പാൻ ഇന്ത്യൻ ചിത്രമായിരിക്കും ‘എമ്പുരാൻ’. മുരളി ഗോപിയുടേതാണ് തിരക്കഥ. മഞ്ജു വാര്യർ, ടൊവിനോ തോമസ്, ഇന്ദ്രജിത്ത് തുടങ്ങിയവരാണ് മറ്റു പ്രധാന താരങ്ങൾ.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
