ഡാൻസ് കണ്ട് പൊട്ടിച്ചിരിക്കുന്ന കാണികൾ, രൺവീറിന്റെ ആദ്യ ഓഡിഷൻ വീഡിയോ വൈറൽ

ദാദാസാഹിബ് ഫാൽക്കേ ഇൻസ്റ്റിറ്റ്യൂട്ട് ആണ് ഈ വീഡിയോ ഇൻസ്റ്റാ​ഗ്രാമിലൂടെ പുറത്തുവിട്ടത്. രൺവീർ സിം​ഗിന്റെ മുംബൈയിൽ നടന്ന ആദ്യ ഓഡിഷൻ എന്ന തലക്കെട്ടോടെയാണ് അവർ വീഡിയോ പങ്കുവെച്ചത്. താമസിയാതെ തന്നെ പല സോഷ്യൽ മീഡിയാ ​ഗ്രൂപ്പുകളിലും പേജുകളിലും ഈ വീഡിയോ വലിയരീതിയിൽ പ്രചരിച്ചു.

മുഷ്ടി ചുരുട്ടി കൈ ഇരുഭാ​ഗത്തേക്കും വിടർത്തി ഒരു പ്രത്യേകരീതിയിൽ നൃത്തംചെയ്യുന്ന രൺവീറിനെയാണ് വീഡിയോയിൽ കാണാനാവുക. ഇതേ ചുവട് തന്നെ പലതവണ അദ്ദേഹം ആവർത്തിക്കുന്നതും ഇതുകണ്ട് ഓഡിഷനിൽ ഒപ്പമുണ്ടായിരുന്നവർ പൊട്ടിച്ചിരിക്കുന്നതും ദൃശ്യത്തിൽ കാണാം.

കരൺ ജോഹർ ഒരുക്കിയ റോക്കി ഓർ റാണി കി പ്രേം കഹാനിയാണ് രൺവീർ നായകനായി ഒടുവിൽ പുറത്തിറങ്ങിയ ചിത്രം. ആലിയാ ഭട്ട് ആയിരുന്നു നായിക. രോഹിത് ഷെട്ടി സംവിധാനംചെയ്യുന്ന സിങ്കം എ​ഗെയ്ൻ ആണ് താരത്തിന്റേതായി ഉടൻ വരുന്ന ചിത്രങ്ങളിലൊന്ന്. അജയ് ദേവ്​ഗൺ, അക്ഷയ് കുമാർ, ടൈ​ഗർ ഷ്റോഫ്, അർജുൻ കപൂർ, കരീന കപൂർ, ദീപിക പദുക്കോൺ എന്നിവരാണ് ചിത്രത്തിലെ മറ്റുതാരങ്ങൾ. ഫർഹാൻ അക്തർ സംവിധാനംചെയ്യുന്ന ഡോൺ 3 യിലും രൺവീർ ആണ് നായകൻ.